09-Jun-2024

ବୀରମହାରାଜପୁର(ପ୍ରେରଣା ଖବର): ସୁବଳୟା ପୋଲିସର ଦବଙ୍ଗଗିରି, ବିନା ଦୋଷରେ ଦୀର୍ଘ ୬୦ ଘଣ୍ଟା ଧରି ଯୁବକକୁ ଅଟକ ରଖି ମାଡ। ଲହୁଲୁହାଣ ହୋଇ ଡାକ୍ତରଖାନାରେ ଭର୍ତ୍ତି ହେଲେ ଯୁବକ। ସୁବର୍ଣ୍ଣପୁର ଜିଲ୍ଲା ସୁବଳୟା ଥାନାରେ ଘଟିଛି ଏପରି କିଛି ଅଭାବନୀୟ ଘଟଣା ।

   ଅଭିଯୋଗ ଅନୁସାରେ ସୁବଳୟା ଥାନା ଅର୍ନ୍ତଗତ ଟେଭାପଦର ଗାଁର ଟ୍ରାକ୍ଟର ଲଙ୍ଗଳ ଚୋରି ନେଇ ମହେନ୍ଦ୍ର ମହାଳିକ ନାମକ ଜଣେ ବ୍ୟକ୍ତି ଥାନାରେ ଲିଖିତ ଅଭିଯୋଗ କରିଥିଲେ। ତେବେ ଏହି କେସର ତଦନ୍ତ କରିବା ପାଇଁ ସେହି ଗାଁର ଜଗନ୍ନାଥ କର୍ମୀ ନାମକ ଯୁବକକୁ ସନ୍ଦେହରେ ଥାନାକୁ ଡାକିଥିଲା ସୁବଳୟା ପୋଲିସ। ତେବେ ତାଙ୍କୁ ଦୀର୍ଘ ୩ ଦିନ ପର୍ଯ୍ୟନ୍ତ ଥାନାରେ ରଖି ପ୍ରବଳ ମାଡ଼ ମାରିଥିବା ଅଭିଯୋଗ ହୋଇଛି । ସୁବଳୟା ଥାନା ଏ.ଏସ.ଆଇ ସନ୍ତୋଷ ସିନ୍ଦିରିଆ ପଚରାଉଚୁରା ଆଳରେ ନିସ୍ତୁକ ମାଡ ମାରିଥିବା ଅଭିଯୋଗ କରିଛନ୍ତି ଯୁବକ ଜଣକ l ଫଳରେ ସେ ଗୁରୁତର ହୋଇ ପଡ଼ିଥିଲେ । ସେ ଏହି ମାମଲାରେ ସଂପୃକ୍ତ ନଥିବା ବାରମ୍ବାର କହିଥିଲେ ହେଁ ଯୁବକକୁ ପୋଲିସ ମାଡ଼ ମାରି ଲହୁଲୁହାଣ କରି ପକାଇଥିଲା। ଜଗନ୍ନାଥଙ୍କ ଭାଇ ପୋଲିସକୁ ଫୋନ କରି ଅନୁରୋଧ କରିବାରୁ ତତେ ବିଭିନ୍ନ ମାମଲାରେ କେସ କରି ଭିତରକୁ କରିଦେବି କହି ଧମକ ଦେଇଥିଲେ । ପରେ ତାଙ୍କ ଭାଇ ସୁବର୍ଣ୍ଣପୁର ଏସପି ଙ୍କୁ ଯୋଗାଯୋଗ କଲା ପରେ ପୁଲିସ ତାଙ୍କୁ ଛାଡି ଦେଇଥିଲା । ଜଗନ୍ନାଥଙ୍କ ଅଭିଯୋଗ ଅନୁସାରେ ପୁଲିସକୁ ପାଣି ମାଗିଲେ ପରିସ୍ରା ପିଆଇ ଦେବି ବୋଲି କହି ଅକଥନିୟ ଅତ୍ୟାଚାର କରିଥିଲେ l