11-Nov-2023

ଟ୍ରେନ୍ ଭିତରେ ଅସଦାଚରଣ ଉଦ୍ୟମରୁ ଅଘଟଣ ନୁହେଁ ତ ?

ରହସ୍ୟରେ ଘଟଣା : ଦୁର୍ଘଟଣାର ରୂପ ଦେଇ ଭିନ୍ନମୋଡ ? 

ବେଲପଡା : ( ମଳୟ ମିଶ୍ରଙ୍କ ରିପୋର୍ଟ ) ଘଟଣାରୁ ପ୍ରକାଶ ଯେ ଗତ ୭ ତାରିଖରେ ବେଲପଡାରେ ରହୁଥିବା ମୁରିବାହାଲ ଟେଙ୍ଗରାର ଜଣେ ଦାଦନ ଦଲାଲ ଦଶରଥ ବାଗ ଓ ତା ଅଂଶୀଦାର ସର୍ଦ୍ଦାର ସୁଶାନ୍ତ ପାଢୀ ପଣ୍ଡରିଯୋର ପଞ୍ଚାୟତର ଭାଲୁବାହାଲିର ଧନୀରାମ ମାଝି ଓ ତାଙ୍କ ସ୍ତ୍ରୀ ଲିଜି ମାଝିଙ୍କୁ ଆଖପାଖ ଗ୍ରାମର ୭ ଟି ପରିବାର ସହିତ ଇଟାଭାଟିରେ କାମ କରିବାକୁ ଜଣକୁ ୫୦ ହଜାର ଲେଖାଏଁ ଅଗ୍ରୀମ ଟଙ୍କାଦେଇ କଣ୍ଟାବାଞ୍ଜିରୁ ଟ୍ରେନ୍ ରେ ସେକେଣ୍ଡ୍ ସର୍ଦ୍ଦାରଙ୍କ ସାଙ୍ଗରେ ତେଲେଙ୍ଗାନାକୁ ପଠାଉଥିଲେ । ପ୍ରକାଶିତ ଖବର ଅନୁଯାୟୀ , ଚାଲାଣବେଳେ ରାତିରେ ବାଟରେ କାଜୁପେଟା ନିକଟରେ ଟ୍ରେନ୍ ରୁ ଗୋଡଖସି ଲିଜା ଟ୍ରେନ୍ ତଳେ ପଡିଯାଇଥିଲେ ଓ ତାଙ୍କୁ ବଞ୍ଚାଇବାକୁ ଯାଇ ତାଙ୍କ ସ୍ବାମୀ ଧନୀରାମ ମାଝି ମଧ୍ୟ ଆହତ ହୋଇଥିଲେ । ସେମାନଙ୍କୁ ରେଳବାଇ ପୁଲିସ୍ ତେଲେଙ୍ଗାନାର ଉଆରାଙ୍ଗଲ୍ ଏମଜିଏମ ହସପିଟାଲକୁ ନେଇଥିଲା । ସେଠାରେ ଲିଜାଙ୍କୁ ଡାକ୍ତରମାନେ ମୃତ ଘୋଷଣା କରିଥିଲେ ଓ ସ୍ତ୍ରୀଙ୍କ ମୃତ୍ୟୁ ପରେ ମାନସିକ ଭାରସାମ୍ୟ ହରାଇ ଧନୀରାମ କେଉଁଆଡେ ଚାଲିଯାଇଛନ୍ତି , ଯାହାଙ୍କର ଅଦ୍ୟାବଧି କୌଣସି ପତ୍ତା ମିଳିପାରିନାହିଁ । ଖବର ପାଇ ଗାଁ'ର ଜଣେ ପଡୋଶୀଙ୍କୁ ପଠାଇ ଦଲାଲ ଆମ୍ବୁଲାନ୍ସ ଯୋଗେ ଲିଜାଙ୍କର ଶବ ଓ ସାଙ୍ଗରେ ନେଇଥିବା ଏକ ଶିଶୁପୁତ୍ର ସୁମନ୍ତ ( ୫ ) କୁ ଆଣି ଗାଁ'ରେ ପହଞ୍ଚାଇଥିଲା । ଏ ସମ୍ପର୍କରେ ଲିଜାଙ୍କ ଶଶୁର ରଣଜିତ ମାଝି ବେଲପଡା ଥାନାରେ ଏକ ଏତଲା ଦେଇଛନ୍ତି । ପୁଲିସ୍ ଏକ ମାମଲା ଋଜୁ କରି ତଦନ୍ତ କରୁଥିବା ପ୍ରକାଶ । ମାଆବାପଙ୍କୁ ହରାଇ ଅନାଥ ହୋଇପଡିଥିବା ତିନୋଟି ଅନାଥ ପିଲାଙ୍କୁ ସରକାରୀ ସହାୟତା ନିମନ୍ତେ ଗ୍ରାମବାସୀଙ୍କ ପକ୍ଷରୁ ଦାବି କରାଯାଇଛି । ବେଲପଡା ତହସିଲଦାର ଗ୍ରାମକୁ ଯାଇ ତଦନ୍ତ କରି ସରକାରୀ ସହାୟତା ଦିଆଯିବ ବୋଲି ପ୍ରତିଶ୍ରୁତି ଦେଇଥିବା ପ୍ରକାଶ । 

ତେବେ କେଉଁ ପରିସ୍ଥିତିରେ ଯାଉଥିବାବେଳେ ଉକ୍ତ ମହିଳାଦାଦନଶ୍ରମିକଙ୍କର ଏପରି ମର୍ମନ୍ତୁଦ ଦୁର୍ଘଟଣାରେ ମୃତ୍ୟୁ ଘଟିଲା ଓ ତାଙ୍କ ସ୍ବାମୀ ନିଖୋଜ୍ ହେଇଗଲେ , ଏ ନେଇ ଭିନ୍ନ ଭିନ୍ନ କଥା ଶୁଣିବାକୁ ମିଳୁଛି । ଗଲାବେଳେ ଟ୍ରେନ୍ ଭିତରେ ସ୍ବାମୀ-ସ୍ତ୍ରୀଙ୍କ ମଧ୍ୟରେ କେଚେର କେଚେର ବା କଳିଗୋଳ ହେତୁ ମହିଳାଶ୍ରମିକ ଜଣକ ଆତ୍ମହତ୍ୟା କରିବାକୁ ଡେଇଁପଡିଥିବା କେତେକେ କହୁଥିବାବେଳେ , ଆଉ ଏକ ଅସମର୍ଥିତ ସୂତ୍ରରୁ ଦଲାଲ ସାଙ୍ଗରେ ପଠାଇଥିବା ସେକେଣ୍ଡ୍ ସର୍ଦ୍ଦାରମାନେ ପ୍ରାୟତଃ ଘଟୁଥିବା ରାତିବେଳା ସୁଯୋଗ ନେଇ ଟ୍ରେନ୍ ଭିତରେ ଉକ୍ତ ମହିଳାଙ୍କ ସହ କିଛି ଅସଦାଚରଣ ଉଦ୍ୟମ କରିଥିବା ଓ ପ୍ରତିବାଦ କରିବାରୁ ତାଙ୍କ ସ୍ବାମୀଙ୍କ ସହ କିଛି ବି ଘଟିଥିବା ଅନୁମାନ କରାଯାଉଛି । ଏହା ସେମାନଙ୍କୁ ପଠାଇଥିବା ସର୍ଦ୍ଦାର , ତାଙ୍କ ଅନୁଚର ବା ସାଙ୍ଗରେ ଯାଇଥିବା ଅନ୍ୟ ଦାଦନଶ୍ରମିକମାନେ ହିଁ କହିପାରିବେ ! ତେଣୁ ପ୍ରକୃତ ଘଟଣା ନଜାଣି ଏଭଳି ସମ୍ବେଦନଶୀଳ ଘଟଣା ସମ୍ପର୍କରେ କେବଳ ଗପ ଶୁଣାଇବାରେ ସତ୍ୟତା ପ୍ରକାଶ ପାଇବ ନାହିଁ । ତଦନ୍ତକାରୀ ପୁଲିସ୍ ଏହାକୁ ଘଣ୍ଟ ଘୋଡାଉ ନାହିଁ ତ ? 

ଆହୁରି ମଧ୍ୟ , ଏବେ ସର୍ଦ୍ଦାରଠାରୁ ବଇନା ନେଇ ଅନେକତଃ ଦାଦନଶ୍ରମିକମାନେ ଅଧବାଟରୁ ଲୁଚି ପଳାଇ ଆସୁଥିବା ଦେଖାଯାଊଛି । ତେଣୁ ଘରେ ଦୁଇଟି ଛୋଟପିଲାଙ୍କୁ ଛାଡିଯାଇଥିବା ଏହି ଅଭାବଗ୍ରସ୍ତ ଗରିବ ଶ୍ରମିକଦମ୍ପତି ଏଭଳି କିଛି ଅପଚେଷ୍ଟା କରି ଦୁର୍ଘଟଣାର ଶିକାର ହୋଇଥିବା ସମ୍ଭାବନାକୁ ମଧ୍ୟ ଅସ୍ବୀକାର କରାଯାଇ ପାରୁନାହିଁ । ଏଣୁ ସଚେତନତା ସଭା କରି ସରକାର ମୁଣ୍ଡରୁ ଦାୟିତ୍ୱ ଖସାଇଦେବା ପରିବର୍ତ୍ତେ ବହୁଳଭାବେ ଚାଲିଥିବା ଏଭଳି ଅସୁରକ୍ଷିତ ଦାଦନଶ୍ରମିକ ଚାଲାଣ ପ୍ରତି ଆନ୍ତଃରାଜ୍ୟ ମାଇଗ୍ରେଣ୍ଟ୍ ଶ୍ରମିକ ନିୟମର ପାଳନ ପୂର୍ବକ ଏହି ସମ୍ବେଦନଶୀଳ ମାମଲାଟିର ଉଚିତ୍ ତଦନ୍ତ କରି ନିଖୋଜ୍ ଆହତ ଶ୍ରମିକଟିର ସନ୍ଧାନ କରି ଅନାଥ ଶିଶୁମାନଙ୍କୁ ଉପଯୁକ୍ତ ଥଇଥାନ ଏବଂ ସର୍ଦ୍ଦାରଙ୍କୁ ଯଥୋଚିତ ଦଣ୍ଡବିଧାନ କରିବା ସହ ଦାୟିତ୍ୱରେ ଅବହେଳା କରୁଥିବା ତଦନ୍ତକାରୀ ପୁଲିସ୍ , ଶ୍ରମବିଭାଗ ଓ ପ୍ରଶାସନିକ ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଲୋକେ ଦାବି କରିଛନ୍ତି ।