10-Nov-2023

ବଲାଙ୍ଗିର(ସନ୍ତୋଷ କୁମାର ଠାକୁର ): ବଲାଙ୍ଗୀରରେ ଜଳସେଚନର ଉନ୍ନତିକୁ ଦୃଷ୍ଟିରେ ରଖି  ସରକାର ଲୋୟର ସୁକତେଲ ପ୍ରକଳ୍ପକୁ ତୁରନ୍ତ କାର୍ଯ୍ୟକ୍ଷକମ କରିବା, ଶିଳ୍ପବିହୀନ ବଲାଙ୍ଗୀର ଜିଲ୍ଲାରେ ବିଜୟାନନ୍ଦ ଚିନିକଳକୁ ତୁରନ୍ତ ଚାଲୁ କରିବା ତଥା ଆଂଚଳିକ ବୈଷମ୍ୟବାଦର ଶୀକାର ହୋଇଥିବା ପଶ୍ଚିମ ଓଡିଶାକୁ ସ୍ୱତନ୍ତ୍ର କୋସଳ ରାଜ୍ୟର ମାନ୍ୟତା ପ୍ରଦାନ, ଭୂମିହୀନ ମାନଙ୍କୁ ୪ଡିସିମିଲ ଜମି ପ୍ରଦାନ ତଥା ଆଦିବାସୀ ମାନଙ୍କ ଅଧିକାର ଆଦି ବିଭିନ୍ନ ଦାବିକୁ ନେଇ ଭିଲେଜର୍ସ ଇଣ୍ଡିଆ ପାର୍ଟି, ଆଦିବାସୀ ଅଧିକାର ମହାସଂଘ, ଭୂମିହୀନ ସଂଘ ଓ ପଶ୍ଚିମ ଓଡ଼ିଶା ସେବା ସଂଘ ଦାବି କରିଛି । ଏହି ସବୁ ଦାବିକୁ ନେଇ ଏହି ତିନି ଅନୁଷ୍ଠାନ ତରଫରୁ ମିଳିତ ଭାବରେ ଆଜି ସ୍ଥାନୀୟ ସାମ୍ବାଦିକ ଭବନ ଠାରେ ଏକ ପ୍ରେସ୍ ମିଟ୍ ଅନୁଷ୍ଠିତ ହୋଇଥିଲା । ପାର୍ଟିର ରାଜ୍ୟ ସଭାପତି ଡ. ବିପୀନ କୁଶଲିଆ ଏଥିରେ ଯୋଗ ଦେଇ ଏ ଅଂଚଳର ସବୁ ସମସ୍ୟାର ସମାଧାନ ପାଇଁ କୋସଳ ରାଜ୍ୟ ହିଁ ଏକମାତ୍ର ବିକଳ୍ପ ବୋଲି କହିଥିଲେ । ବଲାଙ୍ଗୀରର ଅବହେଳାକୁ ଆଦୌ ବରଦାସ୍ତ କରାଯିବ ନାହିଁ ବୋଲି ଶ୍ରୀ କୁଶଲିଆ ଜିଲ୍ଲା ପ୍ରଶାସନକୁ ଚେତାବନୀ ଦେଇଛନ୍ତି । ଏ ଅଂଚଳର ନିର୍ବାଚିତ ପ୍ରତିନିଧି ମାନଙ୍କ ଉଦାସୀନତା ମନୋଭାବ ଯୋଗୁଁ ପଶ୍ଚିମ ଓଡ଼ିଶାରେ ଦାଦନ ଚାଲାଣ, ଚାଷୀ ଆତ୍ମହତ୍ୟା ଆଦି ଅପ୍ରୀତିକର ଘଟଣା ବଢ଼ିବାରେ ଲାଗିଛି । ପଶ୍ଚିମ ଓଡ଼ିଶାବାସୀଙ୍କ ଏହି ସମସ୍ତ ଦାବି ପ୍ରତି ସରକାର ଅଣଦେଖା କଲେ ଆସନ୍ତା ଡିସେମ୍ବର ୧୫ ତାରିଖରେ ବଲାଙ୍ଗୀର ବନ୍ଦର ଡାକରା ଦିଆଯିବ ବୋଲି ସାମ୍ବାଦିକ ସମ୍ମିଳନୀ ମାଧ୍ୟମରେ ଚେତାବନୀ ଦିଆଯାଇଛି । ଏହି ସାମ୍ବାଦିକ ସମ୍ମିଳନୀରେ  ପଶ୍ଚିମ ଓଡ଼ିଶା ସେବା ସଂଘର ଜିଲ୍ଲା ସଭାପତି ରାଜେଶ ବଗର୍ତ୍ତି, ଓ ଅନ୍ୟ ମାନେ  ଯୋଗ ଦେଇ ବଲାଙ୍ଗୀର ଜିଲ୍ଲାକୁ ବିଭିନ୍ନ କ୍ଷେତ୍ରରେ ଅବହେଳିତ କରାଯାଇଥିବା କଥା କହିଥିଲେ । ଏଥିପାଇଁ ଆଗାମୀ ଦିନରେ ବଲାଙ୍ଗୀର ଜିଲ୍ଲାରେ ଏକ ବିରାଟ ଆନ୍ଦୋଳନ ମୁଣ୍ଡ ଟେକିବ ବୋଲି ପ୍ରେସ ମିଟ୍ ରେ କୁହାଯାଇଛି ।