01-Sep-2024

ଡୁଙ୍ଗୁରିପାଲି(ଅରବିନ୍ଦ ମିଶ୍ର)-ସରକାର ଚୋରା ମଦକୁ  ବନ୍ଦ କରିବାକୁ ଉଦ୍ୟମ ଚାଲିଥିବା ବେଳେ ଅସାଧୁ କର୍ମଚାରୀ, ଲାଞ୍ଚଖୋର  ବିଭାଗ ଯୋଗୁଁ ଏହା ସମ୍ଭବ ହୋଇ ପାରୁ ନାହିଁ ।  ଚୋରା ମଦର କାରବାର ଏପରି ଚାଲିଛି ଯେ ସାଧାରଣ ଲୋକେ ଆଶ୍ଚର୍ଯ୍ୟ ପ୍ରକଟ କରୁଛନ୍ତି । ଡୁଙ୍ଗୁରିପାଲି ବ୍ଲକର  ବିଭିନ୍ନ ଗାଁ ରେ ଚାଲିଛି ଦେଶୀ ମହୁଲି ମଦର ବନ୍ୟା । ଖୋଦ ସରକାରୀ ଲାଇସେନ୍ସ ପ୍ରାପ୍ତ ମଦଭାଟି ଯୋଗୁଁ ଏପରି ହେଉଥିବା ଅଭିଯୋଗ ହେଉଛି । ଏହି ବ୍ଲକର ମହୁଲପାଲି (ଶୁଖା) , ସୁନାପାଲି , ଗିଧମାଲ ଓ ଡୁଙ୍ଗୁରିପାଲିଠାରେ ରହିଛି ଲାଇସେନ୍ସ ପ୍ରାପ୍ତ ଦେଶୀ ମଦଭାଟି । ଏହି ଭାଟି ଗୁଡିକ ମଧ୍ୟରୁ ସୁନାପାଲି ଓ ମହୁଲାପାଲି ଭାଟିର କାନ୍ଥରେ  ଦିଆଯାଇଥିବା ସୂଚନାରୁ ଜଣାଯାଏ ଯେ ଉଭୟ ଭାଟିର ଲାଇସେନ୍ସ ଅବଧି ସରିଯାଇଛି । ଶୁଖା ଏବଂ ସୁନାପାଲି ମଦଭାଟିର ସୁଚନାରୁ ଜଣାଯାଏ ଯେ ପଟ୍ଟାଦାର ଉମାଶଙ୍କର ପ୍ରସାଦ । ଲାଇସେନ୍ସ ନମ୍ବର (୦୩)୨୦୨୩-୨୪ । ଲାଇସରନ୍ସର ବୈଧତା ୧.୪.୨୦୨୪ଠାରୁ ୩୧.୩.୨୦୨୪ ଉଲ୍ଲେଖ ରହିଛି ।  ଏହାର ନବୀକରଣ ହୋଇଛି କି ନାହିଁ ତାହା ଭାଟି ମ୍ୟାନେଜରଙ୍କୁ ପଚାରିଲେ ସେ କିଛି କହିନଥିଲେ । ଉକ୍ତ ଭାଟି ଗୁଡିକରୁ ଦୈନିକ କେତେ ପରିମାଣର ମଦ ରନ୍ଧା ଯିବ ଏହାର ମଧ୍ୟ କୌଣସି ସୂଚନା ଭାଟି ମ୍ୟାନେଜର ଦେବାକୁ ମନା କରିଥିଲେ ।  ଆହୁରି ମଧ୍ୟ ପ୍ରତ୍ୟେହ ରନ୍ଧା ହେଊଥିବା ଖୋଲା ମଦକୁ ପାଉଚରେ ଭର୍ତ୍ତି କରିବା ପାଇଁ ବଲାଙ୍ଗିର ପଠାଯାଉଛି । କିନ୍ତୁ ସରକାରଙ୍କ ଗାଇଡ ଲାଇନ ଅନୁସାରେ ମଦ ଯେଉଁଠି ରନ୍ଧା ହେବ ସେଇଠାରେ ପାଉଚ ଆକାରରେ ପ୍ୟାକେଟ କରାଯିବ । ବାହାରକୁ  ଗଲେ ଖୋଲା ମଦର ବିକ୍ରୀ ହେବାର ସମ୍ଭାବନାକୁ ଏଡାଇ ଦିଆଯାଇ ନପାରେ । ସକାଳ ୧୦ରୁ ରାତି ୧୦.୩୦ ପର୍ଯ୍ୟନ୍ତ  ଖୋଲା ରହିବାର ନିୟମ ରହିଥିଲେ ମଧ୍ୟ ଭୋର ୪ଟାରୁ ମଧ୍ୟ ରାତ୍ରୀ ପର୍ଯ୍ୟନ୍ତ ଭାଟି ଖୋଲା ରହୁଛି । ଯାହା ଫଳରେ ଲୋକେ ସବୁ ସମୟରେ ମଦ ପାଉଥିବାରୁ ମଦୁଆଙ୍କ ସଂଖ୍ୟା ଏବଂ ଦୌରାମ୍ୟ ସବୁବେଳେ ଦେଖା ଯାଉଛି । ସବୁଠାରୁ ଆଶ୍ଚର୍ଯ୍ୟ କଥା ଏହି ଅଂଚଳରେ ବିକ୍ରି ହେଉଥିବା ଭାଟି ରନ୍ଧା ପାଉଚ ମଦ ଏବଂ ବଜାରରେ ମିଳୁଥିବା ଖୋଲା ମଦର ସାମଞ୍ଜସ୍ୟ ସମାନ ରହିଛି । ତାହେଲେ ଏହି ଦୈନନ୍ଦିନ ଚଳିବା ପାଇଁ ସେମାନେ ଖୋଲାରେ ଜରି ପ୍ୟାକେଟ ଗୁଡିକରେ କିଛି ମଦ ବିକ୍ର କରିଥାନ୍ତି । ଏହା ଅବକାରୀ ବିଭାଗର ଜାଣତରେ ନା ଅଜାଣତରେ ତାହା ତଦନ୍ତ ସାପେକ୍ଷ । ଯଦି ଏହା ସତ୍ୟ ତାହହେଲେ ସାଙ୍ଘାତିକ ଅଟେ । ଏଣୁ ଏହାକୁ ଚତୁରତାର ସହିତ ଅବକାରୀ ବିଭାଗର  ଚଢାଉ କରିବା କଥା । ଭାଟିଟାରେ ଖୁୁଚୁରା ଆକାରରେ ନିର୍ଦ୍ଦିଷ୍ଟ ପରିମାଣର ଜଣକୁ ଦିଆଯିବା କଥା । କିନ୍ତୁ ଦେଶୀ ମଦଭାଟି ପକ୍ଷରୁ ଗାଁ ଗୁଡିରେ କୁଚିଆ ମଦ ଦୋକାନ ଖୋଲା ଯାଇଛି ।  ପ୍ରତ୍ୟେହ ଶହ ଶହ ପ୍ୟାକେଟ ଆକାରରେ ଭୋର ସକାଳେ କୁଚିଆମାନଙ୍କୁ ଦିଆଯାଉଛି । ସେମାନେ ଗାଁ ଗୁଡିକରେ ଏହାକୁ ବିକ୍ରି କରିଥାନ୍ତି । ଏମାନଙ୍କର କୌଣସି ଲାଇସେନ୍ସ ନଥାଏ । ଅବକାରୀ ବିଭାଗ ଓ ପୁଲିସ ସହିତ ସଲାସୁତୁରାରେ ଏହା ଚାଲୁଅଛି । ନୁଆଖାଇ, ପୁସପୁନି ତଥା ଛାଡଖାଇ ସମୟରେ ଏହି ବେପାର ଖୁବ ଜୋରରେ ଚାଲିଥାଏ । ଆଗକୁ ନୁଆଖାଇ ଥିବାରୁ ଏହି ବେପାର ବେଶ ଜମିଥାଏ । ବିନା ଲାଇସେନ୍ସରେ ମଦ ବିକିବା ବେଆଇନ ହୋଇଥିବା ବେଳେ ଗାଁ ଗହଳୀରେ କୁଚିଆମାନେ କାହାର ବଳରେ ଏମାନେ ନିର୍ଭୟରେ ଦୋକାନ ଖୋଲିଥାନ୍ତି । ଏଭଳି ଭାବରେ ଦେଶୀ ମଦର ବନ୍ୟା ହେଲେ କେତେବେଳେ  ବିଷାକ୍ତ ମଦ ଦ୍ୱାରା ଅଂଚଳରେ ମଦ ମୃତ୍ୟୁ ନ ହେବ କିଏ କହିବ ? ଏହା ବ୍ୟତୀତ ବିଭିନ୍ନ ଅଂଚଳ, ପଡୋଶୀ ଜିଲ୍ଲା ଗୁଡିକରୁ ମଧ୍ୟ ବେଆଇନ ଦେଶୀ ହାତ ରନ୍ଧା ମଦ ଏହି ଅଂଚଳକୁ ଆସୁଅଛି । ଏଥିରେ ବିଭିନ୍ନପ୍ରକାର ଚେର, ବଟିକା, ରାସାୟନିକ ଦ୍ରବ୍ୟ ମିଶାଯାଉଛି । ଯାହା ମଦୁଆକୁ ବେଶ ସୁହାଉଛି । ଯଦି  ମିଶ୍ରଣରେ କିଛି ମାତ୍ରା ଏପଟସେପଟ ହେଲେ ମଦମୃତ୍ୟୁ ସୁନିଶ୍ଚିତ । ଏଣୁ ଅବାକାରୀ ବିଭାଗ ଏଥି ପ୍ରତି ଦୃଷ୍ଟି ଦେଇ ଆଗୁଆ ଦପକ୍ଷେପ ନେବାକୁ ସାଧାରଣରେ ଦାବୀ ହେଉଛି ।