21-Dec-2020

ମେଣ୍ଡା,(ପ୍ରେରଣା ଖବର)-ବଲାଙ୍ଗୀର ଓ ସୋନପୁର ଜିଲ୍ଲାର ସୀମାରେ ଲାଗିରହିଥିବା ବାରପାହାଡ ରିଜର୍ଭ ଜଙ୍ଗଲରୁ ଏକ ଛୋଟହାତୀର ମୃତଦେହକୁ ଆଜି ଜଙ୍ଗଲବିଭାଗ ଉଦ୍ଧାର କରିଛି । ହାତୀଟିର ବୟସ ଦୁଇବର୍ଷ ହେବ ବୋଲି ଅନୁମାନ କରାଯାଉଛି । ଗତକାଲି ରାଜପାଲି ଗ୍ରାମର କିଛି ଯୁବକ ଜଙ୍ଗଲକୁ ଭୋଜି କରିବାକୁ ଯାଇଥିବା ବେଳେ ହାତୀ ଶବରୁ ଗନ୍ଧ ବାହାରୁଥିଲା । ସେମାନେ ଏନେଇ ତିଲେଇମାଲ ଫରେଷ୍ଟରକୁ ଖବର ଦେଇଥିଲେ । ତିଲେଇମାଲ ଫରେଷ୍ଟର ଅଜୟ ବାରା ସଦଳବଳେ ପହଞ୍ଚି ବାରପାହାଡ ଦେବୀଙ୍କ ଗୁମ୍ଫାର ଉପରପଟେ ପଡିଥିବା ହାତୀର ଶବକୁ ଉଦ୍ଧାର କରିଥିଲେ । ପରେ ଫରେଷ୍ଟରଙ୍କଠାରୁ ଖବର ପାଇ ସୋନପୁର ଏସିଏଫ ପ୍ରଫୁଲ୍ଲ ଧରୁଆ,ରେଞ୍ଜର,ମେଣ୍ଡା ଫାଣ୍ଡି ଅଧିକାରୀ ଓ ସିଡିଭିଓ ପହଞ୍ଚି ତଦନ୍ତ ଆରମ୍ଭ କରିଥିଲେ । ତେବେ ମୃତ୍ୟୁର କାରଣ ସ୍ପଷ୍ଟ ହୋଇନଥିଲେ ହେଁ ହାତୀପଲ ଗତ ଦୁଇଦିନ ହେଲା ଡୁଙ୍ଗୁରିପାଲି ଥାନା ଅଞ୍ଚଳର ଡୁମେରଖୋଲ ଅଞ୍ଚଳରେ ରହୁଥିଲେ । ଡୁମେରଖୋଲ ଗ୍ରାମର କିଛିଲୋକ ଜଙ୍ଗଲଭିତରେ ବେଆଇନ ମଦ ରାନ୍ଧୁଛନ୍ତି । ସେଥିପାଇଁ ଝରଣା ପାଖରେ ମହୁଲ ପୋଚ ରଖିଥିବା ଓ ତାକୁ ହାତୀ ଖାଇଥିବା କୁହାଯାଉଛି । ଫଲରେ ଫୁଡ ପଏଜନିଂ ହୋଇ ହାତୀର ମୃତ୍ୟୁ ହୋଇଥିବା ସନ୍ଦେହ କରାଯାଉଛି । କିନ୍ତୁ ଶବର ପୋଷ୍ଟମର୍ଟମ ପରେ ମୃତ୍ୟୁର କାରଣ ଜଣାପଡିବ ବୋଲି ଏସିଏଫ ଶ୍ରୀ ଧରୁଆ କହିଛନ୍ତି । ପ୍ରକାଶ୍ୟ ଯେ,ସୋନପୁର ରେଞ୍ଜ ଅନ୍ତର୍ଗତ ବାରପାହାଡ ଜଙ୍ଗଲରେ ଗତ ୨୫ବର୍ଷ ହେଲା ଏକ ୩୦ଟିକିଆ ହାତୀପଲ ରହି ଆସୁଛନ୍ତି । ସେମାନେ ତରଭସ ଥାନା,ଡୁଙ୍ଗୁରିପାଲି ଥାନା ଓ ବିନିକା ଥାନା ଅଞ୍ଚଳରେ ବ୍ୟାପକମାତ୍ରାରେ ଚାଷିଙ୍କର ଫସଲ ନଷ୍ଟ କରୁଛନ୍ତି । ବିଭିନ୍ନ ସମୟରେ ଗାଁକୁ ପଶି ଧନଜୀବନ ନଷ୍ଟ କରୁଛନ୍ତି । ପୂର୍ବରୁ ମଧ୍ୟ ଡାହିମାଲ ଓ କନ୍ଧପାଲିରେ ଦୁଇଟି ହାତୀର ମୃତ୍ୟୁ ହୋଇସାରିଛି । ଧାନ ଫସଲ ଅମଳ ସମୟରେ ଲୋକଙ୍କ ମଧ୍ୟରେ ହାତୀ ଭୟ ରହୁଛି ।