19-Nov-2023

ଡୁଙ୍ଗୁରିପାଲ(ଅରବିନ୍ଦ ମିଶ୍ର)-କେନ୍ଦ୍ରୀୟ କୋଶଲ କ୍ରୀୟାନୁଷ୍ଠାନ କମିଟୀ ପକ୍ଷରୁ ଆଜି ଡୁଙ୍ଗୁରିପାଲି ଅଲଗ କୋଶଲ ରାଜ୍ୟ ଦାବୀ ନେଇ ବନ୍ଦ ପାଳନ କରାଯାଇଥିଲା । ଏହି ବ୍ଲକର ଡୁଙ୍ଗୁରିପାଲି , ସହଲା ଛକ, ଚିନାଜୁରୀ, ଚେରୁପାଲି, ରାମପୁର, ପଣ୍ଡକିଟାଲ ପ୍ରଭୃତି ପ୍ରମୁଖ ଛକମାନଙ୍କରେ ବିକ୍ଷୋଭ ପ୍ରଦର୍ଶନ କରାଯାଇଥିଲା ।  ଡୁଙ୍ଗୁରିପାଲି କୋଶଲ ସେନା ପକ୍ଷରୁ ଡୁଙ୍ଗୁରିପାଲିଠାରେ, ସେହିପରି ଚେରୁପାଲି ଶୁଖା ଛକ ଏବଂ ଚିନାଜୁରିଠାରେ ଜୋରଦାର ବିକ୍ଷେଭ ପ୍ରଦର୍ଶନ କରାଯାଇଥିଲା ।  ଚିନାଯୁରୀଠାରେ ମହିଳାମାନେ ନିତେଇ ପାଳଙ୍କନେତୃତତ୍ୱରେବିକ୍ଷୋଭ କରିଥିବା ବେଳେ ଚେରୁପାଲିଠାରେ ସରୋଜ ପଧାନ, ଡୁଙ୍ଗୁରିପାଲିଠାରେ ମୃତ୍ୟୁଞ୍ଜୟ ମିଶ୍ର ଦାୟିତ୍ୱ ନେଇଥିଲେ । କୋଶଲ ସେନା ପକ୍ଷରୁ ଆଜି ସକାଳ ୬ଟାର  ବରଗଡ-ବୋରିଗୁମ୍ମା ୨୬ନମ୍ବର ଜାତୀୟ ରାଜପଥକୁ ବନ୍ଦ କରିଥିଲେ । ପରେ ପିକେଟିଂ କରି  କେନ୍ଦ୍ର ରାଜ୍ୟ ସରକାରଙ୍କ ସମସ୍ତ ସରକାରୀ ବେସରକାରୀ, ଶିକ୍ଷାନୁଷ୍ଠାନ ଗୁଡିକ ମଧ୍ୟ ବନ୍ଦ କରାଯାଇଥିଲା । ଏହି ବନ୍ଦରେ ବିଭିନ୍ନ ସଂଗଠନ ଗୁଡିକ ସ୍ୱତଃ ଭାବରେ ସାମିଲ ରହି ସମର୍ଥନ ଜଣାଇଥିଲେ । ଫଳରେ ରାସ୍ତାର ଉଭୟ ପାଶ୍ୱର୍ରେ ଶହ ଶହ ସଂଖ୍ୟାରେ ଗାଡି ମଟର ଅଟକି ରହିଥିଲା ।

 ଅତ୍ୟାବଶ୍ୟକ ଜରୂରୀ  ଗାଡି ବ୍ୟତିତ କୌଣସି ଗାଡିକୁ ଛାଡି ନଥିଲେ ।  ଆନ୍ଦୋଳନ ସମୟରେ ଏହି ରାସ୍ତା ଦେଇ ବଲାଙ୍ଗିର ଜିଲ୍ଲା ଆରକ୍ଷୀ ଅଧକ୍ଷକ ଯାଉଥିଲେ । ଡୁଙ୍ଗୁରିପାଲି ସହଲା ଛକଠାରେ ତାଙ୍କ ଗାଡି ପହଞ୍ଚିବା ପରେ ସେଠାରେ ଥିବା ଆନ୍ଦୋଳନ କାରୀଙ୍କୁ ତାଙ୍କର ପିଏସଓ ହଠାତ ଧକ୍କା ମାରିବାରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ପରିସ୍ଥିତି ଏପରି ହୋଇଥିଲା ଯେ ଆନ୍ଦୋଳନକାରୀଙ୍କୁ ସେମାନେ ସାମନା କରି ନପାରି ନାକେଦମ ହୋଇଯାଇଥିଲେ । ଡୁଙ୍ଗୁରିପାଲି ପୋଲିସ ଏବଂ କେତେକ ସ୍ଥାନୀୟ ନେତୃବୃନ୍ଦଙ୍କ ହସ୍ତକ୍ଷେପ ପରେ ପରିସ୍ଥିତି ଶାନ୍ତ ପଡିଥିଲା । ପରେ ଏକ ପ୍ରତିବାଦ ସଭା ସରୋ ପଧାନଙ୍କ ସଭାପତିତ୍ୱରେ  ଅନୁଷ୍ଠିତ ସଭାରେ  କୋଶଲ ସାମ୍ବାଦିକ ସଂଘର ଆବାହକ ରତ୍ନାକର ସେଠ କୋଶଲ ରାଜ୍ୟଦାବୀର ଯଥାର୍ଥତା ଉପସ୍ଥାପନ କରିଥିଲେ । ବଡ ବଡ ଜିଲ୍ଲାକୁ ପ୍ରସାଶନ ସୁବିଧା ପାଇଁ ବିଜୁ ପଟ୍ଟନାୟକ ଜିଲ୍ଲା ବିଭାଜନ କରିଥିଲେ । ସୁବିଧା ଦୃଷ୍ଟିରୁ ବଡ ପଞ୍ଚାୟତକୁ ବିଭାଜନ କରି ଛୋଟ ଛୋଟ ଜିଲ୍ଲା କରାଯାଇଛି । କିନ୍ତୁ ଆଞ୍ଚଳିକ ବୈଷମ୍ୟର ଶୀକାର ହୋଇଥିବା ଗୋଟିଏ ଅଂଚଳ, ଭାଷାଗତ , ସାଂସ୍କୃତିକ ଦୃଷ୍ଟିରୁ ଆଉଗୋଟିଏ ରାଜ୍ୟ ହେବାର କୌଣସି ଅସୁବିଧା ନାହିଁ । ଏଥିପାଇଁ ଯେଉଁମାନେ ସ୍ୱର ଉତ୍ତୋଳନ କରିଛନ୍ତି ସେମାନେ କେବେ ବିଭାଜନକାରୀ ନୁହନ୍ତି ବୋଲି  ଯୁକ୍ତିଯୁକ୍ତ ମତାମତ ଉପସ୍ଥାପନ କରିଥିଲେ । କମିଟୀର ସଭାପତି ବିପ୍ରଚରଣ ସାହୁ, ଜିଲ୍ଲା ଟ୍ରକ ମାଲିକ ସଂଘର ସଭାପତି ମୃତ୍ୟୁଞ୍ଜୟ ମିଶ୍ର, ବିକାଶ ଶତପଥି ପ୍ରମୁଖ ମତାମତ ପ୍ରଦାନ କରିଥିଲେ । ଆନ୍ଦୋଳନରେ ବରିଷ୍ଠ ସମାଜସେବୀ ଗୋପାଳ ବାରିକଙ୍କ ସମେତ କୋଶଲ ସାମ୍ବାଦିକ ସଂଘର ଉପସଭାପତି ଅରିବିନ୍ଦ ମିଶ୍ର, କୋଶଲ ସେନାର ଦୀପକ ମିଶ୍ର, ଯଦୁମଣି କୁଦେଇ,ବୁଲୁ ବାରିକ,  ଶୁଶାନ୍ତ ବାରିକ, ପ୍ରଭୁଦତ୍ତ ନାୟକ, ସର୍କଷଣ ବୁଡେକ, ଇନ୍ଦ୍ର ମେହେର, ଲବ ପଧାନ, ଧିରେନ ଦୀପ, ଲଇତରା ଦୀପ ପ୍ରମୁଖ ଯୋଗଦାନ କରିଥିଲେ । ଡୁଙ୍ଗୁରିପାଲି ଥାନାଧିକାରୀ ସତ୍ୟନାରାୟଣ ପଧାନ ପରିସ୍ଥିତି ଉପରେ ତୀକ୍ଷ୍ଣ ଦୃଷ୍ଟି ରଖି ବିଭିନ୍ନ ଛକମାନଙ୍କରେ ପୋଲିସ ମୁତୟନ କରିଥିଲେ ।