29-Mar-2024

କଣ୍ଟାମାଲ: ଜାତୀୟ ନିର୍ବାଚନ କମିଶନ ସମଗ୍ର ଦେଶରେ ସଧାରଣ ନିର୍ବାଚନ ନିମନ୍ତେ ଆଚରଣ ବିଧି ଲାଗୁ କରିଛନ୍ତି । ଏହି ନିୟମକୁ କଡା କଡି ପାଳନ କରିବା ପାଇଁ ସମସ୍ତ ରାଜ୍ୟ କମିଶନର ମାନଙ୍କୁ ନିର୍ଦ୍ଦେଶ ଜାରି କରିଛନ୍ତି l କିନ୍ତୁ ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଅଞ୍ଚଳରେ ଖୋଲାଖୋଲି ଭାବେ ନିର୍ବାଚନ ଆଚରଣ ବିଧି ଉଲଂଘନ କରା ଯାଉଥିବା ଦେଖିବାକୁ ମିଳିଛି । ସୂଚନାମତେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଖୁଣ୍ଟିଗୋରା-ଜାମୁଟ ରାସ୍ତା ନିର୍ମାଣ କାର୍ଯ୍ୟ କରା ଯାଇଛି । ମାତ୍ର ଉକ୍ତ ରାସ୍ତାର କାର୍ଯ୍ୟ ସମ୍ପୂର୍ଣ୍ଣ ହେବାପରେ ଦେଓଗାଁ ଛକ ନିକଟରେ ସମ୍ପୃକ୍ତ ବିଭାଗ ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫଟୋ ସହ ଏକ ସରକାରୀ ବିଜ୍ଞାପନ ଲଗା ଯାଇଛି । ନିର୍ବାଚନ କମିଶନଙ୍କ ନିୟମ ଅନୁସାରେ ସାରା ରାଜ୍ୟରେ ନିର୍ବାଚନ ଆଚରଣ ବିଧି କାର୍ଯ୍ୟକାରୀ ହେବା ପରଠାରୁ ଯାହା ସାଧାରଣ ଭୋଟର ମାନଙ୍କୁ ପ୍ରଭାବିତ କରିବା ଭଳି କୌଣସି ପ୍ରକାର ସରକାରୀ ବିଜ୍ଞାପନ ଲାଗି ପାରିବ ନାହିଁ । ଯଦି ପୂର୍ବରୁ

ଏଭଳି ଵିଜ୍ଞାପନ କୌଣସି ସ୍ଥାନରେ ଲଗା ଯାଇଛି ସେଗୁଡ଼ିକୁ କାଢ଼ି ଦେବାପାଇଁ ନିର୍ବାଚନ କମିଶନ ନିର୍ଦ୍ଦେଶ ଦେଇଛନ୍ତି । କିନ୍ତୁ ବିଭାଗୀୟ ଅଧିକାରୀ ମାନେ ରାଜ୍ୟ ନିର୍ବାଚନ କମିଶନଙ୍କ ନିର୍ଦ୍ଦେଶନାମାକୁ ସମ୍ପୂର୍ଣ୍ଣ ଭାବେ ଉଲଂଘନ କରି ରାସ୍ତା ମାନଙ୍କରେ ଲଗା ଯାଇଥିବା ସରକାରୀ ବିଜ୍ଞାପନ ଉପରେ କୌଣସି ପ୍ରକାର ଗୁରୁତ୍ୱ ନଦେଇ ଅବହେଳା ପ୍ରଦର୍ଶନ କରୁଥିବା ଅଭିଯୋଗ ହେଉଛି । ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତେଣୁ ଯଥାଶୀଘ୍ର ଜିଲ୍ଲା ନିର୍ବାଚନ ଅଧିକାରୀ ଏଥିପ୍ରତି ଉଚିତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି ।