06-Jan-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ ): ବୌଦ୍ଧ ଜିଲ୍ଲା କଣ୍ଟାମାଳ ରେଞ୍ଜ ଅନ୍ତର୍ଗତ ବରଗାଁ ସେକସନର ଲୁଇସିଂ ଗ୍ରାମରୁ ଗୁରୁବାର ରାତିରେ କାବୁ କରିଥିବା ପଟକିଆ ଦନ୍ତାହାତୀକୁ ଶୁକ୍ରବାର ଏକ ହାଇୱା ଗାଡିରେ ଜୟ ଜଗନ୍ନାଥ ନାରାଦେଇ କପିଳାସ ପଠାଇଲା ବନବିଭାଗ । ପ୍ରକାଶଯୋଗ୍ୟ ଯେ ପଟକିଆ ଦନ୍ତାହାତୀଟି ନୂଆ ବର୍ଷରୁ କଣ୍ଟାମାଳ ବନାଞ୍ଚଳକୁ ଆସି ଗାଁ ଗାଁ ଭିତରେ ପଶି ଘରଦ୍ଵାର ଭାଙ୍ଗି ଧାନ, ଚାଉଳ ଆଦି ଅନେକ ଶସ୍ୟ ତଥା ର୍ଗା ଭିତରେ ଥିବା ବାଡି ବଗିଚାରେ ପଶି ଅନେକ ଗଛ ଭାଙ୍ଗି ନଷ୍ଟ କରୁଥିଲା। ଏପରି ଅବସ୍ଥାରେ କଣ୍ଟାମାଳ ପଞ୍ଚାୟତର ଉଦେପୁର ଗ୍ରାମରେ ହାତୀଟି ପଶି ଅନେକ ଘର ଦ୍ଵାର ଭାଙ୍ଗି ଫସଲ କ୍ଷତି କରିଥିବା ପ୍ରତିବାଦରେ ଉତ୍ୟକ୍ତ ଗ୍ରାମବାସୀ ଉଦେପୁର-ତିଲିକାମାଲ ରାସ୍ତାକୁ ଦୀର୍ଘ ୭ ଘଣ୍ଟା ପର୍ଯ୍ୟନ୍ତ ରାସ୍ତା ଅବରୋଧ କରିଥିଲେ। ଆନ୍ଦୋଳନକାରୀଙ୍କ ସହ ଡିଏଫଓଙ୍କ ହାତୀକୁ ଧରି ଅନ୍ୟତ୍ର ପଠାଇବାର ପ୍ରତିଶୃତି ଦେଇଥିଲେ। ଫଳରେ ବନ ବିଭାଗର ସମସ୍ତ ଅଧିକାରୀ ଓ କର୍ମଚାରୀଙ୍କ ନିଦ ହଜେଇ ଦେଇଥିଲା ଉକ୍ତ ଦନ୍ତାହାତୀ । ଶେଷରେ ଟ୍ରାଙ୍ଗୁଲାଇଜିଙ୍ଗ କରି ଗୁରୁବାର ରାତିରେ କାବୁ କରି ଲୁଇସିଂ ଗ୍ରାମର ଏକ ଆମ୍ବ ଗଛରେ ଲୁହା ଶିକୁଳିରେ ବାନ୍ଧି ରଖିଥିଲେ। ଶୁକ୍ରବାର ହାତୀ ଧରାଳିଙ୍କ ସହାୟତାରେ ଏକ ହାଇୱା ଗାଡ଼ିରେ କପିଳାସର ପ୍ରାଣୀ ଉଦ୍ୟାନକୁ ପଠାଇଥିଲେ। ଉକ୍ତ ଅପରେସନରେ ବିଭାଗୀୟ ଡିଏଫଓ ଦେବପ୍ରିୟ କମ୍ପଙ୍କ ନେତୃତ୍ଵରେ ଏସିଏଫ ଆଶିଷ କହଁର, କଣ୍ଟାମାଳ ଭାରପ୍ରାପ୍ତ ରେଞ୍ଜ ଅଫିସର ତଥା ଏସିଏଫ କ୍ଷୀରାବ୍ଧି ପ୍ରଧାନ, ଫରେଷ୍ଟର ଚିତ୍ତରଂଜନ ପ୍ରଧାନ,ରବିନ୍ଦ୍ର କୁମ୍ଭାରଙ୍କ ସହ ରେଞ୍ଜ ଅଧିନ ସମସ୍ତ କର୍ମଚାରୀ ଏବଂ ସୁରକ୍ଷା ଦୃଷ୍ଟିରୁ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ କଣ୍ଟାମାଳ ଥାନାଧିକାରୀ ଗୋପୀନାଥ ପ୍ରଧାନଙ୍କ ନେତୃତ୍ଵରେ ସମସ୍ତ ପୋଲିସ କର୍ମଚାରୀ, ଆଇଆରବି ଯବାନ ଓ ଗ୍ରାମବାସୀ ସହଯୋଗ କରିଥିଲେ।