28-May-2024

ବଲାଙ୍ଗୀର(ପ୍ରେରଣା ଖବର ):ବଲାଙ୍ଗୀର ସହରର ସର୍ବବୃହତ ପୁସ୍କରିଣୀ ମହାରାଣୀସାଗରର ଉନ୍ନିକରଣ କାମ ଯୁଦ୍ଧକାଳିନ ଭିତ୍ତିରେ ଚାଲୁରହିଛି । ନିର୍ବାଚନପ୍ରଚାରରେ ନେତାନେତ୍ରୀମାନେ ବ୍ୟସ୍ତଥିଲେ ଓ ଏବେ ଟିକିଏ ଆସ୍ୱସ୍ତି ମିଳିଛି । କିନ୍ତୁ ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ପୁଣି ଚଳଚଞ୍ଚଳ ହୋଇଛନ୍ତି । ଆଜି ପୌରାଧ୍ୟକ୍ଷା ପୌରପାଳିକାର ଯନ୍ତ୍ରୀମାନଙ୍କୁ ନେଇ କାମର ତଦାରଖ କରିବା ସହ ଜୁନ ୧୫ ସୁଦ୍ଧା ବର୍ଷାପୂର୍ବରୁ ଶେଷକରିବାକୁ ସେ ଯନ୍ତ୍ରୀମାନଙ୍କୁ ନିର୍ଦ୍ଦେଶ କରିଛନ୍ତି । ଆଜି ଦିନ ଠିକ ୧୦.୩୦ ବେଳେ ପୌରାଧ୍ୟକ୍ଷା ପୌରାପାଳିକାର ସହକାରୀଯନ୍ତ୍ରୀ ଇଂ.ପ୍ରଶାନ୍ତ ନାଏକ ଓ କନିଷ୍ଠଯନ୍ତ୍ରୀ ଇଂ.ରୋଜାଲିସା ରାଉତଙ୍କୁ ସାଙ୍ଗରେ ନେଇ ମହାରାଣୀସାଗରରେ ପହଞ୍ଚିଥିôଲେ । ସାଗରରେ ବହୁତ ପାରିମାଣରେ ପଙ୍କ ରହିଥିଲା । ବହୁବର୍ଷ ହେଲା ଏହାର ପଙ୍କୋଦ୍ଧାର ହୋଇନଥିବାରୁ ଏବେ ଏକା ସାଙ୍ଗରେ ସବୁ ପଙ୍କ ଉଦ୍ଧାର କରିବାରେ ସାମାନ୍ୟ ଅସୁବିଧା ହେଉଥିବା ଯନ୍ତ୍ରୀ ଶ୍ରୀ ନାଏକ କହିଥିଲେ । ଅଟକଳ ଅନୁଯାୟୀ ସମସ୍ତ ପଙ୍କ ଉଠାଇ ବାହାରକୁ ନେଇ ପକାଇବା ସହିତ ପଡାମାନଙ୍କର ପାଣି ଯେଭଳି ସାଗର ପାଣିରେ ନମିସେ ସେଦିଗରେ ଆବଶ୍ୟକ ଡ୍ରେନନିର୍ମାଣ ଉପରେ ଗୁରୁତ୍ୱ ଦେବାକୁ ପୌରାଧ୍ୟକ୍ଷା ଶ୍ରୀମତୀ ସାହୁ ନିର୍ଦ୍ଦେଶ କରିଥିଲେ । ଏପଯ୍ୟନ୍ତ ଅନେକ ପରିମାଣରେ ପଙ୍କ ଓ ମାଟି ଉଦ୍ଧାର ହୋଇସାରିଥିବା ତଥା ଇଚ୍ଛାପଡା ପଟେ ଡ୍ରେନନିର୍ମାଣ ହୋଇଥିବା ସହକାରୀ ଯନ୍ତ୍ରୀ ଶ୍ରୀ ନାଏକ କହିଥିଲେ । ଏହି ଅବସରରେ ମହାରାଣିସାଗର ଉନ୍ନୟନକାମର ଦାୟୀତ୍ୱ ନେଇଥିବା ୧୦୦ରୁ ଉର୍ଦ୍ଧ୍ୱ ମହିଳା ସ୍ୱୟଂସହାୟିକାଗୋଷ୍ଠୀଙ୍କ ସହ ତଥା ସ୍ଥାନୀୟ କାଉନସିଲର ଗଙ୍ଗାଧର ଚାନ୍ଦ ଓ ବରିଷ୍ଠନାଗରିକମାନଙ୍କ ସହିତ ମଧ୍ୟ ପୌରାଧ୍ୟକ୍ଷା ଲିକା ସାହୁ ଆଲୋଚନା କରିଥିଲେ । ପ୍ରକାଶ୍ୟ ଯେ,ଗତ କିଛିବର୍ଷ ହେଲା ବଲାଙ୍ଗୀର ସହରରେ ମହାରାଣୀସାଗରର ଉନ୍ନୟନ ଏକ ରାଜନୈତିକ ପ୍ରସଙ୍ଗ ହୋଇଯାଇଛି । ପ୍ରଥମେ ୨୧କୋଟି ଟଙ୍କାର ଅଟକଳ କରାଯାଇଥିଲା । କିନ୍ତୁ ସେଥିରେ କେବଳ ସୌନ୍ଦର୍ଯ୍ୟକରଣ କାମ ଥିବାରୁ ଇଚ୍ଛାପଡା ସମେତ ଇନ୍ଦିରାନଗର ଅଞ୍ଚଳର ଜବରଦଖଲ ଉଚ୍ଛେଦ କରାଯିବାକୁ ଥିବାରୁ ସେତେବେଳେ ଏହାକୁ ସ୍ଥାନୀୟ ଲୋକେ ବିରୋଧ କରିଥିଲେ । ପରେ ରାଜ୍ୟହାଉସିଂ ବୋର୍ଡର ଅଧ୍ୟକ୍ଷ ଥିବା ପୂର୍ବତନ ସାଂସଦ କଳିକେଶନାରାୟଣ ସିଂଦେଓଙ୍କ ଉଦ୍ୟମରେ ସହରାଞ୍ଚଳ ବିକାଶ ବିଭାଗ ପକ୍ଷରୁ ୧୨କୋଟି ଟଙ୍କା ମଞ୍ଜୁର କରାଯାଇଥିଲା । ଏହି କାମକୁ ଇଚ୍ଛାପଡା,ଇନ୍ଦିରାନଗର,ତୁଳସୀନଗର,ସାଗରପଡା ଇତ୍ୟାଦି ଅଞ୍ଚଳରେ ଥିବା ମହିଳା ସ୍ୱୟଂସହାୟିକା ଗୋଷ୍ଠୀମାନେ କରିବାକୁ ଦାୟୀତ୍ୱ ଦିଆଯାଇଥିଲା । ଗତ ଏକମାସରୁ ଉର୍ଦ୍ଧ୍ୱ ସମୟ ହେଲା ପ୍ରାୟୁ ୬୦ରୁ ଅଧିକ ଜେସିବି,ହାଇୱା ଓ ଟ୍ରାକ୍ଟର ଲାଗି ମାଟିକାମ କରାଯାଉଛି । ଅଟକଳରେ ଯେତିକି ମାଟିଯିବାର ନୀୟମ ରହିଛି ସେତିକି ମାଟି ବର୍ଷାପୂର୍ବରୁ ଉଠାଯିବ ବୋଲି ପୌରପାଳିକାର ସହକାରୀ ଯନ୍ତ୍ରୀ ଇଂ.ପ୍ରଶାନ୍ତ ନାଏକ କହିଛନ୍ତି । ପ୍ରଥମେ ମାଟିକାମ ଓ ଡ୍ରେନକାମ ସରିଲା ପରେ ସୌନ୍ଦର୍ଯ୍ୟକରଣ କରାଯିବ ବୋଲି ସୂଚନା ଦିଆଯାଇଛି ।