09-Jul-2024

ବଲାଙ୍ଗିର(ଦେବାଶିଷ ବହିଦାର): ଆଜି ଜିଲ୍ଲା ଓକିଲ ସଂଘ ପକ୍ଷରୁ ବଲାଙ୍ଗିର ବିଧାୟକ କଲିକେଶ ନାରାୟଣ ସିଂହଦେଓଙ୍କୁ  ଉପଢ଼ୌକନ ଓ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରାଯାଇଥିଲା l ସ୍ଥାନୀୟ ସିଭିଲ କୋର୍ଟ ବାର୍ ହଲ୍ ଠାରେ ଅନୁଷ୍ଠିତ ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ବିଧାୟକ ଶ୍ରୀ ସିଂହଦେଓ ଯୋଗ ଦେଇ ବଲାଙ୍ଗିର ଜିଲ୍ଲାର ଓକିଲ ମାନେ ସବୁବେଳେ ସମାଜର ନେତୃତ୍ୱ ନେବା ସହ ଦିଗଦର୍ଶନ ଦେଇ ଆସିଛନ୍ତି ବୋଲି କହିଥିଲେ l ଏହି ବାର୍ ର ଓକିଲ ମାନେ ରାଜ୍ଯ ତଥା ରାଜ୍ଯ 

ବାହାରେ ନିଜକୁ ପ୍ରତିଷ୍ଠା କରିଛନ୍ତି l ମୋ ବାପା ବିଧାୟକ ଥିବା ବେଳେ ଏହି ବାର୍ ର ଅନେକ ବିକାଶମୂଳକ କାମ କରିଥିଲେ l ମୋ ବିଧାୟକ ସମୟରେ ମଧ୍ୟ ଓକିଲ ସଂଘର ଯାହା ଆବଶ୍ୟକ ପଡିବ ତାହା ପୂରଣ କରିବା ଦିଗରେ କାର୍ଯ୍ୟ କରିବି ବୋଲି ବିଧାୟକ ଶ୍ରୀ ସିଂଦେଓ ପ୍ରତିଶ୍ରୁତି ଦେଇଛନ୍ତି l  ବଲାଙ୍ଗିରରେ କୃଷି ବିଶ୍ୱବିଦ୍ୟାଳୟ ଓ ହାଇକୋର୍ଟ ବେଂଚ ସ୍ଥାପନର ଆବଶ୍ୟକତା ରହିଛି l ବଲାଙ୍ଗିର ସରକାରୀ ଡାକ୍ତରଖାନାରେ ଏମ୍ ଆର୍ ଆଇ ର ବ୍ୟବସ୍ଥା କରାଗଲେ ସ୍ୱାସ୍ଥ୍ୟ ବ୍ୟବସ୍ଥା କ୍ଷେତ୍ରରେ ବଲାଙ୍ଗିର ଆହୁରି ଉନ୍ନତ ହୋଇପାରନ୍ତା ବୋଲି କଲିକେଶ କହିଛନ୍ତି l  ରାଜ୍ଯ ମନ୍ତ୍ରୀ ମଣ୍ଡଳରେ ଏହି ଜିଲ୍ଲାରୁ ଜଣେ ସ୍ୱାସ୍ଥ୍ୟ ମନ୍ତ୍ରୀ ଓ ଆଉ ଜଣେ କୃଷି ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ ଆସନ ପାଇଛନ୍ତି l ଏହି ସବୁ ଦାବି ପୂରଣ କରିବା ଦିଗରେ ମନ୍ତ୍ରୀ ମହୋଦୟ ଯତ୍ନବାନ ହେବେ ବୋଲି ଆଶା କରାଯାଉଛି l  ବଲାଙ୍ଗିରକୁ ବିକାଶର ରାସ୍ତାରେ ଆଗେଇ ନେବା ଦିଗରେ ଆମେ ସମସ୍ତେ ମିଶି କାମ କରିବା ବୋଲି ବିଧାୟକ କଲିକେଶ ନାରାୟଣ ସିଂଦେଓ କହିଛନ୍ତି  l ବଲାଙ୍ଗିର ଜିଲ୍ଲା ଓକିଲ ସଂଘର ସଭାପତି ଅମରେଶ ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମ୍ବର୍ଦ୍ଧନା ଉତ୍ସବରେ ବରିଷ୍ଠ ଆଇନଜୀବୀ ଅଶୋକ କୁମାର ମହାନ୍ତି  ବିଧାୟକ କଲିକେଶଙ୍କୁ  ପୁଷ୍ପଗୁଚ୍ଛ ପ୍ରଦାନ କରିଥିବା ବେଳେ ଅମରେଶ ତ୍ରିପାଠୀ ଉପଢୌକନ ଦେଇ ସମ୍ବର୍ଦ୍ଧିତ କରିଥିଲେ l 
ଶେଷରେ ସଂଘ ର ସମ୍ପାଦକ ପ୍ରମୋଦ ବହିଦାର ଧନ୍ୟବାଦ ଅର୍ପଣ କରିଥିଲେ l ଓକିଲ ସଂଘର ଉପସଭାପତି ସରୋଜ କୁମାର ଗୁପ୍ତା ମଞ୍ଚାସୀନ ଥିଲେ l ଏହି କାର୍ଯ୍ୟକ୍ରମରେ ଜିଲ୍ଲା ଓକିଲ ସଂଘ ର ସମସ୍ତ ସଭ୍ଯ ଯୋଗ ଦେଇଥିଲେ