28-Feb-2023

ବରଗଡ଼(ନିରଞ୍ଜନ ତ୍ରିପାଠୀ ): ସ୍ଥାନୀୟ ବିଦ୍ୟାବିହାର ସ୍ଥିତ ଇମ୍ପରିୟଲ କଲେଜ ପରିସରରେ ଥିବା ଚାଣକ୍ୟ ହଲଠାରେ ଇସ୍କନ ଓ ଇମ୍ପରିୟଲ କଲେଜର ମିଳିତ ପ୍ରୟାସରେ ଛାତ୍ରଛାତ୍ରୀମାନଙ୍କ ପାଇଁ ‘ଜୀବନର ଲକ୍ଷ୍ୟ’ ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଇସ୍କନର କୋଲକତାରୁ ଆସିଥିବା ଶ୍ରୀଧାମ ପ୍ରଭୁ ମୁଖ୍ୟବକ୍ତା ଭାବରେ ଯୋଗଦେଇଥିଲେ । କଲେଜର ଅଧ୍ୟାପିକା ଝରଣା ମିଶ୍ରଙ୍କ ପରିଚାଳନାରେ ଅନୁଷ୍ଠିତ କାର୍ଯ୍ୟକ୍ରମରେ ଶ୍ରୀଧାମ ପ୍ରଭୁ କହିଥିଲେ ଯେ ବର୍ତମାନ ସଂପୂର୍ଣ୍ଣ ମାନବ ସମାଜ ସୁଖପ୍ରାପ୍ତି ପାଇଁ ଯେଉଁ ରାସ୍ତାକୁ ବାଛୁଛି ତାହା ପ୍ରକୃତ ମାର୍ଗ ନୁହେଁ । ଜୀବନରେ ଲକ୍ଷ୍ୟ ହାସିଲ କରିବା ପାଇଁ କେବଳ ଭୌତିକ ଦୁନିଆ ଭିତରୁ ସୁଖ ଖୋଜିଲେ ଏହା କେବେ ବି ପ୍ରାପ୍ତ ହୋଇପାରିବ ନାହିଁ । ପୌରାଣିକ ବିଷୟ ବସ୍ତ୍‌ୁରୁ ଅନେକ ଉଦାହରଣ ଦେଇ ବର୍ତମାନ ଆଧୁନିକ ସମାଜ ପର୍ଯ୍ୟନ୍ତ ପ୍ରକୃତ ସୁଖର ପରିଭାଷା କେବେ ବି ପରିବର୍ତନ ହୋଇନାହିଁ । ନିଜର ସ୍ୱାର୍ଥ ଓ ଲୋଭ ଯୋଗୁଁ ମଣିଷ ହିଁ ଏହାକୁ ପରିବର୍ତନ କରିଛି । ତେଣୁ ଜୀବନରେ ଲକ୍ଷ୍ୟ ପ୍ରାପ୍ତି ପାଇଁ ସତ୍ୟ, ନିଷ୍ଠା ଓ ପରିଶ୍ରମ କରିବାକୁ ସେ ଛାତ୍ରଛାତ୍ରୀମାନଙ୍କୁ ଉପଦେଶ ଦେଇଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଇସ୍କନ ପକ୍ଷରୁ ରାଜେନ୍ଦ୍ର ହରିଦାସ , ନରହରି ଦାସ, ଦିନାନାଥ ଦାସ, ରସରାଜ ରାଧିକେଶ ଦାସ, ପୁରୁଷୋତ୍ତମ ଦାସ, ଚିରଞ୍ଜିବ ନାମଦେବ ଯୋଗ ଦେଇଥିଲେ । ଏହି ଅବସରରେ କଲେଜର ଚେୟାରମେନ ଦିପକ ଗୋୟଲ ଓ ଅଧ୍ୟକ୍ଷ ଦୁର୍ଗେଶ ଶତପଥୀ ଉପସ୍ଥିତ ରହି ଇସ୍କନ କର୍ମକର୍ତାମାନଙ୍କୁ ସମ୍ବର୍ଦ୍ଧିତ କରିଥିଲେ ।