04-May-2023

ପାଟଣାଗଡ଼(ଦିଲୀପ ପଣ୍ଡା): ପାଟଣାଗଡ଼ ବ୍ଲକ ଖୁଣ୍ଟସମଲାଇ ନିରଞ୍ଜନ ଭୋଇ ଉଚ୍ଚ ବିଦ୍ୟାଳୟରେ ଜଣେ ଶିକ୍ଷୟିତ୍ରୀ ଏକ ନକଲି ବିଇଡି ସାର୍ଟିଫିକେଟ ଦେଇ ଦୀର୍ଘ ବର୍ଷରୁ ଶିକ୍ଷକତା କରିଆସୁଥିବା ନେଇ ଜିଲ୍ଲା ଶିକ୍ଷା ଅଧିକାରୀଙ୍କ ଠାରେ ଗ୍ରାମବାସୀ ମାନେ ଅଭିଯୋଗ କରିଛନ୍ତି ।

  ଅଭିଯୋଗ ଅନୁସାରେ ୨୦୦୨ ମସିହାରେ ଗ୍ରାମବାସୀ ମାନଙ୍କ ଦ୍ଵାରା ପ୍ରତିଷ୍ଠିତ ହୋଇଥିବା ଏହି ସ୍କୁଲ ୨୦୦୭-୦୮ ମସିହାରେ ବ୍ଲକ ଗ୍ରାଣ୍ଟ ପାଇଥିଲା । ସେହିଦିନଠାରୁ ଜାନକୀ ବେହେରା ନାମକ ଜଣେ  ଶିକ୍ଷୟିତ୍ରୀ ଛତିଶଗଡ ରାଜ୍ୟର ଏକ ଘରୋଇ ଶିକ୍ଷା ଅନୁଷ୍ଠାନ ( ଡ.ସି.ଭି.ରମନ ୟୁନିଭରସିଟି, ବିଲାସପୁର) ରୁ ଏକ ନକଲି ବିଇଡି ସାର୍ଟିଫିକେଟ ଦେଇ ଉକ୍ତ ସ୍କୁଲରେ ଆଜି ପର୍ଯ୍ୟନ୍ତ ଶିକ୍ଷକତା କରିଆସୁଛନ୍ତି । ଏପରିକି ଶିକ୍ଷୟିତ୍ରୀ ଜଣକ ୨୦୧୩-୧୪ ମସିହାରେ ଜାମ୍ମୁର ଏକ ଘରୋଇ ଶିକ୍ଷା ଅନୁଷ୍ଠାନ ( ଅଟୋନୋମସ୍ କଲେଜ ଅଫ ଏଜୁକେସନ, ଜାମ୍ମୁ ) ରେ ନାମ ଲେଖାଇ ପରୀକ୍ଷା ଦେଇଥିଲେ । କିନ୍ତୁ ସେଠାରେ ସେ ଦେଇଥିବା ପରିକ୍ଷାରେ ଫେଲ୍ ହୋଇଥିଲେ । ପୁଣି ସେହି ବର୍ଷ ( ୨୦୧୩-୧୪ ) ମସିହାରେ ଛତିଶଗଡ ରାଜ୍ୟର ଡ.ସି.ଭି ରମନ ୟୁନିଭରସିଟି, ବିଲାସପୁରରେ ପୁଣି କିପରି ପାଠ ପଢି ଏହି ବିଇଡି ସାର୍ଟିଫିକେଟ ହାତେଇଛନ୍ତି ତାହା ତଦନ୍ତ ସାପେକ୍ଷ । ଶିକ୍ଷୟତ୍ରୀ ଜଣକ ୧୬-୮-୨୦୧୩  ମସିହାରୁ ୨୬-୮-୨୦୧୪ ମସିହାରେ ନିଜେ ବିଇଡି କରିବାପାଇଁ ସ୍କୁଲରୁ ଛୁଟି ନେଇଥିଲେ । କିନ୍ତୁ ସେହି ମସିହାରେ ଶିକ୍ଷୟିତ୍ରୀ ଜଣକ ସ୍କୁଲରେ ଛାତ୍ରଛାତ୍ରୀମାନଙ୍କୁ ଶିକ୍ଷାଦାନ କରିଥିବା ବିଦ୍ୟାଳୟରେ ଥିବା ଶିକ୍ଷକ ଉପସ୍ଥାପନ ରେଜିଷ୍ଟ୍ରରରେ ତାଙ୍କ ଦସ୍ତଖତ ମାନଥିବା ଅଭିଯୋଗପତ୍ରରେ ଉଲ୍ଲେଖ ରହିଛି । ଏହିସବୁ ପ୍ରକିୟାରୁ ଶିକ୍ଷୟିତ୍ରୀ ଜଣକ ନକଲି ସାର୍ଟିଫିକେଟ ଦେଇ ଚାକିରୀ ହାତେଇ ଥିବା ଅଭିଯୋଗ ହେଉଛି । ଏସମ୍ପର୍କରେ ଜିଲ୍ଲା ଶିକ୍ଷା ଅଧିକାରୀ ଧୁବଚରଣ ବେହେରାଙ୍କୁ ପଚାରିବାରୁ କିଛି ସମୟ ସେ ନିରବ ରହିବାପରେ ମୋ ପାଖକୁ ସେମିତି କିଛି ଅଭିଯୋଗ ଆସିନାହିଁ । ଯଦି ଆପଣଙ୍କ ପାଖରେ ଅଭିଯୋଗ ପତ୍ର ଅଛି ତାହେଲେ ମୋ ହ୍ୱାଟସ୍  ଆପ ନମ୍ଵର୍ପ କୁ ପଠାନ୍ତୁ ବୋଲି କହିଥିଲେ । ଘଟଣା ସମ୍ପର୍କରେ ପାଟଣାଗଡ଼ ବ୍ଲକ ଶିକ୍ଷା ଅଧିକାରୀ ଶଙ୍କରପ୍ରଶାଦ ମାଝି ଜିଲ୍ଲା ଶିକ୍ଷା ଅଧିକାରୀଙ୍କ ଚିଠିକ୍ରମେ ଏବିଇଓ ଙ୍କ ସହ ଡିଲିଙ୍ଗ ଆସିଷ୍ଟାଣ୍ଟ କୁ ନେଇ ମୁଁ ନିଜେ ତଦନ୍ତ ପାଇଁ  ଯାଇଥିଲି । ତଦନ୍ତ ପରେ ଜିଲ୍ଲା ଶିକ୍ଷା ଅଧିକାରୀଙ୍କୁ ତଦନ୍ତ ସମ୍ପର୍କିତ ସମସ୍ତ ରିପୋର୍ଟ ଦେଇଥିବା ସେ ପ୍ରକାଶ କରିଛନ୍ତି । ଏଠାରେ ପ୍ରଶ୍ନ ଉଠୁଛିଯେ ବ୍ଲକ ଶିକ୍ଷା ଅଧିକାରୀ ତଦନ୍ତ ରିପୋର୍ଟ ଦେବାପରେ ମଧ୍ୟ ଜିଲ୍ଲା ଶିକ୍ଷା ଅଧିକାରୀ କାହିଁକି ମୋ ପାଖକୁ ଏମିତି କିଛି ଅଭିଯୋଗ ଆସିନାହିଁ , ଅଭିଯୋଗ ପତ୍ର ଥିଲେ ମୋ ପାଖକୁ ପଠାନ୍ତୁ ବୋଲି କହିବା ପଛରେ କି ରହସ୍ୟ ଲୁଚିରହିଛି  । ବାସ୍ତବରେ କଣ ଜିଲ୍ଲା ଶିକ୍ଷା ଅଧିକାରୀ ନକଲି ଶିକ୍ଷୟିତ୍ରୀ ଙ୍କୁ ଘଣ୍ଟଘୋଡାଉଛନ୍ତି କି , ଏଥିପ୍ରତି ଜିଲ୍ଲାପାଳ ଦୃଷ୍ଟି ଦେଇ ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି ହେଉଛି ।