02-Nov-2023

ସମ୍ବଲପୁର- (ସଂଜୀବକୁମାରପାଣିଗ୍ରାହୀ) 
ସମ୍ବଲପୁର ମହାନଗର ନିଗମ ଅଂଚଳ ର ଅବସ୍ଥା ଦିନକୁ ଦିନ ସାଙ୍ଘାତିକ ହେବାରେ ଲାଗିଛି l ସମ୍ବଲପୁର ସହରର ରାସ୍ତା ଘାଟ ର ଅବସ୍ଥା ନ କହିଲେ ଭଲ l ସେପଟେ ସ୍ବେରେଜ କାର୍ଯ୍ୟ ସହରର ରାସ୍ତା କୁ କୋଡ଼ି କୋଡ଼ି କଦର୍ଜିଆ କରିଦେଲେଣି l
ସେମିତି ଏକ ସାଙ୍ଘାତିକ କାର୍ଯ୍ୟ ଦେଖିବାକୁ ମିଳିଛି ବଡ଼ବାଜାର ରିଙ୍ଗ ରୋଡ଼ ରାସ୍ତା କଡ଼ରେ ଅବସ୍ଥିତ ଏସ.ଡି.ଏ. ଗୌରୀ ଶଙ୍କର ପାର୍କ ର l ଦୀର୍ଘଦିନ ହେଲା କିଟି କିଟି ଅନ୍ଧାରରେ ଡୁବି ରହିଛି ଏହି ସ୍ଥାନ l କୌଣସି ଗୋଟିଏ ବି ଲାଇଟ ଜଳୁନାହିଁ l ଯାହାକି ଅତ୍ୟନ୍ତ ଦୁର୍ଭାଗ୍ୟ ର ବିଷୟ ବୋଲି ବରିଷ୍ଠ ବିଜେପି ନେତା ସୂର୍ଯ୍ୟ ପାଣିଗ୍ରାହୀ ଏକ ପ୍ରେସ ବିବୃତି ରେ ପ୍ରକାଶ କରିଛନ୍ତି l
ସୂଚନାଯୋଗ୍ୟ ଯେ, ସମ୍ବଲପୁର ସହରରେ ଲୋକଙ୍କ ପାଇଁ ଅବସର ବିନୋଦନ ପାଇଁ କୌଣସି ବିଶେଷ ପାର୍କ କି ଅନ୍ୟ ସ୍ଥାନ ନ ଥିବା ବେଳେ, ଏହି ଗୌରୀ ଶଙ୍କର ପାର୍କ ର ଅବସ୍ଥା ନିରୁତ୍ସାହଜନକ ବିଷୟ l ନିୟମିତ ଏହି ପାର୍କ କୁ ଏହି ଅଞ୍ଚଳ ର ଅନେକ ଶିଶୁ ଓ ପରିବାର ଲୋକ ସନ୍ଧ୍ୟା ରେ ଏଠିକି ଆସନ୍ତି ଓ ଅବସର ବିନୋଦନ କରିଥାନ୍ତି l କିନ୍ତୁ, ସମ୍ବଲପୁର ଉନ୍ନୟନ କର୍ତୃପକ୍ଷ ଆଜିର ଦିନରେ ଦୁର୍ନୀତି ର ଏନ୍ତୁଡ଼ିଶାଳ ପାଲଟି ଥିବା ବେଳେ କୋଟି କୋଟି ଟଙ୍କା ର ଅର୍ଥ ପାଉଛି, ହେଲେ ନିଜ ଅଧୀନରେ ରଖିଥିବା ପାର୍କ ଗୁଡିକର ପରିଚାଳନା କରୁନଥିବା ପରିତାପ ର ବିଷୟ ବୋଲି ମଧ୍ୟ ଶ୍ରୀ ପାଣିଗ୍ରାହୀ ପ୍ରକାଶ କରିଛନ୍ତି l
ଏହି ପାର୍କ ମଧ୍ୟରେ ସ୍ୱାଧୀନତା ସଂଗ୍ରାମୀ ହଲ ଅଛି ଓ ଓଡିଶା ଲଳିତ କଳା ଏକାଡେମୀ ର ପ୍ରାନ୍ତୀୟ କେନ୍ଦ୍ର ଅଛି l ଯେଉଁଠି ମଝି ମଝିରେ ଅନେକ କଳା ପ୍ରଦର୍ଶନୀ ଅନୁଷ୍ଠିତ ହୋଇଥାଏ l ଏହି ପାର୍କ ସନ୍ଧ୍ୟା ସମୟରେ ଅନ୍ଧକାର ମଧ୍ୟରେ ଡୁବି ରହୁଥିବା ଯୋଗୁଁ ଅନେକ ଅସାମାଜିକ କାର୍ଯ୍ୟକଳାପ ହେବାର ଆଶଙ୍କା କୁ ଅସ୍ବୀକାର କରାଯାଇନପାରେ l ତେଣୁ ଯଥାଶୀଘ୍ର ଏହି ଗୌରୀ ଶଙ୍କର ପାର୍କ ର ନାହିଁ ନ ଥିବା ସମସ୍ୟା ର ସମାଧାନ ଅବିଳମ୍ବେ କରାଯିବାକୁ ଶ୍ରୀ ପାଣିଗ୍ରାହୀ ଦାବୀ ଜଣାଇଛନ୍ତି l