12-Jul-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ସୋନପୁର ଜିଲ୍ଲାର କମସରା ପେକ୍ସର ମିଥ୍ୟାଧାନଖର୍ଦ୍ଦିର ବିବାଦ ନ ଥମୁଣୁ  ଆଜି ବଲାଙ୍ଗୀର ଜିଲ୍ଲାରେ ଏକ ପେକ୍ସରୁ ଚୋରାଧାନ ଚାଲାଣ କଲାବେଳେ ଧରାପଡିଥିବା ଜଣେ ମିଲ୍ ମାଲିକ ବଲାଙ୍ଗୀର ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କୁ ଭିଜିଲାନ୍ସରେ ଧରାଇଦେବା ଘଟଣା ଚର୍ଚ୍ଚିତ ହୋଇପଡିଛି ।  ଏଥିରୁ ପେକ୍ସ-ମିଲର୍ସ- ଯୋଗାଣ ବିଭାଗ ବନାମ ଜିଲ୍ଲା ପ୍ରଶାସନର ମିଳିତ ହାତ ରହୁଥିବା ସ୍ପଷ୍ଟ ହୋଇଛି । 

ଜଣାଯାଇଛି ଯେ କିଛିଦିନତଳେ ଗୁଡଭେଲା ବ୍ଲକ୍ ଡାହିମାଲ୍ ର ଗଜାନନ ରାଇସ୍ ମିଲ୍ ର ଏକ ବେଆଇନ୍ ଧାନଗାଡି ଦେଓଗାଁ ବ୍ଲକ୍ ର ଉପରଝର ପେକ୍ସରୁ ଚୋରାଚାଲାଣ ବେଳେ ଧରାପଡି ଥାନାରେ ଜବତହୋଇ ରହିଥିଲା । କୁହାଯାଇଛି ଯେ , ପ୍ରାୟ କୋଡିଏ ଲକ୍ଷ ଟଙ୍କାର ଏହିଗାଡିଟିକୁ ରିଲିଜ୍ କରିଦେବାକୁ ଉକ୍ତ ମିଲ୍ ମାଲିକ ବଲାଙ୍ଗୀର ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କ ସହିତ ଡିଲ୍ କରିଥିଲେ ।  ଉକ୍ତ ଅଧିକାରୀ କୁଆଡେ ଜିଲ୍ଲାପାଳଙ୍କୁ ଦେବାକୁ କହି ତାଙ୍କଠାରୁ ୧ ଲକ୍ଷ ୮୦ ହଜାର ଟଙ୍କା ଦାବି କରିଥିଲେ । ଇତିମଧ୍ୟରେ ଉକ୍ତ ମିଲ୍ ମାଲିକଙ୍କ ଠାରୁ ଉକ୍ତ ଅଧିକାରୀ କୁଆଡେ ୧ ଲକ୍ଷ ୩୦ ହଜାର ଟଙ୍କା ନେଇ ସାରିଛନ୍ତି । ତେବେ ତଥାପି ପୁଲିସ୍ ଯୋଗାଣବାଭାଗକୁ ହସ୍ତାନ୍ତର କରିଥିବା ଉକ୍ତ ଗାଡିଟିର ରିଲିଜ୍ ନ କରିବାରୁ ମିଲ୍ ମାଲିକ ବାରମ୍ବାର ବଲାଙ୍ଗୀର ସିଏସଓ ଅଫିସ୍ କୁ ଦୌଡି ଦୌଡି ନିରାଶ ହୋଇପଡିଥିଲେ।  ଏଥିପାଇଁ ବଲାଙ୍ଗୀର ଜିଲ୍ଲାମୁଖ୍ୟ ଯୋଗାଣ ଅଧିକାରୀ ଜି ପ୍ରଭାକର ପାତ୍ର ଆହୁରି ୫୦ ହଜାର ଟଙ୍କା ଦାବି କରିଥିବା ଓ ଶେଷରେ ଅତିଷ୍ଠ ହୋଇପଡି ଉକ୍ତ ମିଲ୍ ମାଲିକ ପିଣ୍ଟୁ ଓରଫ ଆଶିଷ ଶର୍ମା ଭିଜିଲାନ୍ସରେ ଅଭିଯୋଗ କରିଥିଲେ । ଏହି ଅନୁଯାୟୀ, ଆଜି ସି ସିଏସ୍ ଓ ବଲାଙ୍ଗୀର ଅଫିସ୍ ରେ ତାଙ୍କଠାରୁ ଦାବି ମୁତାବକ ଏହି ଲାଞ୍ଚଟଙ୍କା ଗ୍ରହଣ କରୁଥିଲାବେଳେ ଭିଜିଲାନ୍ସ ହାତରେ ଗିରଫ ହୋଇଥିବା ପ୍ରକାଶ । ଏହାକୁ ମିଲର୍ସମାନଙ୍କ ପକ୍ଷରୁ 'ଅତି ଲେମ୍ବୁ ଚିପୁଡିଲେ ପିତା' ବୋଲି କୁହାଯାଇଛି ।

ଉଲ୍ଲେଖନୀୟ ଯେ, ଗତକାଲି ବଲାଙ୍ଗୀରରେ ଉପ- ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ସମୀକ୍ଷା ବୈଠକରେ ଏହି ଅଧିକାରୀ ଉପସ୍ଥିତ ଥିଲେ ଓ ଆଜି ଗିରଫର କିଛିଘଣ୍ଟା ପୂର୍ବରୁ ମଧ୍ୟ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ଙ୍କ ସମୀକ୍ଷା ବୈଠକରେ ଉପସ୍ଥିତ ରହିଥିଲେ । ଏଣୁ  ଅସାଧୁ ଅଧିକାରୀଙ୍କ ଉପରେ ନୂଆ ସରକାରଙ୍କର କୌଣସି ପ୍ରଭାବ ପଡିପାରି ନଥିବା ଏହା ଏକ ଜ୍ବଳନ୍ତ ଉଦାହରଣ  ବୋଲି ଚର୍ଚ୍ଚା ହେଉଛି ।

ଉଲ୍ଲେଖଯୋଗ୍ଯ ଯେ, ଗତ ଫେବୃୟାରୀରୁ ସୋନପୁର ଜିଲ୍ଲାର କମସରା ପେକ୍ସକୁ ଧାନ ଦେଇ ପାଉଣା ନ ପାଇବା ଅଭିଯୋଗରେ ସୋନପୁର ଜିଲ୍ଲାପାଳ ଓ ତରଭା ଥାନାରେ ସୋନପୁର ଏଆରସିଏସ୍ ପାଣୁ ଚରଣ ସାହୁଙ୍କ ଦ୍ବାରା କମସରା ପେକ୍ସର ଫେରାର୍ ଡାଟା ଏଣ୍ଟ୍ରି ଅପରେଟର ମନୋରଞ୍ଜନ ମିଶ୍ର ପ୍ରମୁଖଙ୍କ ବିରୋଧରେ ଏକ ଅଭିଯୋଗ କରାଯାଇଛି । ଏଥିସହ ଜିଲ୍ଲାପାଳଙ୍କ ନିର୍ଦ୍ଦେଶରେ ସୋନପୁର ଜିଲ୍ଲା ଯୋଗାଣ ଅଧିକାରୀ ସୁରେଶକୁମାର ପାଣିଗ୍ରାହୀଙ୍କ ନେତୃତ୍ବରେ ଏକ ତଦନ୍ତଦଳ ଗଠନ କରାଯାଇଛି । କୁମ୍ଭାରମୁଣ୍ଡାର ଚାଷୀ ଶକ୍ତି ସାହୁଙ୍କ ଅଭିଯୋଗ ଅନୁଯାୟୀ ସିଆଲଜୁରୀର ଲଳିତା ବନାମ ଶୀତଲ୍ ରାଇସ୍ ମିଲ୍ ରେ ଅଭିଯୁକ୍ତ ଡିଇଓ ଓ ସେକ୍ରେଟାରୀ ୧୯ ଜଣ ଚାଷୀଙ୍କୁ ଫେକ୍ ଭେଣ୍ଡର ସ୍ଲିପ୍ ଧରାଇଦେଇ ସେମାନଙ୍କର ପ୍ରାୟ ୩୫ ଲକ୍ଷ ଟଙ୍କା ହଡପ କରି ବିକି ଦେଇଛନ୍ତି । କିନ୍ତୁ ଏହା ମିଥ୍ୟାଧାନଖର୍ଦ୍ଦିର ଠକେଇ ବୋଲି ସନ୍ଦେହ କରାଯାଉଛି ।

ଏହିପରି ମଣ୍ଡି ଓ ପେକ୍ସର ଦୁର୍ନୀତି ଏଇ ଦୁଇଜିଲ୍ଲାରେ ବର୍ଷ ବର୍ଷ ଧରି ଚାଲିଛି ଏହା ଦୁଇଟି ଛୋଟ ଉଦାହରଣ ମାତ୍ର । ସରକାର ଏହାର ଉପଯୁକ୍ତ ତଦନ୍ତ କରିବାକୁ ଲୋକେ ଦାବି କରିଛନ୍ତି ।