10-Aug-2024

କଣ୍ଟାମାଳ(ଜୟ କୁମାରମହାରଣା): କଣ୍ଟାମାଳ ବ୍ଲକ ଅନ୍ତର୍ଗତ ବିଳାସପୁର ଜନତା ଉଚ୍ଚ ବିଦ୍ୟାଳୟ ପରିସରରେ ବିଦ୍ୟାଳୟର ପୁରାତନ ଛାତ୍ରଛାତ୍ରୀଙ୍କ ଦ୍ଵାରା ଏକ ସ୍ବାଗତ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି । ଉତ୍ସବରେ କଣ୍ଟାମାଳ ବିଧାୟକ କହ୍ନେଇ ଚରଣ ଡାଙ୍ଗ ମୁଖ୍ୟଅତିଥି ଓ ବିଶିଷ୍ଟ ସାହିତ୍ୟିକ ତଥା ନାଟ୍ୟକାର ହରିହର ପ୍ରଧାନ, ପୁରାତନ ଛାତ୍ରସଂଘ ସଭାପତି ସୁବେଦାର୍ ଲଳିତ କୁମାର ସାହୁ, ମୋ ସ୍କୁଲ ଅଭିଯାନ ସଦସ୍ୟ  ସୁଦାମ ଖମାରୀ, 

ପୁରାତନ ଛାତ୍ର ସାଧବ ଖମାରୀ ପ୍ରମୁଖ ସମ୍ମାନୀତ ଅତିଥି ଭାବେ ମଞ୍ଚାସୀନ ଥିଲେ | ୧୯୭୦ ମସିହାର ଏହି ବିଦ୍ୟାଳୟରେ ବିଧାୟକ ଶ୍ରୀ ଡାଙ୍ଗ ଛାତ୍ର ଥିବାରୁ ସହପାଠୀ ପୁରାତନ ଛାତ୍ରଛାତ୍ରୀଙ୍କ ପକ୍ଷରୁ ପୁଷ୍ପଗୁଚ୍ଛ ଓ ଉତ୍ତରୀୟ ଦ୍ୱାରା ସମ୍ବର୍ଦ୍ଧିତ କରିଥିଲେ | ସାହିତ୍ୟିକ ଡଃ ସୌରଭ ରଞ୍ଜନ ଖମାରୀଙ୍କ ସଂଯୋଜନାରେ ଅନୁଷ୍ଠିତ ସଭାକୁ ବିଦ୍ୟାଳୟ ପ୍ରଧାନଶିକ୍ଷକ ଚଣ୍ଡୀ ପ୍ରସାଦ ବେହେରା ଅଧ୍ୟକ୍ଷତା କରିଥିଲେ | ବିଦ୍ୟାଳୟର ବିଭିନ୍ନ ସମସ୍ୟା ଉପରେ ଆଲୋଚନା କରିବା ସହ ପୁରାତନ ବିଦ୍ୟାଳୟରେ ଏକ ସଭାଗୃହ ନିର୍ମାଣ ଏବଂ +୨ କଲେଜ ସ୍ଥାପନ ପାଇଁ ବିଧାୟକଙ୍କ ଦୃଷ୍ଟିଆକର୍ଷଣ କରିଥିଲେ | ଶେଷରେ କ୍ରୀଡା ଶିକ୍ଷକ ଆଦିନାଥ ଦାସ ଧନ୍ୟବାଦ୍ ଅର୍ପଣ କରିଥିଲେ | ସେହିପରି ବିଧାୟକ ଶ୍ରୀ ଡାଙ୍ଗ ଗୁଡ଼ଭେଲି ପଦର ରାଧାମୋହନ ଉଚ୍ଚ ବିଦ୍ୟାଳୟ ଏବଂ ବିଳାସପୁର ସରସ୍ବତୀ ଶିଶୁ ମନ୍ଦିରରେ ମା ପାଇଁ ଗଛଟିଏ କାର୍ଯ୍ୟକ୍ରମରେ ଅଂଶଗ୍ରହଣ କରି 

ବୃକ୍ଷରୋପଣ କରିଥିଲେ | ପରେ ବିଳାସପୁର ପଞ୍ଚାୟତ କାର୍ଯ୍ୟାଳୟ ପରିସରରେ ସରପଞ୍ଚ ଅମ୍ବିକା ସୁନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ବିଧାୟକ ଶ୍ରୀ ଡାଙ୍ଗ ମୁଖ୍ୟଅତିଥି ଭାବରେ ଯୋଗଦେଇ ଲୋକଙ୍କ ସମସ୍ୟା ବାବଦରେ ଆଲୋଚନା କରିଥିଲେ | ଶେଷରେ ପାଣ୍ଡିରିପଦା ପଡିଆରେ ମା ପାଇଁ ଗଛଟିଏ କାର୍ଯ୍ୟକ୍ରମରେ ଅଂଶ ଗ୍ରହଣ କରି ବୃକ୍ଷରୋପଣ କରି ଲୋକଙ୍କୁ ଗଛର ଉପକାରିତା ଉପରେ ବୁଝାଇଥିଲେ |