03-Feb-2024

କଳାହାଣ୍ଡି,କୋକସରା
(ତ୍ରିନାଥ ବେଶ୍ରା )
କଳାହାଣ୍ଡି ଜିଲ୍ଲା କୋକସରା ବ୍ଲକ ଅନ୍ତର୍ଗତ ବଡ଼ପୋଡ଼ାଗୁଡ଼ା ଗ୍ରାମରେ ସୋଲାର ପାନୀୟଜଳ ଅଚଳ ହୋଇ ପଡ଼ିଛି । ଗ୍ରାମବାସୀମାନେ ପାଣି ବୁନ୍ଦାଏ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସରକାର ପାନୀୟଜଳ ନିମନ୍ତେ ବସୁଧା ଯୋଜନା, ସୋଲାର ଜଳ ପ୍ରକଳ୍ପ ଗାଁ ଗାଁରେ ଏହି ଯୋଜନା କାର୍ଯ୍ୟକାରୀ ହେଉଅଛି କିନ୍ତୁ ଦୁଃଖର ବିଷୟ ଆଜି ପର୍ଯ୍ୟନ୍ତ ଏହି ଯୋଜନା ଗ୍ରାମ ଗୁଡିକରେ କାର୍ଯ୍ୟକାରୀ ହୋଇଥିଲେ ସୁଦ୍ଧା ଏହାର ତତ୍ତ୍ଵାବଧାନ କରାଯାଉ ନାହିଁ ଯାହାଦ୍ୱାରା ଏହିପରି ସମସ୍ୟା ଗୁଡିକ ଦେଖା ଯାଉଛି । ଉକ୍ତ ଗ୍ରାମରେ 1500 ସହ ରୁ ଉର୍ଦ୍ଧ୍ବ ଲୋକ ବସବାସ କରୁଥିବା ବେଳେ ପାଖରେ କୌଣସି ପୋଖରୀ କିମ୍ବା ନଦୀ ନାହିଁ ଏବଂ ଗ୍ରାମବାସୀମାନେ ଗାଧୋଇବା,ପିଇବା ପାଣି ପାଇଁ କେବଳ ନଳକୂପ ରେ ହିଁ ନିର୍ଭର କରିଥାନ୍ତି।ଏହିପରି ପରିସ୍ଥିତିରେ ସରକାରଙ୍କ ତରଫରୁ ସୋଲାର ପାଣି ଟ୍ୟାଙ୍କ୍ ଲଗାଯାଇଥିଲା କିନ୍ତୁ ଦୁଃଖର ବିଷୟ 2 ମାସ ସୋଲାର ଜଳ ପ୍ରକଳ୍ପ ଚାଲିବା ପରେ ଆଜି ପର୍ଯ୍ୟନ୍ତ ଏହା ଅଚଳ ଅବସ୍ଥାରେ ପଡ଼ି ରହିଛି। ଗ୍ରାମବାସୀ ମାନଙ୍କ ସୂଚନା ଅନୁଯାୟୀ ପଞ୍ଚାୟତ କର୍ତ୍ତୃପକ୍ଷ କିମ୍ବା ପ୍ରଶାସନ ଏ ଦିଗରେ କିଛି ବି ପଦକ୍ଷେପ ନିଆଯାଇନାହିଁ। ନାଗରିକ ବିକାଶ ସଂଗଠନର କର୍ମକର୍ତ୍ତାମାନେ ଏକ ସର୍ଭେ ଦ୍ଵାରା ଉକ୍ତ ସମସ୍ୟାକୁ ଆଗକୁ ଆଣିଥିଲେ ଏବଂ ଆମ୍ଭ ପ୍ରତିନିଧିଙ୍କୁ ଜଣାଇଥିଲେ । ଆମ୍ଭ ପ୍ରତିନିଧି ଖବର ପାଇବା ପରେ ଉକ୍ତ ଗ୍ରାମ କୁ ଯାଇ ଗ୍ରାମବାସୀମାନଙ୍କୁ ପଚାରି ବୁଝିଥିଲେ ଏବଂ ଏହାର ତଦନ୍ତ କରି ଜାଣିପାରି ଥିଲେ ଯେ ପ୍ରକୃତରେ ଗ୍ରାମବାସୀମାନେ ପାଣି ପାଇଁ ହନ୍ତସନ୍ତ ହେଉଛନ୍ତି। ପାଣି ପାଇଁ ସେମାନଙ୍କ ଗାଁରେ ନଳକୂପ ଛଡା କୌଣସି ବିକଳ୍ପ ବ୍ୟବସ୍ଥା ନାହିଁ।ତେଣୁ ପ୍ରଶାସନ ଏ ଦିଗରେ ଦୃଷ୍ଟି ଦେଇ ତୁରନ୍ତ ଏହାର ପଦକ୍ଷେପ ନେବା ନିମନ୍ତେ ଗ୍ରାମବାସୀମାନେ ସରକାରଙ୍କୁ ନିବେଦନ କରିଥିଲେ।