27-Dec-2023

ବଲାଙ୍ଗୀର(ଚିତ୍ରସେନ ବେହେରା)-କୋସଲବାଦୀ ନେତା ତଥା ଖପ୍ରାଖୋଲ ବ୍ଲକସରପଞ୍ଚସଂଘର ସଭାପତି ସୁଶୀଳ ଗୁରୁ ହରିଶଙ୍କର ପର୍ଯ୍ୟଟନସ୍ଥଳିରେ ହେଉଥିବା ନିମ୍ନମାନର କାମକୁ ପ୍ରତିବାଦ କରିବାରୁ କଣ୍ଟାବାଞ୍ଜି ପୂର୍ତ୍ତବିଭାଗର ଏସଡିଓ ସିଦ୍ଧାର୍ଥ ଦାସ ମାଡମାରିଛନ୍ତି । ଏହି ଘଟଣାକୁ ନେଇ ବଲାଙ୍ଗୀର ଜିଲ୍ଲାରେ ତୀବ୍ର ପ୍ରତିକ୍ରୀୟା ପ୍ରକାଶ ପାଇଛି । ଜଣେ ନିର୍ବାଚିତ ପ୍ରତିନିଧି ତଥା ଦେବୋତ୍ତର କମିଟିର ସଭ୍ୟଙ୍କୁ ପୂର୍ତ୍ତବିଭାଗର ଏସଡିଓ ମାଡମାରିବା ଘଟଣାକୁ ବିଭିନ୍ନ ମହଲରେ ନୀନ୍ଦା କରାଯାଇଛି । କୋସଲବାଦୀନେତା ପ୍ରମୋଦ ମିଶ୍ର ଘଟଣାକୁ ନୀନ୍ଦା କରିବା ସହିତ ହରିଶଙ୍କରପୀଠର ଉନ୍ନୟନକାମରେ ହୋଇଥିବା ଦୁର୍ନିତୀର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି । ସେହିପରି ଜିଲ୍ଲା ସରପଞ୍ଚ ସଂଘର ସଭାପତି ବୀରବର ସାହୁ ମଧ୍ୟ ଘଟଣାକୁ ନୀନ୍ଦା କରି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି । ତେବେ ଏହି ଘଟଣାକୁ କୋସଲରାଜ୍ୟ ମୁକ୍ତିମୋର୍ଚ୍ଚା ଗୁରୁତର ସହିତ ନେଇଛି । ଜଣେ ସରକାରୀ କର୍ମଚାରୀ ତଥା ଉପକୂଳ ଅଞ୍ଚଳର ବ୍ୟକ୍ତି କିଭଳି ଭାବରେ ଜଣେ ନିର୍ବାଚିତ ପ୍ରତିନିଧି ସୁଶୀଳ ଗୁରୁଙ୍କୁ ଆକ୍ରମଣ କଲା ତାହାକୁ ତୀବ୍ରନିନ୍ଦା କରିବା ସହିତ ଆଜି ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି । କୋସଲରାଜ୍ୟ ମୁକ୍ତିମୋର୍ଚ୍ଚାର ଅଚ୍ୟୁତସିପୁନ ଖମାରୀ,କୋସଲସେନାର ସଭାପତି ତଥା କୁସମେଲ ସରପଞ୍ଚ କୌସ୍ତୁଭ ସାହୁ,ଯୁବକଂଗ୍ରେସନେତା ତଥା କୋସଲବାଦୀ ଯୁବନେତା ଗଣେଶ ସାହୁଙ୍କ ନେତୃତ୍ୱରେ ଶତାଧିକ ଯୁବକମାନେ ଗତକାଲି ସଂଧ୍ୟା ୮.୩୦ମିରେ ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କୋସଲନାରା ଦେଇ ବିକ୍ଷୋଭ ପ୍ରଦର୍ଶନ କରିଛନ୍ତି । ରାଜ୍ୟସରକାର ତୁରନ୍ତ ହରିଶଙ୍କର ପର୍ଯ୍ୟଟନସ୍ଥଳିର ଉନ୍ନତିକରଣ କାମରେ ହେଉଥିବା ଦୁର୍ନୀତିର ତଦନ୍ତ କରାଇବା,ସଶୀଳ ଗୁରୁଙ୍କ ନାମରେ ଦିଆଯାଇଥିବା ମିଥ୍ୟାମାମଲା ପ୍ରତ୍ୟାହାର କରିବା ଓ ଆକ୍ରମଣକାରୀ ଏସଡିଓଙ୍କୁ ଗିରଫ ସହିତ ଚାକିରିରୁ ବହିସ୍କାର କରିବାକୁ ଦାବି କରାଯାଇଛି । ସେହିପରି ଜିଲ୍ଲା କୃଷକମହାସଂଘର ସଭାପତି ଜତି ପଧାନ ମଧ୍ୟ ସୁଶିଳ ଗୁରୁଙ୍କ ଉପରେ ହୋଇଥିବା ଆକ୍ରମଣକୁ ତୀବ୍ରନୀନ୍ଦା କରିଛନ୍ତି । ଆଜିର ଏହି ବିକ୍ଷୋଭ କାର୍ଯ୍ୟକ୍ରମରେ କପିଳେଶ୍ୱର ଖମାରୀ,ମୂରଲିଧାରୀ ପତି,କୋସଲମୁକ୍ତି ମୋର୍ଚ୍ଚାର ଜିଲ୍ଲାସଭାପତି ବିକାଶ ସା,ଜନାର୍ଦ୍ଦନ ସିଂ,ଲୋକେଶ,ଜିତୁ ନାଏକ,ଓଁନାଥ ମିଶ୍ର,ଅଜୟ ନାଗ,ରମଣୀ ଭାଇ,ରାଜୁ ଭାଇଙ୍କ ସହିତ ଶତାଧିକ କୋସଲସଂଗ୍ରାମୀ ସାମିଲ ଥିଲେ ।