21-Jun-2023

ଉଲୁଣ୍ଡା(ଗୌରଚନ୍ଦ୍ର ପରିଛା): ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ପାତାଳୀ ଶ୍ରୀକ୍ଷେତ୍ର ଠାରେ ଶ୍ରୀ ଗୁଣ୍ଡିଚା ରଥ ଯାତ୍ରା ସୋମବାର ଅନୁଷ୍ଠିତ ହୋଇଛି l ନୀତି ନିର୍ଘଣ୍ଟ ଅନୁଯାୟୀ ସକାଳୁ ଦ୍ଵାରଫିଟା, ସୂର୍ୟ ଅର୍ଘ୍ୟ, ଦ୍ଵାରପାଳ ପୂଜା, ମଙ୍ଗଳ ଆଳତି ଏବଂ ଖେଚୁଡ଼ି ଭୋଗ ଅର୍ପଣ କରାଯାଇଥିଲା l ପରେ ଚତୁର୍ଦ୍ଧା ମୂର୍ତ୍ତିଙ୍କୁ ବେଶ କରାଯାଇ ଟାହିୟା ଲାଗି କରାଯାଇ ପାରମ୍ପରିକ ପୂଜାର୍ଚ୍ଚନା କରାଯାଇଥିଲା l ପରେ ଚତୁର୍ଦ୍ଧା ମୂର୍ତ୍ତିଙ୍କୁ ଧାଡ଼ି ପହଣ୍ଡିରେ ଅଣାଯାଇ ରଥାରୁଢ଼ କରାଯାଇଥିଲା l ଚଳିତ ବର୍ଷ ମଧ୍ୟ ମା ସୁଭଦ୍ରାଙ୍କ ରଥକୁ ମହିଳା ମାନେ ଟାଣିଥିଲେ l ଗଡତ୍ୟା ଚମରା ଅମାତ ଛେରାପହଁରା କରିଥିଲେ l ଅପରାହ୍ନ ସମୟରେ ଚତୁର୍ଦ୍ଧା ମୂର୍ତ୍ତୀ ଆଡ଼ପ ମଣ୍ଡପରେ ବିଜେ କରିଥିଲେ l ରାଜମଣି ସାହୁ, ମଇଥଳି ପଣ୍ଡା, ଭୂଷଣ ପାତ୍ର, ରାମକୃଷ୍ଣ ହୋତା, ନାରାୟଣ ଦେହୁରୀ, ଯୁଗଳ ମିଶ୍ର ଏବଂ କିଶୋର ହୋତା ଧାରା ବିବରଣୀ ପ୍ରଦାନ କରିଥିଲେ l ଅତିଥି ଭାବରେ ସୁବର୍ଣ୍ଣପୁର ଜିଲ୍ଲାପାଲ ବିମଳେନ୍ଦୁ  ରାଏ, ଏସପି ଅମରେଶ ପଣ୍ଡା, ଏସଡିପିଓ ଡୋଲାମଣି ଭୋଇ, ଉଲୁଣ୍ଡା ତହସିଲଦାର ଦିଲ୍ଲୀପ ମାଝୀ ଯୋଗଦେଇଥିଲେ l ଏହି ଅବସରରେ ଭଜନ ସନ୍ଧ୍ୟା ଅନୁଷ୍ଠିତ ହୋଇଥିଲା l ଶାନ୍ତି ଶୃଙ୍ଖଳା ରକ୍ଷାପାଇଁ ପୁଲିସ ମୁତୟନ ହୋଇଥିବା ବେଳେ ଭକ୍ତ ମାନଙ୍କ ପାଇଁ ସ୍ବାସ୍ଥ୍ୟ ସେବା, ଅଗ୍ନିଶମ ସେବା ଏବଂ ପାନୀୟ ଜଳ ବ୍ୟବସ୍ଥା କରାଯାଇଥିଲା l ହଜାର ହଜାର ଭକ୍ତଙ୍କ ସମାଗମ ହୋଇଥିବା ବେଳେ ଟ୍ରଷ୍ଟର କର୍ମକର୍ତ୍ତା ମାନେ ସହଯୋଗ କରିଥିଲେ l