03-Jul-2024

ସୋନପୁର: (ମନୋରଞ୍ଜନ ତ୍ରିପାଠୀ )
 ଆନ୍ତର୍ଜାତୀୟ ସାମ୍ବାଦିକ ସଂଗଠନ "ଭଏସ ଅଫ୍ ମିଡ଼ିଆ" ର ସୁବର୍ଣ୍ଣପୁର ଓ ବୌଦ୍ଧ ଜିଲ୍ଲାର ସମସ୍ତ ସଦସ୍ୟ ମାନଙ୍କୁ ନେଇ ସୋନପୁର ସୁରେଶ୍ଵରୀ ମନ୍ଦିର ପ୍ରାଙ୍ଗଣ ରେ ଏକ ସ୍ଵାଗତ ସମାରୋହ ତଥା କାର୍ଯ୍ୟକାରୀ କମିଟି ବୈଠକ ଅନୁଷ୍ଟିତ ହୋଇଯାଇଛି। ମୁଖ୍ୟ ଅତିଥି ଭାବେ ରାଜ୍ୟ ସଭାପତି ପ୍ରଭାତ କୁମାର ମିଶ୍ର ଯୋଗଦେଇ ସାମ୍ବାଦିକ ମାନଙ୍କ ଉପରେ ସରକାରଙ୍କ ବୈମାତୃକ ମନୋଭାବ ପ୍ରଦର୍ଶନ ଉପରେ ଆଲୋକପାତ କରିବା ସହ ରାଜ୍ୟରେ"ସାମ୍ବାଦିକ ସୁରକ୍ଷା ଆଇନ" ଲାଗୁ କରିବା ପାଇଁ ଦୃଢ଼ଦାବୀ କରାଯିବ ବୋଲି କହିଥିଲେ। "ଭଏସ୍ ଅଫ୍ ମିଡ଼ିଆ" ପକ୍ଷରୁ ଅନ୍ୟ ରାଜ୍ୟରେ ଦିଆ ଯାଉଥିବା ୫ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା ଓ ୫ ଲକ୍ଷ ଟଙ୍କାର ଦୁର୍ଘଟଣା ଜନିତ ବୀମା ସହ ବିଭିନ୍ନ ପ୍ରକାର ସୁବିଧା ଯଥାଶୀଘ୍ର ଓଡିଶାରେ ମଧ୍ୟ ଲାଗୁ କରାଯିବାକୁ ସରକାର ଙ୍କୁ ପ୍ରସ୍ତାବ ଦିଆଯିବ ବୋଲି ମତ ରଖି ଥିଲେ। ସମ୍ମାନିତ ଅତିଥି ଭାବରେ ରାଜ୍ୟ ଉପ-ସଭାପତି ଆଶୁତୋଷ ରଥ ରାଜ୍ୟ ସରକାର ପଶୁପକ୍ଷୀ ଗଣନା କରି କୋଟି କୋଟି ଟଙ୍କା ଖର୍ଚ୍ଚ କରି ପାରୁଥିବା ବେଳେ ରାଜ୍ୟରେ ସଠିକ୍ ସାମ୍ବାଦିକ ଗଣନା ସହ କୌଣସି ଯୋଜନା କରି ପାରୁନଥିବା ବୈମାତୃକ ମନୋଭାବର ପରିଚୟ ବୋଲି ମତ ରଖିଥିଲେ। ଅନ୍ୟାନ୍ୟ ଅତିଥି ମାନଙ୍କ ମଧ୍ୟରେ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଧନେଶ୍ଵର ବିଦାର, ସମାଜସେବୀ ଭୋଜରାଜ ବାଗ, ରାଧେଶ୍ୟାମ ପଣ୍ଡା ସଭାପତି ସମ୍ବଲପୁର, ପଙ୍କଜ କୁମାର ସାହୁ ସଭାପତି ସୁନ୍ଦରଗଡ, ଭବାନୀ ଶଙ୍କର ପାଢ଼ୀ ସଭାପତି ବରଗଡ଼ ଯୋଗଦେଇ ସାମ୍ବାଦିକ ମାନଙ୍କ ବିଭିନ୍ନ ସମସ୍ୟା ସମ୍ପର୍କରେ  ନିଜ ନିଜର ମତ ରଖିଥିଲେ। ନୂତନ ଭାବେ ଗଠନ ହୋଇଥିବା ଏହି ସଂଘ ର ସୁବର୍ଣ୍ଣପୁର ଜିଲ୍ଲା ସଙ୍ଗଠନ ସଭାପତି ଭାବେ ସିଦ୍ଧେଶ୍ୱର ଗିରି ଓ ବୌଦ୍ଧ ଜିଲ୍ଲା ସଭାପତି ଭାବେ ଆଶିଷ ବିହାରୀ ଠାକୁର ଙ୍କୁ ରାଜ୍ୟ ସଂଗଠନ ଏହି ବୈଠକ ରେ ମନୋନୀତ କରିଥିବା ବେଳେ ବିଜୟ ଆଚାର୍ଯ୍ୟଙ୍କୁ ରାଜ୍ୟ ସଂଗଠନ ସମ୍ପାଦକ ଦାୟିତ୍ଵ ଦିଆଯାଇଛି। ଏହି ସ୍ଵାଗତ ସମାରୋହରେ ବେଣୁଧର ପ୍ରଧାନ,ବୈଦ୍ୟନାଥ ସାମଲ,ଚୈତନ୍ୟ ପୋଥାଳ,ବସନ୍ତ ସ୍ୱାଇଁ ,ମୋତି ଲାଲ ବାଗ ପ୍ରମୁଖ ବହୁ ବରିଷ୍ଠ ସାମ୍ବାଦିକ ଯୋଗଦେବା ସହ ବୌଦ୍ଧ ଜିଲ୍ଲା ସାଧାରଣ ସମ୍ପାଦକ ବୃନ୍ଦାବନ ପାତ୍ର ଧନ୍ୟବାଦ ଦେଇଥିଲେ l