30-Jan-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ.କଣ୍ଟାମାଳ ବ୍ଲକ ଘଣ୍ଟାପଡା ଥାନା ଅନ୍ତର୍ଗତ ୪୧ ନମ୍ବର ରାଜ୍ୟ ରାଜପଥର ସିନ୍ଧୁଗୋରା(ଟିକ୍ରାପଡା) ରାସ୍ତାରେ ଏକ ଅଜଣା ଗାଡି ଧକ୍କାରେ ଜଣେ ବୃଦ୍ଧାଙ୍କ ମୃତ୍ୟୁ ହୋଇଛି । ଏହାର ପ୍ରତିବାଦରେ ଅଞ୍ଚଳବାସୀ ମଙ୍ଗଳବାର ଅପରାହ୍ନ ୩ଟାରୁ ରାସ୍ତାରେ ଶବ ରଖି ରାଜ୍ୟ ରାଜପଥକୁ ଅବରୋଧ କରି ମୃତକଙ୍କ ପରିବାରବର୍ଗଙ୍କୁ ୨୦ଲକ୍ଷ ଟଙ୍କା କ୍ଷତିପୁରଣ ସହାୟତା ପ୍ରଦାନ କରିବାକୁ ଦାବି କରିଥିଲେ । ଆନ୍ଦୋଳନ ସ୍ଥଳରେ କଣ୍ଟାମାଳ ତହସିଲଦାର ଶ୍ବେତପଦ୍ମା ଯୋଶୀ, ଖୁଣ୍ଟିଗୋରା ଆରଆଇ ଭୀଷ୍ମ ନାଗ ପହଞ୍ଚି ଅାନ୍ଦୋଳନକାରୀଙ୍କୁ ବୁଝାସୁଝା କରିବା ସହ ମୃତକଙ୍କ ପରିବାରବର୍ଗଙ୍କୁ ରେଡକ୍ରସ ପାଣ୍ଠିରୁ ୧୦ ହଜାର ଟଙ୍କା ଦେବାପରେ ସନ୍ଧ୍ୟା ୬.୧୦ରେ ଅାନ୍ଦୋଳନ ପ୍ରତ୍ୟାହୃତ ହୋଇଥିଲା । ତେବେ ରାସ୍ତା ଅବରୋଧ ଯୋଗୁ ଉଭୟ ପାର୍ଶ୍ବରେ ବହୁ ସଂଖ୍ୟାରେ ଗାଡିମଟର ପ୍ରାୟ ୩ ଘଣ୍ଟା ଧରି ଅଟକି ରହିଥିଲା । ଫଳରେ ଲୋକେ ଯାତାୟତରେ ଅସୁବିଧାର ସମ୍ମୁଖୀନ ହୋଇଥିଲେ l ଶାନ୍ତିଶୃଙ୍ଖଳା ରକ୍ଷା ପାଇଁ ଘଣ୍ଟାପଡା ଥାନାଧିକାରୀ ବଳଭଦ୍ର ଗଣ୍ଡାଙ୍କ ନେତୃତ୍ୱରେ ଏସଆଇ ବିଶ୍ଵାମିତ୍ର ଲୋଇ, ପୋଲିସ ଦଳ ଏବଂ ସୁରକ୍ଷା ବଳ ଘଟଣାସ୍ଥଳରେ ଉପସ୍ଥିତଥିଲେ । ସୂଚନାଯୋଗ୍ୟ ଯେ ପ୍ରତିମାଳ ଗ୍ରାମର ମୃତକ ସମାରୀ ସାହୁ(୭୦) ତାଙ୍କ ଝିଅ ଘର ସିନ୍ଧୁଗୋରା (ଟିକ୍ରାପଡା) ଗ୍ରାମକୁ ଅାସିଥିଲେ l ରବିବାର ରାତି ପ୍ରାୟ ଘ.୧୦.୧୫ମି. ସମୟରେ ଏକ ଅଜଣା କାର ତାଙ୍କୁ ଘର ସାମ୍ନାରେ ଧକ୍କା ଦେଇଥିଲା । ମାଙ୍କୁ ସହାୟତା ପାଇଁ ଚେଷ୍ଟା କରିବାରୁ ଝିଅ ଶୈଳଙ୍କୁ ମଧ୍ୟ ଉକ୍ତ କାର ଧକ୍କା ଦେବାରୁ ସେ ଗୁରୁତର ଅାହତ ହୋଇଥିଲେ । ଉଭୟ ମା ଓ ଝିଅଙ୍କୁ ସ୍ଥାନୀୟ ଲୋକେ ଉଦ୍ଧାର କରି ପ୍ରଥମେ କଣ୍ଟାମାଳ ଓ ପରେ ବଲାଙ୍ଗୀର ଡାକ୍ତରଖାନାକୁ ସ୍ଥାନାନ୍ତର କରିଥିଲେ । ବଲାଙ୍ଗୀର ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ସମାରିଙ୍କ ମୃତ୍ୟୁ ହୋଇଥିଲା । ଶବ ବ୍ୟବଚ୍ଛେଦ ପରେ ଗାଁ ମଶାଣୀରେ ଅନ୍ତିମ ସଂସ୍କାର କରାଯାଇଛି l ପୁଅ ଉଛବ ସାହୁ ମୁଖାଗ୍ନି ଦେଇଥିଲେ l ଝିଅ ଶୈଳଙ୍କ ଅବସ୍ଥା ସଙ୍କଟାପନ୍ନ ହେବାରୁ ବଲାଙ୍ଗୀରରୁ ବୁର୍ଲା ଓ ପରେ ଭୁବନେଶ୍ବର ସ୍ଥିତ ଏକ ଘରୋଇ ଡାକ୍ତରଖାନାରେ ଚିକିତ୍ସା କରାଯାଉଛି । କାର ଡ୍ରାଇଭର ଫେରାର ହୋଇଥିବା ସୂଚନା ମିଳିଛି । ଗାଡିକୁ ଚିହ୍ନଟ କରି ଡ୍ରାଇଭରଙ୍କ ନାମରେ ମାମଲା ରୁଜୁ କରିବାକୁ ଘଣ୍ଟାପଡ଼ା ଥାନାରେ ପୁଅ ଉଛବ ଲିଖିତ ଅଭିଯୋଗ କରିଛନ୍ତି । ପୋଲିସ ମାମଲା ରୁଜୁ କରି ତଦନ୍ତ ଚଳାଇଥିବା ଘଣ୍ଟାପଡ଼ା ଥାନାଧିକାରୀ ଶ୍ରୀ ଗଣ୍ଡା ସୂଚନା ଦେଇଛନ୍ତି l