03-Mar-2023

ଗଣିଆ/(ବିଜଯ ଲଷ୍ମୀ ରାଉତ )/  ଝିଅ ପାଇଁ ବନ୍ଧୁ ପ୍ରସ୍ତାବ ଦେଖିବାକୁ ଆସି ପିକଅପ ଭ୍ୟାନ ଧକ୍କାରେ ବାପାର ମୃତ୍ୟୁ ଘଟିଛି ‌।  ସକାଳେ ଜୀବନ୍ତ ଥିବା ଲୋକଟି ଅପରାହ୍ନରେ ଶବ ହୋଇ ଫେରିଛି ‌। ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଗଣିଆରେ । ଘରେ ନିଜ ଝିଆରିର ବାହାଘର ପାଇଁ କୁଣିଆ ଭର୍ତ୍ତି ହୋଇଥିବା ବେଳେ ନିଜ ଝିଅ ପାଇଁ ବନ୍ଧୁ ପ୍ରସ୍ତାବ ଦେଖିବାକୁ ଆସିଥିଲେ କଣ୍ଟିଲୋ ଫାଣ୍ଡି ଅନ୍ତର୍ଗତ ଖପରମଲ୍ଲ ଗ୍ରାମର ମହେଶ୍ବର ବେହେରା । ମହେଶ୍ବର କିଶୋର ପ୍ରସାଦ ଗ୍ରାମରେ ବନ୍ଧୁ ଦେଖି ସାରି ଘରକୁ ଫେରିବା ସମୟରେ କିଶୋର ପ୍ରସାଦ ପଞ୍ଚାୟତ ସମ୍ମୁଖରେ ବୀପରିତ ଦିଗରୁ ଦ୍ରୁତ ଗତିରେ ଆସୁଥିବା ଏକ ପିକଅପ ଭ୍ୟାନ ମହେଶ୍ୱରଙ୍କୁ ଧକ୍କା ଦେଇ କିଛି ବାଟ ଘୋଷାରି ନେଇ ବିଦ୍ୟୁତ୍ ଖୁଣ୍ଟରେ ପିଟିଥିଲା । ଏପରିକି ମହେଶ୍ୱର ପିକଅପ ଚକା ତଳେ ଚାପିହୋଇ ଥିଲେ ‌। ଏକ ଜେସିପି ସାହାଯ୍ୟରେ ଭ୍ୟାନ ଟିକୁ ଉପରକୁ ଟେକି ମହେଶ୍ୱରଙ୍କୁ ଉଦ୍ଧାର କରାଯାଇଥିବା ବେଳେ ଦମକଳ ସାହାଯ୍ୟରେ ଗଣିଆ ମେଡ଼ିକାଲକୁ ଆଣିଥିଲେ । ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଅପରପକ୍ଷେ ସେହି ସ୍ଥାନରେ କାମ କରୁଥିବା କିଶୋର ପ୍ରସାଦ ଗ୍ରାମର ପ୍ରଭାତ କୁମାର ସାହୁଙ୍କ ବାମ ଗୋଡ଼ରେ ଗଭୀର ଆଘାତ ଲାଗି  ଗୋଡ଼ କଟି ଯାଇଥିବାରୁ ତାଙ୍କୁ ନୟାଗଡ ସ୍ଥାନାନ୍ତର କରାଯାଇଥିଲା । ଏଭଳି ଅଘଟଣରେ ଉତ୍ୟକ୍ତ ହୋଇ ସ୍ଥାନୀୟ ଲୋକେ ରାସ୍ତାରେ ଟାୟାର ଜାଳି କ୍ଷତିପୂରଣ ଦାବି କରିଥିଲେ । ଘଟଣାସ୍ଥଳରେ ଅତିରିକ୍ତ ତହସିଲଦାର ବନମାଳୀ ପରିଡା, ଥାନା ଏସଆଇ ବିରେନ୍ଦ୍ର କୁମାର ଦେହୁରୀ, ସାମାଜିକ କର୍ମୀ ବିଜୟ କୁମାର ବେହେରା,ଅକ୍ରୁର ବେହେରା ପ୍ରମୁଖ ପହଞ୍ଚି ଜନସାଧାରଣଙ୍କୁ ବୁଝାସୁଝା କରିବା ସହିତ ରେଡକ୍ରସ ପାଣ୍ଠିରୁ ୧୦ ହଜାର ଟଙ୍କା, ଦୁର୍ଘଟଣା ଘଟାଇଥିବା ଡ୍ରାଇଭରକୁ କୋର୍ଟ ଚାଲାଣ ତଥା ସରକାରୀ ଭାବେ ସମସ୍ତ ସହାୟତା ପ୍ରଦାନ ପ୍ରତିଶୃତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା । ପଞ୍ଚାୟତ ଘର ଭିତରେ ଅଟକ ଥିବା ପିକଅପ ଡ୍ରାଇଭରକୁ ପୋଲିସ ନିଜ ଅକ୍ତିଆରକୁ ନେଇଥିଲେ । ତେବେ ଏଭଳି ମୃତ୍ୟୁରେ ଅଞ୍ଚଳରେ ଶୋକର ଛାୟା ଖେଳିଯାଇଛି ।