29-Jul-2024

ସମ୍ବଲପୁର, ୨୯.୦୭ – ‘ସମ୍ବଲପୁରୀ ଦିନ୍’ର ଅବ୍ୟବହିତ ପୂର୍ବରୁ ରବିବାର ସମ୍ବଲପୁର ସାଂସଦ, କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଧର୍ମପତ୍ନୀ ତଥା ବିକାଶ ଫାଉଣ୍ଡେସନର ଅଧ୍ୟକ୍ଷା ମୃଦୁଳା ଟି. ପ୍ରଧାନ ସମ୍ବଲପୁର ଗୋବିନ୍ଦତୋଲା ସ୍ଥିତ ସାଂସଦଙ୍କ ବ୍ୟକ୍ତିଗତ କାର୍ଯ୍ୟାଳୟରେ ପୂଜାର୍ଚ୍ଚନା କରିଛନ୍ତି । 

ସମ୍ବଲପୁର ସାଂସଦଙ୍କ କାର୍ଯ୍ୟାଳୟ ମାଧ୍ୟମରେ ସ୍ଥାନୀୟ ଆବଶ୍ୟକତାକୁ ସମାଧାନ କରାଯିବା ସହ ଆଗାମୀ ଦିନ ମାନଙ୍କରେ ଉଭୟ କେନ୍ଦ୍ର ଓ ରାଜ୍ୟର ଜନକଲ୍ୟାଣକାରୀ ଯୋଜନା ମଧ୍ୟ ଲୋକଙ୍କ ପାଖରେ ପହଞ୍ଚାଯିବ । ସ୍ଥାନୀୟ ଲୋକଙ୍କ ଅଭିଯୋଗ ସମସ୍ୟାକୁ ସମାଧାନ କରିବା ଦିଗରେ ବିଶେଷ ଗୁରୁତ୍ୱ ଦିଆଯିବ  । ଜନସାଧାରଣଙ୍କ ଆଶା, ଅପେକ୍ଷା ଓ ଆକାଂକ୍ଷାକୁ ପୂରଣ ପାଇଁ ଏହି କାର୍ଯ୍ୟାଳୟ ଏକ ମାଧ୍ୟମ ରୂପେ କାର୍ଯ୍ୟ କରିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ରାଜ୍ୟରେ ଏବଂ ଦେଶରେ ବିଜେପି ସରକାର ଗଠନ ହୋଇଥିବା ବେଳେ ସମ୍ବଲପୁରରେ ଦୀର୍ଘ ଦିନ ଧରି ଦଳ ପକ୍ଷରୁ ଲୋକଙ୍କ ସେବା କରାଯିବା ସହ ଜନକଲ୍ୟାଣକାରୀ କାର୍ଯ୍ୟକ୍ରମମାନ ହୋଇଛି । ଆଗକୁ ମଧ୍ୟ ଏଭଳି କାର୍ଯ୍ୟକ୍ରମ ଜାରି ରଖାଯିବ ।

ଉଲ୍ଲେଖନୀୟ, ଏହି ପୂଜାର୍ଚ୍ଚନା ସମାରୋହରେ ସମ୍ବଲପୁର ସଂସଦୀୟ କ୍ଷେତ୍ରର ବରିଷ୍ଠ ନେତା ଓ କାର୍ଯ୍ୟକର୍ତ୍ତାମାନେ ସାମିଲ ହୋଇଥିଲେ ।