05-Mar-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ) ଆଦିବାସୀ କଲ୍ୟାଣ ବିଭାଗର ଏକ ଆଶ୍ରମସ୍କୁଲରେ ଜଣେ ୯ମ ଶ୍ରେଣୀର ଛାତ୍ରୀକୁ ଅବୈଧ ଗର୍ଭବତୀ କରିବା ଅଭିଯୋଗରେ ଜଣେ ଅଣଛାତ୍ରକୁ ସଦରଥାନା ପୁଲିସ୍ ଗିରଫ କରି କୋର୍ଟଚାଲାଣ କରିଛି ।  ତେବେ ଏଥିପାଇଁ  କାହାକୁ ଦାୟୀ କରାଯାଇ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ଦୀର୍ଘ ପ୍ରାୟ ୪/ ୫ ମାସକାଳ ଛାତ୍ରୀନିବାସର ଜଣେ ନାବାଳିକା ଛାତ୍ରୀ ଗର୍ଭବତୀ ହୋଇପଡି ହଷ୍ଟେଲରେ ରହିବା, ତା'କୁ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶରେ ସ୍କୁଲ୍ କର୍ତ୍ତୃପକ୍ଷ ଅବୈଧ ଗର୍ଭପାତ କରାଇବା ଓ  ଶେଷରେ ଏଥିଯୋଗୁଁ ଛାତ୍ରୀଟିର ସ୍ବାସ୍ଥ୍ୟାବସ୍ଥା ସଂକଟାପନ୍ନ ହୋଇପଡିବାରୁ ତାକୁ ବାଧ୍ୟହୋଇ ଭୀମଭୋଇ ମେଡିକାଲ କଲେଜର ହାସପାତାଳରେ ଭର୍ତ୍ତି କରାଇବା ଓ ଏପରି ବିଭାଗୀୟ ଚରମ ବିଶୃଙ୍ଖଳାକୁ ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶରେ ଗୋପନ ରଖିବାଦି ବେନିୟମ୍ କାର୍ଯ୍ୟକଳାପ ସତ୍ତ୍ୱେ ଅଦ୍ୟାବଧି ବିଭାଗ ପକ୍ଷରୁ କାହାରି ଉପରେ କୌଣସି ପ୍ରକାର ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ନ କରିବା, ଆଶ୍ଚର୍ଯ୍ୟଜନକ କଥା । କିଛିବର୍ଷତଳେ ଏଇପରି ଏକ ଘଟଣାରେ ରାମଚନ୍ଦ୍ରପୁର ଆଶ୍ରମସ୍କୁଲରେ ୩ ଜଣ ଶିକ୍ଷକ/ ଶିକ୍ଷୟିତ୍ରୀ ଓ କର୍ମଚାରୀଙ୍କୁ ନିଲମ୍ବନ କରାଯାଇଥିବାବେଳେ, ଏହି ଘଟଣାରେ କର୍ତ୍ତୃପକ୍ଷ ନୀରବ କାହିଁକି ବୋଲି ପ୍ରଶ୍ନ ଉଠୁଛି ।  ଗଣମାଧ୍ୟମରେ ବାରମ୍ବାର ଚର୍ଚ୍ଚିତ ଏଭଳି ଘଟଣାଟିକୁ  ବିଧାନସଭା ଚାଲିଥିବା କାଳରେ  ଆଦିବାସୀ ସଂଘ ପକ୍ଷରୁ ଜିଲ୍ଲାପାଳଙ୍କୁ ଜିଲ୍ଲା କଲ୍ୟାଣ ଅଧିକାରୀଙ୍କୁ ଗିରଫ ଦାବି ସତ୍ତ୍ୱେ ଏଭଳି ଏକ ଅତ୍ୟନ୍ତ ସମ୍ବେଦନଶୀଳ ଘଟଣାକୁ ପ୍ରାଶାସନିକ ନିର୍ଦ୍ଦେଶରେ ସରକାରୀ ସ୍କୁଲର ତଥ୍ୟ ପ୍ରଘଟ ନ କରିବାକୁ ନୋଟିସ୍ ଦିଆଯାଇ ଚପାଇ ଦିଆଯିବା ଗୁରୁତର ବିଷୟ  ! ଏ ସମ୍ପର୍କରେ କାହିଁକି ଜିଲ୍ଲାର ଟାଣୁଆ ନେତା, ବିଧାୟକ, ସାଂସଦ, ନିର୍ବାଚିତ ଲୋକ ପ୍ରତିନିଧିମାନେ ତୁଣ୍ଡରେ ତୁଣ୍ଡିବାନ୍ଧି ବସିଛନ୍ତି, ତାହା ରହସ୍ୟମୟ  ଓ ଭିନ୍ନଦିଗକୁ ଇଙ୍ଗିତ କରୁଛି  । 
ଉଲ୍ଲେଖନୀୟ ଯେ, ଏ ସମ୍ପର୍କରେ ପଚାରିବାରୁ ସମ୍ପୃକ୍ତ ଚୂଡାପାଲି ଆଶ୍ରମସ୍କୁଲ୍ ର ପ୍ରଧାନସେବକ କୁଶଳେଶ୍ବର ମିଶ୍ର ଆମ ପ୍ରତିନିଧିଙ୍କୁ ଏହି ବିଷୟରେ କିଛି ନ କହିବାକୁ ଆମକୁ ଜିଲ୍ଲାପାଳ ଓ ଡିଡବ୍ଲୁଓ ନିର୍ଦ୍ଦେଶ ଦେଇଥିବା ପ୍ରକାଶ କରିଥିବାବେଳେ, ଗଣମାଧ୍ୟମର ପ୍ରତିନିଧିମାନେ ଜିଲ୍ଲାକାର୍ଯ୍ୟାଳୟରେ ଜିଲ୍ଲା କଲ୍ୟାଣଅଧିକାରୀ ଅଲେଖ ବିଶ୍ବାଳଙ୍କୁ ପଚାରିବାରୁ ସେ ମଧ୍ୟ ଏହା ପ୍ରଘଟ ନ କରିବାକୁ ଉପରୁ ନିର୍ଦ୍ଦେଶ ଦିଆଯାଇଥିବା କହିବା ସହିତ ' ସେ କୋଉ

ଗାଁ'ର ଇତ୍ୟାଦି ସବୁ ତ ଆପଣମାନେ ଜାଣନ୍ତି , ଆମେ ଛାତ୍ରୀଟିର ଅସୁସ୍ଥତା ଯୋଗୁଁ ତାକୁ ଡାକ୍ତରଖାନାକୁ ନେଲୁଁ  । ଏଥିରେ କାହାରି ଦୋଷତ୍ରୁଟି ନାଇଁ ।  ଏଭଳି ଘଟଣା ନିୟମିତ ହେଉଛି କି ? ମୋ' ଉପରେ ଯାହା କାର୍ଯ୍ୟନୁଷ୍ଠାନ ନେବାକଥା, ସରକାର ନେବେ । ଆମର କିଛି ଭୁଲ୍ ନାହିଁ । ଇତ୍ୟାଦି କହି ଚିହିଁକି ଉଠିଥିଲେ । ଏଥିରୁ ଏହି ଘଟଣାଟିକୁ ଉପରସ୍ତରରୁ ଚପାଇ ଦିଆଯାଇଥିବା ଓ ତାଙ୍କୁ ନିର୍ଭୟ ଦିଆଯାଇଥିବା ସ୍ପଷ୍ଟ ।

ତେବେ ସୁରକ୍ଷା କଡାକଡି ରହିଥିବା ଏକ ସରକାରୀ ଆଦିବାସୀ କଲ୍ୟାଣ ଆବାସିକ ଶିକ୍ଷାନୁଷ୍ଠାନରେ ଏଭଳି ଏକ ଅତ୍ୟନ୍ତ ସମ୍ବେଦନଶୀଳ ଅବୈଧ ଘଟଣାକୁ ସରକାର ଗୁରୁତ୍ୱ ଦେଉ ନଥିବା  ଓ ଗାଇଡ୍ ଲାଇନ୍ ଆଳରେ ପ୍ରଘଟ ନ କରିବାକୁ ସ୍କୁଲ୍ ରେ ବିଭାଗୀୟ ନିର୍ଦ୍ଦେଶରେ ନୋଟିସ୍ ବୁଲାଯିବା ଜିଲ୍ଲାର ପ୍ରଶାସନିକ ଅବ୍ୟବସ୍ଥାର କିପରି ନମୁନା ବୋଲି ଜନସାଧାରଣ ପ୍ରଶ୍ନ ଉଠାଇଛନ୍ତି ।