01-Mar-2023

-ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)
ରଙ୍ଗ ଓ ସୂତାର ଯାଦୁକର ପଦ୍ମଶ୍ରୀ ଚତୁର୍ଭୁଜ ମେହେର ନିଜର କଳା କାରୀଗରୀକୁ ନେଇ ସବୁବେଳେ ଚର୍ଚ୍ଚାରେ ରହି ଆସିଛନ୍ତି ।କଳାକାରିଗରୀ ସାମ୍ନାରେ ଯେ ବୟସ ବାଧକନୁହେଁ ତାହା ପୁଣିଥରେ ପ୍ରମାଣିତ କରିଛନ୍ତି ଶିଳ୍ପୀ ଗୁରୁ ଡଃ ଚତୁର୍ଭୂଜ। ବୟସ ୯୨ ଛୁଇଁଥିଲେ ହେଁ ଏବେ ବି ଫୁରସତ ଦେଖି ତନ୍ତରେ ବୁଣି ପକାଉଛନ୍ତି ନିଜ ପରିକଳ୍ପିତ ବାନ୍ଧ ବସ୍ତ୍ର । ଆଉ ଏଇ ନିକଟରେ ନିଜେ ବୁଣିଥିବା କାଞ୍ଚି ଅଭିଯାନ ୱାଲ ହ୍ୟାଙ୍ଗିଗ୍ କୁ ମହାମହିମ ରାଷ୍ଟ୍ରପତିଙ୍କୁ ଭେଟି ଦେଇ ପୁଣି ଥରେ ଚର୍ଚ୍ଚା ରେ ପଦ୍ମଶ୍ରୀ ଡ଼ଃ ଚତୁର୍ଭୁଜ ମେହେର । 
ସୁବର୍ଣ୍ଣପୁରୀ ବାନ୍ଧକଳା ଓ ବୟନ ଶିଳ୍ପକୁ ପ୍ରସିଦ୍ଧି ଦେବାରେ ସୁବର୍ଣ୍ଣପୁରର ପ୍ରଖ୍ୟାତ ଶିଳ୍ପୀ ପଦ୍ମଶ୍ରୀ ଡ଼ଃଚତୁର୍ଭୁଜ ମେହେରଙ୍କ ଅବଦାନ ସର୍ବଜନ ସ୍ୱୀକାର୍ଯ୍ୟ । ନିକଟ ଅତୀତରେ ମହାମହିମ ରାଷ୍ଟ୍ରପତିଙ୍କ ଓଡିଶା ଆଗମନ ସମୟରେ ସେ ହାତ ତିଆରି କାଞ୍ଚି ବିଜୟ ୱାଲ ହେଗିଂଗ୍ କୁ ଉପହାରରେ ଦେଇ ପୁଣି ଥରେ ଚର୍ଚ୍ଚାକୁ ଆସିଛନ୍ତି । ପ୍ରାୟ ଏକ ବର୍ଷଧରି ବୁଣା ହେଇଥିବା ୯ଫୁଟ ଲମ୍ବ ଓ ଚଉଡାର ଏହି ଅନନ୍ୟ ବାନ୍ଧକଳାରେ ଜଗତରନାଥ ଜଗନ୍ନାଥଙ୍କ କାଞ୍ଚି ଅଭିଯାନର କଥା ଓ କବିତାକୁ ଚିତ୍ରଣ କରାଯାଇଥିବାବେଳେ ରଙ୍ଗ ଓ ସୂତା ସହ ପାରମ୍ପରିକ ବାନ୍ଧକଳାର ଏକ ନିଆରା ନିର୍ଦଶନ ଦେଖାଇବା ରେ ଟିକିଏ ବି ହେଳାକରିନାହାନ୍ତି । ନିଜସ୍ୱ ଅନେକ ସୃଜନକୁ ରାଜ୍ୟ ତଥା ଦେଶର ପ୍ରତିଷ୍ଠିତ ବ୍ୟକ୍ତି ବିଶେଷଙ୍କୁ ଉପହାରରେ ଦେଇଥିଲେହେଁ ଓଡିଶା ମାଟିର ଝିଅ ମହାମହିମ ରାଷ୍ଟ୍ରପତି ଦ୍ରୋପଦୀ ମୁର୍ମୁଙ୍କୁ ଏହି କାଞ୍ଚି ଅଭିଯାନ କଳାକୁ ଭେଟିଦେଇ ନିଜକୁବହୁତ ଖୁସି ଲାଗୁଛି ବୋଲି କହିଛନ୍ତି ପଦ୍ମଶ୍ରୀ ଡ଼ଃ ଚତୁର୍ଭୁଜ ମେହେର ।
ସେ ଏବେ ସୁବର୍ଣ୍ଣପୁର ଘରେ ରହୁଛନ୍ତି  ବୟସ ୯୨କୁ ଛୁଇଁଛି ହେଲେ ଶିଳ୍ପ ଚେତନାରେ ବିରାମ ନାହିଁ । ଏବେ ବି ଟିକିଏ ଫୁରସତ ହେଲେ ମଙ୍ଗାରେ ବସି ବୁଣିପକାଉଛନ୍ତି କୁଟୀକାମର ବସ୍ତ୍ର । ସୂତାର ତାନ ମାନ ଧରି ବାନ୍ଧି ପକାଉଛନ୍ତି ବିଭିନ୍ନ ପ୍ରକାର ଡିଜାଇନର ବାନ୍ଧକଳା । ବୟନ ଶିଳ୍ପକୁ ନେଇ ସମର୍ପିତ ପଦ୍ମଶ୍ରୀ ଡ଼ଃ ଚତୁର୍ଭୁଜଙ୍କ ସାଧନା ଓ ଅଧ୍ୟବସାୟ ଆଗାମୀ ପିଢିପାଇଁ ପ୍ରେରଣା ଦେବ ନିଶ୍ଚୟ ।