18-Aug-2024

କଣ୍ଟାମାଳ(ଜୟ କୁମାର ମହାରଣା): ସଂରକ୍ଷଣକୁ ନେଇ ସୁପ୍ରିମକୋର୍ଟଙ୍କ ନିଷ୍ପତ୍ତି ବିରୋଧରେ ଆସନ୍ତା ଅଗଷ୍ଟ ୨୧ ତାରିଖରେ ଭାରତ ବନ୍ଦ ଡାକରା ଦିଆଯାଇଛି । ଏହାକୁ ସଫଳ କରିବା ଲାଗି ଅନୁସୂଚିତ ଜାତି ଓ ଜନଜାତି ବର୍ଗ ପକ୍ଷରୁ ଆହ୍ବାନ କରାଯାଇଛି । କଣ୍ଟାମାଳ ପୂର୍ତ୍ତ ବିଭାଗ ଡାକବଙ୍ଗଳାରେ କଣ୍ଟାମାଳ ବ୍ଲକ ଆଦିବାସୀ କନ୍ଧ ସମାଜ ସଭାପତି ନରତ୍ତମ ମଲିକଙ୍କ ଆହ୍ୱାନକ୍ରମେ ଆଦିବାସୀ ସମାଜର ବରିଷ୍ଠ ନାଗରିକଙ୍କୁ ନେଇ ଏକ ବୈଠକ ଆୟୋଜିତ ହୋଇଥିଲା । ବନ୍ଦ ପାଳନ ସମୟରେ କଣ୍ଟାମାଳ ବ୍ଲକରେ ସମ୍ପୂର୍ଣ୍ଣ ରୂପେ ଅଖଚକ ବନ୍ଦ ରହିବ । ଏହାକୁ କିପରି ଶାନ୍ତିପୂର୍ଣ୍ଣ ଭାବେ ସଫଳ କରାଯିବ ସେ​ ନେଇ ବୈଠକରେ  ଆଲୋଚନା ହୋଇଥିଲା । ବାବାସାହେବ ଡ. ଭୀମରାଓ ଆମ୍ବଦକର ସମ୍ବିଧାନରେ ଅନୁସୂଚିତ ଜାତି ଓ ଜନଜାତି ମାନଙ୍କୁ ଯେଉଁ ଅଧିକାର ଦେଇଛନ୍ତି, ସେଥିରେ କାଣ୍ଟଛାଣ୍ଟ କରାଯିବା ଅନୁଚିତ ବୋଲି ମତପ୍ରକାଶ ପାଇଛି l ବୈଠକରେ ଆଦିବାସୀ ସମାଜର କର୍ମକର୍ତ୍ତା ଶ୍ରୀକୃଷ୍ଣ କହଁର, ପିତାମ୍ବର ଭୋଇ, ସାମନ୍ତ ମାଝୀ, ବିବତ୍ସ କହଁର, ଡମ୍ବରୁଧର କହଁର, ପରେଶ ଧରୁଆ, ବଂଶୀଧର ମାଝୀ, ବଳରାମ କହଁର, ରିଙ୍କୁ ମାଝୀ, ସୁରଥ ମଲିକ, ସନ୍ତୋଷ ଦିଶ୍ରୀ ପ୍ରମୁଖ ବ୍ୟକ୍ତି ବିଶେଷ ଉପସ୍ଥିତ ଥିଲେ l ସୂଚନାଯୋଗ୍ୟ, ନିକଟରେ ସୁପ୍ରିମକୋର୍ଟ ସରକାରୀ ଚାକିରିରେ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ରହିଥିବା ସଂରକ୍ଷଣ କୋଟାର ଉପବର୍ଗୀକରଣ କରାଯାଇପାରିବ ବୋଲି ରାୟ ଶୁଣାଇଥିଲେ । ସରକାର ଅନୁସୂଚିତ ଜାତି ଓ ଜନଜାତିରେ ଥିବା ସ୍ଵଚ୍ଛଳ ବର୍ଗଙ୍କୁ ବାଦ୍‌ ଦେଇ ଅବହେଳିତ, ନିଷ୍ପେସିତ ମାନଙ୍କୁ ଅଧିକ ସଂରକ୍ଷଣ ସୁବିଧା ପ୍ରଦାନ କରିପାରିବେ ବୋଲି ସର୍ବୋଚ୍ଚ ନ୍ୟାୟାଳୟଙ୍କ ୭ ଜଣିଆ ବୃହତ୍ତ ଖଣ୍ଡପୀଠ ରାୟ ଶୁଣାଇଥିଲେ ।