01-Sep-2023

ଭବାନୀପାଟଣା(ତ୍ରିନାଥ ବେଶ୍ରl )
ନାଗରିକ ବିକାଶ ସଂଗଠନ କଳାହାଣ୍ଡି, ଓଡିଶା ଶ୍ରମଜିବୀ ମଞ୍ଚ ଓ ମହିଳା ଶ୍ରମଜିବୀ ମଞ୍ଚ ଓଡିଶା, ଆତ୍ମଶକ୍ତି ଟ୍ରଷ୍ଟ ଦ୍ଵାରା ଆରମ୍ଭ ହୋଇଥିବା କୃଷିକ୍ରାନ୍ତି ଅଭିଯାନର ପ୍ରତିନିଧିଙ୍କ ପକ୍ଷରୁ ଆଜି ଶୁକ୍ରବାର କଳାହାଣ୍ଡି ଜିଲ୍ଲାପାଳ ଏବଂ ଜିଲ୍ଲା ମୁଖ୍ୟ କୃଷି ଅଧିକାରୀଙ୍କୁ ବିହନ ଯୋଗାଣ ନିମନ୍ତେ ଦାବୀ ପତ୍ର ପ୍ରଦାନ କରାଯାଇଛି। ଏଥିରେ 2ୟ ଫସଲ ଚାଷ ପାଇଁ ଠିକ୍ ସମୟରେ ବିହନ ବଣ୍ଟନ ତଥା ବିଶେଷ କରି ଅକ୍ଟୋବର 15 ତାରିଖ ପୂର୍ବରୁ କୃଷକ ମାନଙ୍କୁ ଗୁଣାତ୍ମକ ବିହନ ଯୋଗାଣ ପାଇଁ ଦାବୀ କରାଯାଇଛି। ଅକ୍ଟୋବର ମାସରେ ବିହନ ପାଇଥିବା କୃଷକ ମାନେ ଚାଷରୁ ଅଧିକ ଲାଭ ପାଉଥିବାରୁ ମୁଗ, ବିରି, ହରଡ, କୋଳଥ, ସୋରିଷ ଏବଂ ଚଣା ପରି ବିଭିନ୍ନ ଫସଲକୁ ପୂରଣ କରିବା ପାଇଁ ବିଭିନ୍ନ ବିକଳ୍ପ ବିହନର ବ୍ୟବସ୍ଥା କରିବାକୁ ଅନୁରୋଧ କରାଯାଇଛି। କୃଷକ ମାନଙ୍କୁ ସେମାନଙ୍କ ନିର୍ଦ୍ଧିଷ୍ଟ ଆବଶ୍ୟକତା ଏବଂ ଆଞ୍ଚଳିକ ପରିସ୍ଥିତି ଅନୁଯାୟୀ ଫସଲ ଚୟନ କରିବାକୁ ସଶକ୍ତ କରିବାରେ ସହଯୋଗ କରିବ ଏବଂ ସେମାନଙ୍କ ଅମଳ ଓ ଆୟ ବୃଦ୍ଧି କରିବାରେ ସହାୟକ ହେବ ବୋଲି ଆଶା ପ୍ରକାଶ କରାଯାଇଛି। ସୂଚନାଯୋଗ୍ୟ, କୃଷିକ୍ରାନ୍ତି ଅଭିଯାନ କୃଷକ ମାନେ ପ୍ରତିଦିନ ହେଉଥିବା ଆହ୍ବାନର ମୁକାବିଲା କରିବା ଓ ସେମାନଙ୍କର ପ୍ରଗତି ଏବଂ ସମୃଦ୍ଧି ପାଇଁ କାର୍ଯ୍ୟ କରୁଛି।  କୃଷକ ମାନଙ୍କୁ ସଶକ୍ତ କରିବା ଏବଂ କୃଷି ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ଗୁଣାତ୍ମକ ବିହନର ଠିକ୍ ସମୟରେ ଉପଲବ୍ଧତା ଏବଂ ବିବିଧତା ପାଇଁ ଚେଷ୍ଟା ଜାରି ରଖିଛି। ଦ୍ଵିତୀୟ ଫସଲକୁ ପ୍ରୋତ୍ସାହିତ କରିବାରେ ଓଡ଼ିଶା ସରକାରଙ୍କ ପ୍ରୟାସର ସଫଳତାକୁ ଚାଷିଙ୍କ ପାଖରେ ପହଞ୍ଚାଇବା ପାଇଁ କୃଷି କ୍ରାନ୍ତି ଅଭିଯାନର ଲକ୍ଷ୍ୟ ରହିଛି।