06-Jan-2024

ସୋନପୁର(ମନୋରଞ୍ଜନ ତ୍ରିପାଠୀ ): ବହୁ ପ୍ରତିକ୍ଷିତ ସୁବର୍ଣ୍ଣପୁର ଜିଲ୍ଲାର  ଲୋକ ମହୋତ୍ସବ-୨୦୨୪ ପାଇଁ ଆଜି ସକାଳ ୧୦ଟାରେ ଇଷ୍ଟଦେବୀ ମାଁ ସୁରେଶ୍ବରୀଙ୍କ ପାଖରୁ ଏକ ମଶାଲ ଶୋଭାଯାତ୍ରା ଏକ ସାଂସ୍କୃତିକ ଶୋଭାଯାତ୍ରା ଆୟୋଜିତ ହୋଇ ଯାଇଛି। ଜିଲ୍ଲାପାଳ ବିମଳେନ୍ଦୁ ରାଏ ଅତିରିକ୍ତ ଜିଲ୍ଲାପାଳ ସୂର୍ଯ୍ୟ ନାରାୟଣ ଦାସଙ୍କ ନେତୃତ୍ୱରେ ଦେବୀ ମା ସୁରେଶ୍ୱରୀଙ୍କ ପୀଠରୁ ଏହି ବର୍ଣ୍ଣାଢ୍ୟ ସାଂସ୍କୃତିକ ଶୋଭାଯାତ୍ରା ସହର

ପରିକ୍ରମା କରି ରାମେଶ୍ଵର ଷ୍ଟାଡିୟମରେ ପହଞ୍ଚିଥିଲା।ଏହି ଶୋଭାଯାତ୍ରାରେ ଏଡିଏମ ଅଞ୍ଜଳିନl ପଧାନ, ଜିଲ୍ଲା ପରିଷଦ ଅଧିକାରୀ ଅଶ୍ୱିନୀ ମେହେର, ପିଡି ଡୂଡ଼ା ବିଶ୍ବ ନାଥ ବାରିକ୍, ଉପ ଜିଲ୍ଲାପାଳ ଇପ୍ସିତା ପ୍ରିୟ ଦର୍ଶନି ମିଶ୍ର,  ସୁଚନା ଲୋକ ସମ୍ପର୍କ ଅଧିକାରୀ ଅଶ୍ୱିନୀ ଭୋଇ, ସାଂସ୍କୃତିକ କମିଟି ସଭ୍ୟ ଗଦାଧର ବାରିକ୍, ଲଡୁ କିଶୋର ମଲ୍ଲିକ, ଗୋବିନ୍ଦ ମହାନା, ଶେଷ ଦେବ ମେହେର, ପ୍ରମୁଖଙ୍କ ସମେତ ଜିଲ୍ଲାର ଜିଲ୍ଲା ସ୍ତରୀୟ ଅଧିକାରୀ ,ସରକାରୀ କର୍ମଚାରୀ, ସଂସ୍କୃତିପ୍ରେମୀ, ମିଡ଼ିଆ, ବୁଦ୍ଧିଜୀବୀଙ୍କ ସମେତ ଶହ ଶହ କଳାକାର, ସାମାଜିକ ଅନୁଷ୍ଠାନ ସାମିଲ ହୋଇଥିଲେ।କଳାକାର ମାନେ ଶୋଭାଯାତ୍ରା ସମୟରେ ବିଭିନ୍ନ ସାଂସ୍କୃତିକ ଦଳ ନିଜ ନିଜର ଲୋକ ନୃତ୍ୟ ପରିବେଷଣ କରିଥିଲେ। ଦେବୀ ମା ସୁରେଶ୍ୱରୀଙ୍କ ପାଖରେ ପୂଜା ଆରାଧନା କରାଯିବା ପରେ ମହୋତ୍ସବର ମଶାଲ ଶୋଭାଯାତ୍ରା  ବାହାରିଥିଲା। ଅତିରିକ୍ତ ଜିଲ୍ଲାପାଳ ସୂର୍ଯ୍ୟ ନାରାୟଣ ଦାଶ ମଶାଲ ଧରି ଏହି ସାଂସ୍କୃତିକ ଶୋଭାଯାତ୍ରାରେ ସହର ପରିକ୍ରମା କରିଥିଲେ। ମଶାଲ ମିନି ଷ୍ଟାଡିୟମରେ ପହଂଚିବା ପରେ ମଞ୍ଚ ପୂଜା କରାଯାଇ ମହୋତ୍ସବର ମଶାଲକୁ ଦେବୀଙ୍କ ପ୍ରତିକୃତି ତଳେ ପ୍ରତିଷ୍ଠା କରାଯାଇଥିଲା।
ଜିଲ୍ଲା ସଂସ୍କୃତି ପରିଷଦ ,ଓଡିଶା ଭାଷା ,ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଆୟୋଜିତ ଏହି ମହୋତ୍ସବ ପାଞ୍ଚ ଦିନ ଧରି ଚାଲିବ । ଆଜି ସନ୍ଧ୍ୟାରେ ମିନି ଷ୍ଟାଡିୟମରେ ଏହି ଲୋକ ମହୋତ୍ସବ ଉଦଘାଟିତ ହେବ।ଏହି ମହୋତ୍ସବ ପାଇଁ ବ୍ୟାପକ ଆୟୋଜନ କରାଯାଇଛି।ଜିଲ୍ଲାର ପ୍ରମୁଖ ସାଂସ୍କୃତିକ ଅନୁଷ୍ଠାନ ଗୁଡିକ ପାଞ୍ଚ ଦିନ ବ୍ୟାପି ନିଜ ନିଜର ଲୋକ ନୃତ୍ୟ ପରିବେଷଣ କରିବାର ସୁଯୋଗ ପାଇବେ। ସେହିପରି ଏହି ସାଂସ୍କୃତିକ ମହାପାର୍ବଣରେ ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାର ଲୋକ ନୃତ୍ୟ ସହିତ ରାଜ୍ୟ ତଥା ବିଭିନ୍ନ ରାଜ୍ୟ ର ବିଭିନ୍ନ ଅଞ୍ଚଳରୁ ଅନେକ ସାଂସ୍କୃତିକ ଦଳ ଏଥିରେ ସାମିଲ ହୋଇ ନିଜ ନିଜର ଲୋକ ନୃତ୍ୟ ପରିବେଷଣ କରିବାର  ସୁଯୋଗ ପାଇ ପାରିବେ l