11-Apr-2024

ବାଲାଙ୍ଗୀର(ପ୍ରେରଣା ଖବର): ଦୀର୍ଘ ୩୫ବର୍ଷ ହେଲା ପ୍ରଥମେ ଜନତାଦଳ ଓ ପରେ ବିଜୁଜନତାଦଳରେ ରହିଆସିଥିବା ବରିଷ୍ଠନେତା ସରୋଜ ପାଣିଗ୍ରାହୀ ଓ ତାଙ୍କ ପତ୍ନୀ ଜ୍ୟୋତି ପାଣିଗ୍ରାହୀ ଆଜି ବିଜେଡିଦଳରୁ ଇସ୍ତଫା ଦେଇଛନ୍ତି । ସେମାନେ ଦଲର ସୁପ୍ରୀମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅନେକଥର ଭେଟିବାକୁ ଚେଷ୍ଟାକରି ବିଫଳ ହେବାପରେ ଦଳପ୍ରତି ବିମୁଖ ହୋଇ ଆଜି ବିଜେଡିଦଳ ତ୍ୟାଗ କରିଛନ୍ତି ବୋଲି ତାଙ୍କ ଇସ୍ତଫାପତ୍ରରେ ଉଲ୍ଲେଖ କରିଛନ୍ତି । ସରୋଜ ଓ ଜ୍ୟୋତି ବଲାଙ୍ଗୀର ନିର୍ବାଚନମଣ୍ଡଳି ଅନ୍ତର୍ଗତ ଚନ୍ଦନଭାଟି ଗ୍ରାମର ମୂଳବାସିନ୍ଦା । ସରୋଜ ପାଣିଗ୍ରାହୀ ପୂର୍ବରୁ କାଜୁନିଗମର ଅଧ୍ୟକ୍ଷ ଥିଲେ । ସେହିପରି ଜ୍ୟୋତି ପାଣିଗ୍ରାହୀ ୧୯୯୫ ମସିହାରେ ବିଜୁ ପଟ୍ଟନାୟକଙ୍କ ଡାକରାରେ ଅଧ୍ୟାପିକା ଚାକିରି ଛାଡି ଆସି ଲୋଇସିଂହା ନିର୍ବାଚନମଣ୍ଡଳିରେ ଜନତାଦଳର ବିଧାୟିକା ପ୍ରାର୍ଥିନୀ ହୋଇଥିଲେ । ପରେ ବିଜେଡିଦଳରେ ନବୀନ ପଟ୍ଟନାୟକଙ୍କ ସହିତ ରହି ଦଳୀୟ ପଦପଦବୀରେ ରହି ସଂଗଠନ କରିଥିଲେ । ଜ୍ୟୋତି ପାଣିଗ୍ରାହୀ ପୂର୍ବରୁ ଥରେ ରାଜ୍ୟ ମହିଳା କମିଶନର ଅଧ୍ୟକ୍ଷା ମଧ୍ୟ ରହିଥିଲେ । ଏବେ ସେ ବିଜୁମହିଳା ଜନତାଦଳର ରାଜ୍ୟ ଉପସଭାପତି ରହିଥିଲେ । ସେ ଚଳିତ ୨୦୨୪ ନିର୍ବାଚନରେ ବଲାଙ୍ଗୀର ସଂସଦୀୟ କ୍ଷେତ୍ରରୁ ସାଂସଦପ୍ରାର୍ଥି ହେବାକୁ ଆଶାୟୀ ଥିଲେ । କିନ୍ତୁ ସେ ଟିକାଟ ପାଇବା ଦୂରର କଥା ଦଳୀୟ ସୁପ୍ରୀମୋଙ୍କୁ ଭେଟିବାକୁ ଚାହିଥିଲେ ମଧ୍ୟ ତାଙ୍କୁ ସେହି ସୁଯୋଗ ମଧ୍ୟ ମିଳିଲା ନାହିଁ । ତେଣୁ ଏହାକୁ ପ୍ରତିବାଦ କରି ପାଣିଗ୍ରାହୀ ଦମ୍ପତ୍ତି ବିଜେଡି ଛାଡିଛନ୍ତି । ଉଭୟେ କିଛିଦିନ ମଧ୍ୟରେ ଭାଜପାଦଳରେ ଯୋଗଦେବେ ବୋଲି ଆଲୋଚନା ହେଉଛି । 
   ସେପଟେ ତାଙ୍କ ପରିବାରରୁ ସରୋଜଙ୍କ ଭାଇ ସୁକାନ୍ତ ପାଣିଗ୍ରାହୀ ଓ ଟିଟିଲାଗଡରେ ରହୁଥିବା ପୁରୁରା ବିକାଶ ପାଣିଗ୍ରାହୀ ଚଳିତବର୍ଷ ବିଜେଡିରେ ଯୋଗଦେଇଛନ୍ତି । ସୁକାନ୍ତ ତାଙ୍କ ଚାକିରିରୁ ସ୍ୱେଚ୍ଛାକୃତ ଅବସର ନେଇ ବିଜେଡିଦଳରେ ଯୋଗଦେଇଛନ୍ତି । ଠିକ ସେହିପରି ବିକାଶ ପାଣିଗ୍ରାହୀ ଟିଟିଲାଗଡ ବ୍ଲକ କଗ୍ରେସ ସଭାପତି ଥିଲେ ଓ ଏବେ କିଛିଦିନ ତଳେ ଟିଟିଲାଗଡର ପୂର୍ବତନ ବିଧାୟକ ସୁରେନ୍ଦ୍ର ସିଂଭୋଇଙ୍କ ସାଙ୍ଗରେ ବିଜେଡିରେ ଯୋଗଦେଇଛନ୍ତି ।