17-Apr-2024

ବାଲାଙ୍ଗୀର(ପ୍ରେରଣା ଖବର ): ଆସନ୍ତା ସାଧାରଣ ନିର୍ବାଚନରେ ଶାସକ ବିଜେଡି ଦଳ ପଶ୍ଚିମ ଓଡିଶାକୁ ଫୋକସ କରିଥିବା ସ୍ପଷ୍ଟ ହୋଇଛି । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜି ଆସନରେ ଲଢିବାକୁ ନିଷ୍ପତ୍ତି ନେଇ ନେଇ ପ୍ରାର୍ଥି ହୋଇଛନ୍ତି । ଫଳରେ ଆଜିର ଏହି ଘୋଷଣାପରେ ବିଜେଡି ଶିବିରରେ ଖୁସିର ଲହରୀ ଖେଳିଯାଇଛି । ବିଜେଡି ଦଳର ବରିଷ୍ଠ ନେତା ଅନଙ୍ଗଉଦୟ ସିଂଦେଓ ଏହି ପ୍ରସଙ୍ଗରେ କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏତେ ଲୋକପ୍ରୀୟ ନେତା ଯେ,ସେ ଯେ କୌଣସି ନିର୍ବାଚନମଣ୍ଡଳିରେ ଛିଡାହେଲେ ଜିଣିବେ । ୬ଷ୍ଠଥର ସେ ମୁଖ୍ୟମନ୍ତ୍ରୀ ହେବେ । ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜି ଆସନରେ ନବୀନ ବାବୁ ଛିଡା ହେବାକୁ ନିଷ୍ପତ୍ତି ନେଇଥିବାରୁ ସେ ଏହାକୁ ସ୍ୱାଗତ କରିଛନ୍ତି ଓ ବିରୋଧି ସଂପୂର୍ଣ୍ଣ ଭାବେ ନିର୍ବାଚନରେ ପରାଜିତ ହେବେ ବୋଲି କହିଛନ୍ତି । ସେପଟେ କିନ୍ତୁ ଆଞ୍ଚଳିକ ବୈଷମ୍ୟ ଓ କୋସଲ ରାଜ୍ୟ ପ୍ରସଙ୍ଗ ଉଠିବାରୁ ମୁଖ୍ୟମନ୍ତ୍ରୀ ଭୟଭିତ ହୋଇପଡିଛନ୍ତି । ତାଙ୍କର ପ୍ରାର୍ଥିମାନେ ହାରିଯିବାର ଭୟ ରହିଛି ସେଥିପାଇଁ ସେ ନିଜେ ଆସି କଣ୍ଟାବାଞ୍ଜିରେ ଛିଡାହେବାକୁ ପଡୁଛି ବୋଲି କଂଗ୍ରେସର ବରିଷ୍ଠନେତା ନରସିଂହ ମିଶ୍ର କହିଛନ୍ତି । ପ୍ରକାଶ ଯେ, ବଲାଙ୍ଗୀର ଲୋକସଭା ନିର୍ବାଚନମଣ୍ଡଳିର ୭ଟି ବିଧାନସଭା କ୍ଷେତ୍ରରୁ ଏପର୍ଯ୍ୟନ୍ତ ୬ଟି ଆସନରେ ବିଜେଡି ପ୍ରାର୍ଥି ଘୋଷଣା କରିଥିଲା । କିନ୍ତୁ କଣ୍ଟାବାଞ୍ଜି ଆସନ ଝୁଲି ରହିଥିଲା । ଗତ କିଛିଦିନ ହେଲା କଂଗ୍ରେସରୁ ପ୍ରାର୍ଥି ହୋଇଥିବା ବିଧାୟକ ସନ୍ତୋଷସିଂ ସାଲୁଜା(କୁକୁସିଂ) କଂଗ୍ରେସ ଦଳ ଛାଡି ବିଜେଡିକୁ ଯିବେ ଓ ପ୍ରାର୍ଥି ହେବେ ବୋଲି ଶୁଣାଯାଉଥିଲା । କିନ୍ତୁ ଶେଷରେ ସେହି କଲ୍ପନାଜଲ୍ପନାର ଅନ୍ତ ହୋଇଯାଇଛି । ତେବେ ଚଳିତଥର ବିଜେଡିଦଳରୁ ପ୍ରାର୍ଥି ହେବାକୁ ଅନେକଗୁଡିଏ ଆଶାୟୀଥିଲେ । ପୂର୍ବତନ ବିଧାୟକ ଆୟୁବ ଖାନ,ଗତଥରର ବିଧାୟକପ୍ରାର୍ଥି ଅଜୟ ଦାସ,ଆଦିବାସୀ ନେତ୍ରୀ ନୀରୂପମା ମାଝୀ ପ୍ରମୁଖ ଦାବିଦାର ରହିଥିଲେ । ତେବେ ଗତ ୨୦୧୯ ନିର୍ବାଚନରେ ମାତ୍ର ୧୨୮ଟି  ଭୋଟରେ ହାରିଥିବା ଯାଦବ ନେତା ଲକ୍ଷ୍ମଣ ବାଗଙ୍କୁ ଚଳିତଥର ଭାଜପା ପୁଣିଥରେ ପ୍ରାର୍ଥି କରିଛି । ଚଳିତଥର କେନ୍ଦ୍ରସରକାର କଣ୍ଟାବାଞ୍ଜିଠାରେ ୨୪୪କୋଟି ଟଙ୍କାର ଏକ ରେଳୱାଗନ ମରାମତି କାରଖାନାର ଅନୁମୋଦନ କରାଇଛନ୍ତି । ସେହିପରି ରେଳବିଭାଗ କଣ୍ଟାବାଞ୍ଜି, ତୁରେକେଲା, ଲାଠୋର ଇତ୍ୟାଦି ରେଳ ଷ୍ଟେସନର ଉନ୍ନତି ମଧ୍ୟ କରାଇଛନ୍ତି । ତେଣୁ ଭାଜପା ସାଂସଦ ପ୍ରାର୍ଥି ସଂଗୀତାକୁମାରୀ ସିଂଦେଓ ଓ କଣ୍ଟାବାଞ୍ଜି ବିଧାୟକ ପ୍ରାର୍ଥି ଲକ୍ଷ୍ମଣ ବାଗଙ୍କ ପଲା ଭାରି ରହିଛି । ସେପଟେ କଂଗ୍ରେସଦଳରୁ ପ୍ରାର୍ଥି ହୋଇଥିବା ସନ୍ତୋଷସିଂ ସାଲୁଜା ଗତଥର ଅପେକ୍ଷା ଏଥର ଅଧିକ ମଜବୁତ ରହିଛନ୍ତି । ତାଙ୍କ ନିଜଭାଇ ବରିୟାମ ସିଂ ସାଲୁଜାଙ୍କୁ କଣ୍ଟାବାଞ୍ଜି ଏନଏସିର ଅଧ୍ୟକ୍ଷ କରିଥିବା ବେଳେ ବଙ୍ଗୋମୁଣ୍ଡା ଓ ତୁରେକେଲା ବ୍ଲକରେ ନିଜର ସମର୍ଥକଙ୍କୁ ଅଧ୍ୟକ୍ଷ ପଦରେ ବସାଇ ନିଜର ସ୍ଥିତିକୁ ମଜବୁତ କରିଛନ୍ତି । ସେଥିପାଇଁ କୁକୁ ସିଂ ପୁଣିଥରେ ବିଧାୟକ ଭାବରେ ଜିଣିପାରନ୍ତି ବୋଲି ଆକଳନ କରାଯାଉଥିଲା । କିନ୍ତୁ ଏବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ କଣ୍ଟାବାଞ୍ଜି ପ୍ରାର୍ଥି ହେବାପରେ ସମୀକରଣ ବଦଳିବ ବୋଲି କୁହାଯାଉଛି । ତେବେ ଦାଦନଗଡ ଭାବରେ ପରିଚିତ କଣ୍ଟାବାଞ୍ଜିରେ ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାର୍ଥି ହେଉଥିବାରୁ ଏବେ କଣ୍ଟାବାଞ୍ଜିର ଭାଗ୍ୟ ବଦଳିପାରେ ବୋଲି ଆଲୋଚନା ହେଉଛି ।