07-Oct-2023

ବଙ୍ଗୋମୁଣ୍ଡା (ଅନୀଲ କୁମାର ତ୍ରିପାଠୀ ): ଐତିହ୍ଯ ସମ୍ପହ୍ନ ରାଣୀପୁର ଝରିଆଲ ମନ୍ଦିର କମିଟି ତରଫରୁ କମିଟିର ଆବାହକ ଅନିଲ କୁମାର ତ୍ରିପାଠୀଙ୍କ ନେତୃତ୍ବରେ ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା ଙ୍କୁ ତାଙ୍କ କାର୍ଯ୍ୟାଳୟରେ ଭେଟି ଯୋଗିନୀ ପିଠ ର ଏକ ସୁନ୍ଦର ଫଟୋଚିତ୍ର ଉପହାର ଦେବାସହ ଅଞ୍ଚଳ ବାସୀଙ୍କ ତରଫରୁ ଉତ୍ତରୀୟ ଦେଇ ସମ୍ମାନ ଜଣାଇଥିଲେ ଏବଂ ପିଠର ଉନ୍ନତୀକରଣ ପାଇଁ ଆଲୋଚନା ମଧ୍ଯ ହୋଇଯାଇଛି । ପ୍ରକାଶ ଥାଉକି ଚଳିତ ବର୍ଷ ଅଗଷ୍ଟ ୦୭ ତାରିଖ ଦିନ ଓଡିଶାର ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଙ୍କ ନିର୍ଦ୍ଦେଶରେ ୫ଟି ସଚିବ ଭିକେ ପାଣ୍ଡିଆନ ରାଣୀପୁର ଝରିଆଲ ଗସ୍ତରେ ଆସିଥିଲେ। ଏହି ଗସ୍ତକୁ ନେଇ ଅଞ୍ଚଳରେ ପୀଠର ବିକାଶ ହେବ ବୋଳି ଲୋକଙ୍କ ମନରେ ଆଶାସଞ୍ଚାର ହୋଇଥିଲା । କିନ୍ତୁ ଗସ୍ତର ଦୁଇମାସ ବିତି ଯାଇଥିଲେ ହେଁ ଆଶାନୁରୂପ କୌଣସି ଖବର ନ ଆସିବାରୁ ବଲାଙ୍ଗୀର ଜିଲ୍ଲାପାଳ ଶ୍ରୀ ରାଣାଙ୍କୁ ଭେଟି ମନ୍ଦିର କମିଟି ପୀଠରେ ବର୍ତ୍ତମାନ ଥିବା ସମସ୍ୟା ଗୁଡିକ ଦୂର କରିବା ତଥା ଉନ୍ନତୀକରଣ ପାଇଁ ସରକାରଙ୍କୁ ଜଣାଇବା ପାଇଁ ଅନୁରୋଧ କରିଥିଲେ। ତେବେ ଜିଲ୍ଲାପାଳ ଶ୍ରୀ ରାଣା ଆଗରୁ ପିଠ ପାଇଁ ରାଜ୍ୟ ସରକାର ୪ କୋଟି ଟଙ୍କାର ଅନୁଦାନ ଯୋଗାଇ ଦେଇଛନ୍ତି। ହେଲେ ପୀଠ ଏଏସଆଇ ବିଭାଗ ଅଧିନରେ ଥିବାରୁ ପ୍ରଥମେ ସେତିକି ଅର୍ଥର କାମ ଆରମ୍ଭ କରିବାପାଇଁ ଏଏସଆଇ କୁ ଓଟିଡିସି ତରଫରୁ ଅନୁମତି ମରାଯାଇଛି। ଅନୁମତି ମିଳି କାମ ଆରମ୍ଭ ହେଲାପରେ ସ୍ଥିତି ଦେଖି ପୁଣି ସରକାର ଅନୁଦାନ ଯୋଗାଇ ଦେବେ ବୋଳି କହିଥିଲେ। ଏହି ସମୟରେ କମିଟି ତରଫରୁ ମନ୍ଦିର କମିଟିର ସଭାପତି ମାଣିକଚନ୍ଦ ଜୈନ, ଆବାହକ ଅନିଲ କୁମାର ତ୍ରିପାଠୀ, ଝରିଆଲ ସରପଞ୍ଚ ଭରଦ୍ୱାଜ ଗହୀର, ଅଲଣ୍ଡା ସରପଞ୍ଚଙ୍କ ପ୍ରତିନିଧି ଯୁବରାଜ ବାଗ, ମଞ୍ଜେସ ମେହେର, ଗୋପିନାଥ ସାହୁ ପ୍ରମୁଖ ଜିଲ୍ଲାପାଳ ଙ୍କ ସହ ଆଲୋଚନା କରିଥିଲେ।