12-Jun-2023

ବଲାଙ୍ଗିର(ଦେବାଶିଷ ବହିଦାର) - ଭୀମଭୋଇ ମେଡିକାଲ କଲେଜ ଓ ହସ୍‌ପିଟାଲର କିଛି ବିଭାଗର ଚିକିତ୍ସାକୁ ନେଇ ଅବହେଳା ହେଉଥିବାର ବାରମ୍ବାର ଅଭିଯୋଗ ହେଉଛି । ଏହା ସତ୍ୟାସତ୍ୟ ଜାଣିବା ନିହାତି ଦରକାର । ବିଶେଷ କରି ଅସ୍ତିଶଲ୍ୟ, ଶଲ୍ୟ, ସ୍ତ୍ରୀ ଓ ପ୍ରସୁତି ବିଭାଗରେ ଚିକିତ୍ସାକୁ ନେଇ ଅବହେଳା ହେଉଥିବାର ଅଭିଯୋଗ ରୋଗୀଙ୍କ ସମେତ ସମାଜର ବିଭିନ୍ନ ବର୍ଗର ଲୋକେ ଲୋକଙ୍କ ପାଖକୁ ଆସୁଛି । ତେଣୁ ଏହାର ଉପରେ ଆଲୋଚନା ତଥା ଏ ସମସ୍ୟାର ସମାଧାନ ର ବାଟ ବାହାର କରିବା ପାଇଁ ମାନ୍ୟବର ବଲାଙ୍ଗିର ବିଧାୟକ ନରସିଂହ ମିଶ୍ର ସ୍ଥାନୀୟ ମେଡିକାଲ କଲେଜର ଏଡ୍‌ମିନିଷ୍ଟେଟିଭ୍ କୋଠାରେ ଅବସ୍ଥିତ କାର୍ଯ୍ୟାଳୟରେ କଲେଜ ଡିନ୍ ଡା. ସବିତା ମହାପାତ୍ର ଏବଂ ସୁପରିଟେଣ୍ଡଣ୍ଟ ଡା. ମାନସି ପଣ୍ଡାଙ୍କ ସହ ଆଲୋଚନା କରିଛନ୍ତି । ବିଧାୟକ ଶ୍ରୀ ମିଶ୍ରଙ୍କ ପାଖକୁ ରୋଗୀଙ୍କ ସମେତ ସାଧାରଣ ନାଗରିକ ସମାଜ ମେଡିକାଲ କଲେଜ ଓ ହସ୍‌ପିଟାଲରେ ସର୍ଜରୀ ବିଭାଗରେ ସର୍ଜରି ପାଇଁ ଟଙ୍କା ଦାବି କରୁଥିବା ଅଭିଯୋଗ ସହ ସାଧାରଣ ସର୍ଜରୀ ପାଇଁ ମାସ ମାସ ଅପେକ୍ଷା କରିବାକୁ କହୁଥିବା ଅଭିଯୋଗ ଆସିଛି । ଏପରି କି ମେଡିକାଲ କଲେଜ ହସ୍‌ପିଟାଲ ଆରମ୍ଭ ହେଲା ଦିନରୁ ସହର ମଧ୍ୟରେ ଗଢି ଉଠିଥିବା ଛୋଟ ବଡ ଘରୋଇ ଡାକ୍ତରଖାନାକୁ କିଛି ନିର୍ଦ୍ଦିଷ୍ଟ ବିଭାଗର ଡାକ୍ତରମାନେ ଦଲାଲଙ୍କ ମାଧ୍ୟମରେ ରୋଗୀଙ୍କୁ ଚିକିତ୍ସା ତଥା ସର୍ଜରୀ ପାଇଁ ପ୍ରବର୍ତ୍ତଉଥିବାର ଅଭିଯୋଗ ଆସୁଛି ।

ଏଣୁ ଏପରି ସର୍ଜରି ଗୁଡାକ ମେଡିକାଲ କଲେଜରେ ନ କରାଇ କାହିଁକି ଘରୋଇ ଡାକ୍ତରଖାନାମାନଙ୍କୁ ପଠାଯାଉଛି ବୋଲି ବିଧାୟକ ଶ୍ରୀ ମିଶ୍ର ପ୍ରଶ୍ନ କରିଥିଲେ । ଆଲୋଚନା ସମୟରେ ହୃଦରୋଗୀଙ୍କ ପାଇଁ ଦରକାର ହେଉଥିବା ଇସିଜି, ଆଶୁ ଚିକିତ୍ସା ବିଭାଗରେ ଉପଲବ୍ଧ ନ ହେଉଥିବାର ଆଲୋଚନା ହୋଇଥିଲା । ଆଗକୁ ଯେପରି ହୃଦ ରୋଗୀମାନେ ଠିକ୍ ହିସାବରେ ଇସିଜିର ସୁବିଧା ପାଇ ପାରିବେ ତାର ଉପରେ ଧ୍ୟାନ ଦେବାକୁ ବିଧାୟକ ଶ୍ରୀ ମିଶ୍ର ନିର୍ଦ୍ଦେଶ ଦେଇଥିଲେ । ଡାଏଲେସିସ ବିଭାଗ, ଡାକ୍ତର ସମସ୍ୟା ତଥା ଅନ୍ୟାନ୍ୟ ପଦବୀ ଗୁଡିକ ସ୍ଥିତି ଉପରେ ମଧ୍ୟ ଆଲୋଚନା ହୋଇଥିଲା । ଆଗକୁ ଯେମିତି ହାଇଡ୍ରୋସିଲ, ହାର୍ନିଆ, ଗଲ ବ୍ଲଡର ଷ୍ଟୋନ ସହ ଅର୍ଥୋପେଡିକ ସର୍ଜରୀ ଗୁଡାକ ଠିକ୍ ହିସାବରେ ହୋଇପାରିବ ସେ ଉପରେ ଡାକ୍ତରମାନେ ଧ୍ୟାନ ଦିଅନ୍ତୁ ବୋଲି ବିଧାୟକ ଶ୍ରୀ ମିଶ୍ର ଉପସ୍ଥିତ ଡିନ୍ ଓ ସୁପରିଟେଣ୍ଡଣ୍ଟ ଙ୍କୁ ନିର୍ଦ୍ଦେଶ ଦେଇଥିଲେ । ଆଜିର ଏହି ଆଲୋଚନା ସମୟରେ ବିଧାୟକ ଶ୍ରୀ ମିଶ୍ର, ମେଡିକାଲ କଲେଜର ସୁପରିଟେଣ୍ଡଣ୍ଟ ଡା. ପଣ୍ଡା, ଡିନ୍ ଡା. ମହାପାତ୍ର ଏବଂ ବିଧାୟକଙ୍କ ସ୍ୱାସ୍ଥ୍ୟ ପ୍ରତିନିଧି ମନୀଷ ମିଶ୍ର ଉପସ୍ଥିତ ଥିଲେ ।