22-Jun-2023

ବୀରମହାରାଜପୁର,( ବିନୋଦ ପାଣ୍ଡେ) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଅଞ୍ଚଳରେ ଭରି ରହିଛି ଖଣିଜ ସମ୍ପଦ।  କିନ୍ତୁ ଏହାର ସୁରକ୍ଷା ପାଇଁ ପ୍ରଶାସନ ପକ୍ଷରୁ ଉଦ୍ୟମ ନାହିଁ। ଗୋଟିଏ ପଟରେ ପ୍ରଶାସନ ଆନ୍ତରିକତା ଅଭାବ ଅନ୍ୟପଟେ କିଛି ପ୍ରଶାସନିକ ଅଧିକାରୀଙ୍କ ସହିତ ମାଫିଆ ଲିଙ୍କ ଯୋଗୁଁ ଖଣିଜ ସମ୍ପଦ ଲୁଟ ହେବାର ପ୍ରମୁଖ କାରଣ ପାଲଟି ଥିବା ଚର୍ଚ୍ଚା ହେଉଛି। ବୀରମହାରାଜପୁର ତହସିଲ ଅନ୍ତର୍ଗତ ବିଭିନ୍ନ ଅଞ୍ଚଳରୁ ପଥର ଓ ମୁରୁମ ଉତ୍ତୋଳନ କରାଯାଉଛି। ବେଆଇନ ଭାବରେ ବହୁଦିନ ହେବ  ଚୋରାଚାଲାଣ ହେଉଥିବା ଅଭିଯୋଗ ହେଉଛି। ଫଳରେ ପଥର ଓ ମୁରୁମ ମାଫିଆ ଲକ୍ଷ ଲକ୍ଷ ଟଙ୍କା ପ୍ରତି ବର୍ଷ ଲୁଟ କରି ଚାଲିଛନ୍ତି।‌ କିନ୍ତୁ ଏହାକୁ ସ୍ଥାନୀୟ ପ୍ରଶାସନ ନଜର ଆନ୍ଦାଜ କରି ଦେଇଛି। ତହସିଲ ଅଧିକାରୀ ଓ କର୍ମଚାରୀ ମାନେ ପଥର ଓ ମୁରୁମ ମାଫିଆ ଙ୍କୁ ସୁହାଇଲା ଭଲି କାର୍ଯ୍ୟ କରୁଥିବା ଗୁରୁତର ଅଭିଯୋଗ ହେଉଛି। ସେହିପରି ପଥର ଓ ମୁରୁମ ମାଫିଆଙ୍କ ବିରୋଧରେ ତହସିଲ ପ୍ରଶାସନ ପକ୍ଷରୁ ଠୋସ ପଦକ୍ଷେପ ନ ନେବା କାରଣରୁ ଦିନକୁ ଦିନ ଏହା ବଢ଼ିବାରେ ଲାଗିଛି ଏବଂ ରାଜସ୍ୱ ହରାଉଛନ୍ତି ସରକାର ତଥା ମାଲାମାଲ ହେଉଛନ୍ତି ମାଫିଆ ଓ କିଛି ପ୍ରଶାସନିକ ଅଧିକାରୀ।  ଭିଜିଲାନ୍ସ ତଦନ୍ତ ହେଲେ ପ୍ରକୃତ ଘଟଣା ପଦାକୁ ଆସିବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।