23-Apr-2024

ବଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ନିର୍ବାଚନମଣ୍ଡଳିରେ ରାଜନୈତିକଦଳମାନେ ପ୍ରଚାରପାଇଁ ବିଭିନ୍ନ ପ୍ରକାର କାର୍ଯ୍ୟକ୍ରମ କରୁଛନ୍ତି । ସେହିକ୍ରମରେ ଲୋକଙ୍କ ଆଧ୍ୟାତ୍ମିକ ଭାବନାକୁ ନେଇ ଆଜି ବିଜୁଜନତାଦଳର ମହିଳାମାନେ ଏକ ବିଶାଳ ଶୋଭାଯାତ୍ରା କରି ବିଜେଡିର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ,ବଲାଙ୍ଗୀର  ବିଜେଡିପ୍ରାର୍ଥି କଳିକେଶନାରାୟଣ ସିଂଦେଓ,ବିଜେଡିର ସାଂସଦପ୍ରାର୍ଥି ସୁରେନ୍ଦ୍ରକୁମାର ସିଂଭୋଇ ଓ ସଂସଦୀୟକ୍ଷେତ୍ରର ସମସ୍ତ ବିଧାୟକଙ୍କ ବିଜୟ ପାଇଁ

ସମଲେଶ୍ୱରୀ ମନ୍ଦିର ଓ ପାଟଣେଶ୍ୱରୀ ମନ୍ଦିରରେ ୨ହଜାର ଦୀପଦାନ କରିଛନ୍ତି । ଆଜି ଚୈତ୍ରପୂର୍ଣ୍ଣମୀ ଦିନ ସମଲେଶ୍ୱରୀ ମନ୍ଦିର ଓ ପାଟଣେଶ୍ୱରୀମନ୍ଦିରରେ ଏକ ଭାବମୟ ପରିବେଶ ସୃଷ୍ଟି ହୋଇଥିଲା । ହଜାର ହଜାର ମହିଳାଙ୍କ ଦୀପଦାନରେ ସମଲେଶ୍ୱରୀ ମନ୍ଦିର ଓ ଆଖପାଖ ଅଞ୍ଚଳରେ ଆଲୋକମୟ ହୋଇଯାଇଥିଲା । ସ୍ଥାନୀୟ ରାଜେନ୍ଦ୍ରପାର୍କ ସମ୍ମୁଖରୁ ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ,ବିଜୁମହିଳା ଜନତାଦଳର ଜିଲ୍ଲା ସଭାନେତ୍ରୀ ଦମୟନ୍ତି ବାଗ,ଜିଲ୍ଲାପରିଷଦ ଅଧ୍ୟକ୍ଷା ଦେବକୀ ସାହୁ,ପୂର୍ବତନ ପୌରାଧ୍ୟକ୍ଷା ସନ୍ତୋଷିନୀ ବେହେରା,ଉପାଧ୍ୟକ୍ଷା ଲିପିଶ୍ରୀ ସାଏ,ବିଜେଡିର ବରିଷ୍ଠନେତ୍ରୀ ସାଗରିକା ଗୁରୁ ପ୍ରମୁଖଙ୍କ ନେତୃତ୍ୱରେ ୨ହଜାରରୁ ଅଧିକ ମହିଳା ହାତରେ ଦୀପଧରି ଶୋଭାଯାତ୍ରା କରିଥିଲେ । ବାଜାଗଜା ବଜାଇ ଚାଲିଥିବା ଶୋଭାଯାତ୍ରାରେ ବିଜେଡିର ବରିଷ୍ଠନେତା ଅନଙ୍ଗଉଦୟ ସିଂଦେଓ,ବିଜେଡିପ୍ରାର୍ଥି କଳିକେଶନାରାୟଣ ସିଂଦେଓ,ଯୁବନେତା ମନ୍ମଥବିଜୟ ସିଂଦେଓ,ରାଜ୍ୟ ସଂପାଦକ ପ୍ରଦ୍ୟୁତ ମିଶ୍ର,ପ୍ରଭାସ ପାଣିଗ୍ରାହୀ,ଦୁର୍ଗାପ୍ରସାଦ ବେହେରା,ଏଡଭୋକେଟ ଓଁକାର ନାୟକ,ନରସିଂହ ବାଘ,ଧୃବ ଜୁଏଡ,ମହେନ୍ଦ୍ର ବାଘ,ଚନ୍ଦ୍ରମଣୀ ତ୍ରୀପାଠୀ ପ୍ରମୁଖ ସାମିଲ ହୋଇଥିଲେ । ଶୋଭାଯାତ୍ରା ଟାଉନଥାନା,କଚେରୀଛକ,ପୁରୁଣା ବସଷ୍ଟାଣ୍ଡ,ସହରର ମୁଖ୍ୟରାସ୍ତା , ପାଟଣାଛକ ଦେଇ ସମଲେଶ୍ୱରୀ ମନ୍ଦିରରେ ପହଞ୍ଚିଥିଲା । ସମଲେଶ୍ୱରୀ ମନ୍ଦିରରେ ପୂଜକମାନେ ସଂଧ୍ୟାଆଳତୀ ପରେ ପୂଜାର୍ଚ୍ଚନା କରି ପୌରାଧ୍ୟକ୍ଷା ଆଣିଥିବା ଖଇଜୁଗାର ଭୋଗଲଗାଯାଇଥିଲା । ବିଜେଡିର ବିଧାୟକ ପ୍ରାର୍ଥି କଳିକେଶଙ୍କ ବିଜୟର ଶୁଭକାମନା ନେଇ ମହିଳାମାନେ ମାନସିକ କରିଥିଲେ । କୌଣସି ଶୁଭକାର୍ଯ୍ୟ କରିବା ପୂର୍ବରୁ

ନିଜର ଇଷ୍ଟଦେବତାଙ୍କୁ ପୂଜା କରାଯାଇଥାଏ । ଆଜି ବଲାଙ୍ଗୀରର ଇଷ୍ଟଦେବୀଙ୍କୁ ପୂଜାର୍ଚ୍ଚନା କରାଯାଇଛି । ମାଁ ସମଲେଶ୍ୱରୀ, ମାଁ ପାଟଣେଶ୍ୱରୀ ଚଳିତ ନିର୍ବାଚନରେ ବିଜେଡିଦଳ ଓ କଳିକେଶଙ୍କ ପାଇଁ ନିଶ୍ଚୟ ଶୁଭଫଳ ପ୍ରଦାନ କରିବେ ବୋଲି ବଲାଙ୍ଗୀରର ମହିଳାମାନେ ଆଶା କରିଛନ୍ତି ବୋଲି ପୌରାଧ୍ୟକ୍ଷା ଲିକା ସାହୁ କହିଛନ୍ତି । ଆଜିର ଏହି ଶୋଭାଯାତ୍ରାରେ ପୌରପାଳିକାର ସମସ୍ତ କାଉନସିଲରଙ୍କ ସମେତ ୨୧ଟି ୱାର୍ଡରୁ ହଜାର ହଜାର ସଂଖ୍ୟାରେ ମହିଳାମାନେ ଯୋଗଦେଇଥିଲେ । ମହିଳାଙ୍କ ହୁଳହୁଳିରେ କିଛି ଘଣ୍ଟା ସହର କମ୍ପିଉଠିଥିଲା ।