08-Sep-2023

ସିନ୍ଧେକେଲା (ଅନୀଲ କୁମାର ତ୍ରିପାଠୀ ): ବଲାଙ୍ଗୀର ଜିଲ୍ଲା ସିନ୍ଧେକେଲା ମୁଖ୍ଯ ରାସ୍ତା ସଂକୀର୍ଣ୍ଣ ହୋଇ ପଡିଥିବାରୁ ଅଧିକାଂଶ ସମୟ ଟ୍ରାଫିକ ଜାମ ରହିଥାଏ। ଆଗକୁ ପଶ୍ଚିମ ଓଡିଶାର ଗଣପର୍ବ ନୂଆଖାଇ ପର୍ବ ଥିବାରୁ ଏହି ସମସ୍ୟା ଜଟିଳ ହେବା ଆଶଙ୍କା ରହିଛି। ତେଣୁ ଏହାର ନିୟନ୍ତ୍ରଣ ପାଇଁ ସ୍ଥାନିୟ ବଣିକସଙ୍ଘ ଉପଜିଲ୍ଲାପାଳ ଙ୍କ ଦ୍ଵାରସ୍ଥ ହୋଇଛି। ସେପ୍ଟେମ୍ବର ୧୦ ତାରିଖରୁ ୨୦ ତାରିଖ ପର୍ଯ୍ୟନ୍ତ (୧୦ ଦିନ) ସକାଳ ୮ ଟାରୁ ରାତି ୮ ଟା ପର୍ଯ୍ୟନ୍ତ ଭାରିଯାନ ଚଳାଚଳ ବନ୍ଦ କରିବା ପାଇଁ ଆଦେଶ ଦେବାକୁ ଟିଟିଲାଗଡ ଉପଜିଲ୍ଲାପାଳ ଦୟାମୟ ପାଢ଼ୀ ଙ୍କୁ ସଂଘ ଭେଟି ଦାବିପତ୍ର ପ୍ରଦାନ କରିଛି। ଦାବିପତ୍ର ପ୍ରଦାନ ସମୟରେ ସଂଘ ସଭାପତି ସୁବାଷ ଜୈନ, ସମ୍ପାଦକ ସନ୍ତୋଷ ଜୈନ, ସହ ସମ୍ପାଦକ ଅନିଲ କୁମାର ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ। ପ୍ରକାଶ ଯୋଗ୍ଯ ବିଗତ ବର୍ଷ ମାନଙ୍କରେ ନୁଆଖାଇ ସମୟରେ ସିନ୍ଧେକେଲା ମୁଖ୍ଯ ରାସ୍ତାର

ଟିଟିଲାଗଡ ପଟ, କଣ୍ଟାବାଞ୍ଜି ପଟ ,କଳାହାଣ୍ଡି ଓ ନୁଆପଡା ଜିଲ୍ଲା ପଟରୁ ଆସୁଥିବା ଭାରିଯାନ ମାନଙ୍କ ପାଇଁ ସିନ୍ଧେକେଲା ରାଧାକୃଷ୍ଣ ମନ୍ଦିର ନିକଟରୁ ସିନ୍ଧେକେଲା ବସଷ୍ଟାଣ୍ଡ ପର୍ଯ୍ୟନ୍ତ ଉଭୟ ଟିଟିଲାଗଡ ଓ କଣ୍ଟାବାଞ୍ଜି ରାସ୍ତା ସମ୍ପୁର୍ଣ୍ଣ ଟ୍ରାଫିକ ଜାମ ହୋଇଯିବା ଦ୍ବାରା ପ୍ରାୟ ଦୁଇ ରୁ ତିନିଘଣ୍ଟା ଧରି ଲୋକେ ବେଶ ହଇରାଣ ହରକତ ହୋଇଥିଲେ। ଏଥିପାଇଁ ବ୍ୟବସାୟୀ, ଗ୍ରାହକ, ଛାତ୍ର ଛାତ୍ରୀ, ରୋଗୀ ଓ ଯାତାୟତ କାରୀ ବେଶ ହନ୍ତସନ୍ତ ହୋଇଥିଲେ। ପରେ ସିନ୍ଧେକେଲା ପୋଲିସ, ସରପଞ୍ଚ, ସାମ୍ବାଦିକ ଅନିଲ କୁମାର ତ୍ରିପାଠୀ ଓ ଯୁବଗୋଷ୍ଠୀ ବହୁ ସମୟର କସରତ ପରେ ଟ୍ରାଫିକ ନିୟନ୍ତ୍ରଣ ହୋଇଥିଲା।