12-Jul-2024

ବାରିପଦା,  ବାରିପଦା ସାହିତ୍ୟ ସଂସଦର ଉପସଭାପତି ତଥା ବିଶିଷ୍ଟ ନାରୀ କବି ଲକ୍ଷ୍ମୀ କୁମାରୀ ଦାସଙ୍କର 95 ବୟସରେ ତାଙ୍କର ଦେଉଳ ସାହିସ୍ଥିତ  ବାସଭବନରେ ଅପରାହ୍ନ 5 ଘଟିକା ସମୟରେ  ବାର୍ଦ୍ଧକ୍ୟଜନିତ ରୋଗରେ ଚିକିତ୍ସିତ ଅବସ୍ଥାରେ ଇହଲୀଳା ସମ୍ବରଣ କରିଛନ୍ତି । ତାଙ୍କର  ବିୟୋଗରେ ବାରିପଦା ସହରରେ ଶୋକର ଛାୟା ଖେଳି ଯାଇଛି।

ସେ ଜଣେ ସୁଲେଖିକା,  ସୁବକ୍ତା, ଆକାଶବାଣୀ କଟକ କେନ୍ଦ୍ରରେ ଶିଶୁମାନଙ୍କ ପାଇଁ ବିଭିନ୍ନ କାର୍ଯ୍ୟକ୍ରମରେ ଭାଗ ନେଉଥିଲେ। ଶତାଧିକ ସାହିତ୍ୟ ଅନୁଷ୍ଠାନ ପକ୍ଷରୁ  ସାହିତ୍ୟସାଧନା ପାଇଁ ତାଙ୍କୁ ସମ୍ବର୍ଦ୍ଧିତ କରା ଯାଇଥିଲା।ସେ ଦୀର୍ଘ ବର୍ଷ ଧରି ବାରିପଦା ସାହିତ୍ୟ ସଂସଦର ଉପସଭାପତି ଥିଲେ। ତାଙ୍କର ଅନେକ ରଚନା ପାଣ୍ଡୁଲିପି ଭାବେ ରହିଯାଇଛି, ପୁସ୍ତକରୂପେ ପ୍ରକାଶିତ ହୋଇପାରିନାହିଁ।  ପ୍ରକାଶିତ ପୁସ୍ତକ ମଧ୍ୟରୁ "ତୁଳସୀ ଦୁଇପତ୍ରରୁ ବାସେ" ଜନାଦୃତ ତଥା ସର୍ବାଧିକ ଲୋକପ୍ରିୟତା ଲାଭ କରିଛି।

ଗୀତିକାର ଗୁରୁକୃଷ୍ଣ ଗୋସ୍ବାମୀଙ୍କର ସାନ ମାଇଁ ଥିଲେ ଲକ୍ଷ୍ମୀ କୁମାରୀ ଦାସ। ରାଧାକୃଷ୍ଣ ଭଞ୍ଜ, ଶାନ୍ତନୁ କୁମାର ମହାପାତ୍ର ଓ ନାଟ୍ୟକାର  ଆନନ୍ଦ ଶଂକର ଦାସଙ୍କର ଜୀବିତାବସ୍ଥାରେ ଖୁବ ଅନ୍ତରଙ୍ଗ ଥିଲେ ଏହି ମହିୟସୀ କବିୟତ୍ରୀ।

ତାଙ୍କର ବିୟୋଗ ଖବର ପାଇବାପରେ, ତାଙ୍କର ଦେଉଳିସାହି ବାସଭବନରେ ମୟୂରଭଞ୍ଜ ସାହିତ୍ୟ ସଂସଦର ସମ୍ପାଦକ ତଥା ସଦସ୍ଯ, ବିଶିଷ୍ଟ ସାହିତ୍ୟିକ ତଥା ମାନ୍ଯଗଣ୍ଯ ବ୍ଯକ୍ତିଗଣ ତାଙ୍କର ଶେଷ ଦର୍ଶନ କରି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ମରଶରୀରକୁ ଏକ ବିରାଟ ପଟୁଆରରେ ବାରିପଦା ବାରୁଣୀଘାଟଠାରେ  ସମ୍ମାନର ସହ ଅନ୍ତିମ ସଂସ୍କାର କରାଯାଇଥିଲା।