14-Dec-2023

ବଲାଙ୍ଗୀର : ( ମଳୟ ମିଶ୍ରଙ୍କ ରିପୋର୍ଟ ) ବଲାଙ୍ଗୀର ସମେତ ବୌଦ୍ଧ ଓ ସମ୍ବଲପୁର ଆଦି ଜିଲ୍ଲାରେ ମହୁଲିମଦ ବେପାରୀ ଝାଡଖଣ୍ଡର ବଳଦେବ ସାହୁ ଓଗେର କମ୍ପାନୀର ଦେଶୀମଦତିଆରି ମଦଭାଟି ଓ ସଂଲଗ୍ନ ଅଫିସ୍ ଉପରେ ନିକଟରେ ଆୟକର ବିଭାଗର ଚଢାଉରେ ପ୍ରାୟ ୫୦୦କୋଟିର ଟଙ୍କାସୁନା ଜବତ ଘଟଣା ଦେଶବ୍ଯାପୀ ଚହଳ ପକାଇଛି । ତହିଁରୁ କେବଳ ବଲାଙ୍ଗୀରରେ ପ୍ରାୟ ସାଢେ ତିନିକୋଟି ନଗଦ ଟଙ୍କା ଜବତ ଆଶ୍ଚର୍ଯ୍ୟଜନକ ! ଏହାକୁ ନେଇ ବିଭିନ୍ନ ବିଷୟରେ ଚର୍ଚ୍ଚା ଓ ତର୍ଜମା ହେଉଛି । ରାଜନୈତିକ କାଦୁଅଫିଙ୍ଗା ଆରମ୍ଭ ହୋଇଗଲାଣି ।

ତେବେ ଆଜି ଯେଉଁ ଗୁରୁତର ଦିଗଟିର ସମ୍ପର୍କରେ ଏକ ମିଡିଆ ତଥ୍ୟ ପ୍ରକାଶ କରିଛି , ତାହାହେଲା , ମହୁଲିରୁ ମଦ ତିଆରି ନ ହୋଇ ସ୍ପିରିଟ୍ ମଦ ତିଆରି ହୋଇ ବିକ୍ରିହେବା ବିଷୟ । ମହୁଲିମଦ ପ୍ରସ୍ତୁତ କରି ବିକିବାକୁ ଅବକାରୀ ଲାଇସେନ୍ସ ପାଇଥିବା ଏହି କମ୍ପାନୀ ଓ ଅନୁରୂପ ଭାବେ ଏହିସବୁ ଦେଶୀମଦଭାଟି ଗୁଡିକ ଏହି ଆଇନକୁ ଉଲଙ୍ଘନ କରୁଥିବାର ଗୁରୁତର ଅଭିଯୋଗ । ଏହାର ସତ୍ୟତା କେତେ ? ମିଡିଆରେ ପ୍ରକାଶିତ ଉକ୍ତ ଅଭିଯୋଗ ଅନୁଯାୟୀ , ମହୁଲିମଦ ତିଆରି କରାଯାଉଥିବା ମଦଭାଟିଗୁଡିକରେ ପୂର୍ବପରି ଉତ୍ପାଦିତ ପରିମାଣର ପୋଚ ଓ ଫାଶ୍ ଦେଖିବାକୁ ମିଳୁ ନଥିବା ସହିତ ବୌଦ୍ଧ ଡିଷ୍ଟ୍ରିଲାରିରୁ ତିଆରି ସ୍ପିରିଟ୍ ବଲାଙ୍ଗୀର ଆଦି ଜିଲ୍ଲାର ଉକ୍ତ ମଦଭାଟିଗୁଡିକୁ ଯୋଗାଣ ହେଉଛି । ତେଣୁ ଏହି ମଦ ମହୁଲ ଅପେକ୍ଷା ସ୍ପିରିଟ୍ ରୁ ତିଆରି ହେଉଥିବା ଅଧିକ ସମ୍ଭାବନା ଥିବାରୁ ଏହାର ପରୀକ୍ଷଣ ଜରୁରୀ ବୋଲି ମତପ୍ରକାଶ ପାଇଛି ।