28-Feb-2023

ବୀରମହାରାଜପୁର,( ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ତହସିଲ ଅନ୍ତର୍ଗତ କେନଝିରିଆପାଲି ରାଜସ୍ୱ ନିରୀକ୍ଷକ ଅଧିନସ୍ଥ ବହଳପଦର ପଞ୍ଚାୟତ ବଡମାଲ ଗାଁରେ ଗୋଚର ଜମି ଜବରଦଖଲ ନେଇ ତହସିଲଦାରଙ୍କ ଠାରେ ଅଭିଯୋଗ ହୋଇଛି। ଏହାର ପ୍ରତିବାଦରେ ବଡ଼ମାଳ ଗ୍ରାମବାସୀ ତହସିଲଦାର ଙ୍କୁ ସାକ୍ଷାତ କରି ଏକ ଦାବିପତ୍ର ପ୍ରଦାନ ପୂର୍ବକ ତୁରନ୍ତ ଜବରଦଖଲ ଉଚ୍ଛେଦ କରିବାକୁ ଦାବି କରିଛନ୍ତି। ଅଭିଯୋଗମତେ, ଗ୍ରାମର ଅଧିକାଂଶ ବ୍ୟକ୍ତି ଗୋଚର ଜମିକୁ ବେଆଇନ ଭାବେ ଦଖଲ କରିଥିଲେ। ଏନେଇ ଗ୍ରାମବାସୀମାନେ ଗତ ଫେବୃଆରୀ ୨୪ ତାରିଖରେ ଏକ ସଭା କରି ସମସ୍ତ ଗୋଚର ଜମି ଛାଡ଼ିବାକୁ ପ୍ରସ୍ତାବ କରାଯାଇଥିଲା। ମାତ୍ର ଗ୍ରାମର ବାବୁଲାଲ ତାଣ୍ଡିଆ ଓ ଉପେନ୍ଦ୍ର ତାଣ୍ଡିଆ ଗୋଚର ଜମି ଛାଡ଼ିବାକୁ ମନା କରିଥିଲେ। ଉକ୍ତ ଗୋଚର ଜମି ସମେତ ଉକ୍ତ ଜମି ଦେଇ ଗ୍ରାମର ଭୁଷୁକି ବୁଢ଼ୀ ପାହାଡକୁ ଗାଈଗୋରୁ ଚାରଣ ପାଇଁ ନେବାକୁ ବ୍ୟବହାର ହୋଇଥାଏ। ତେବେ, ଗ୍ରାମର‌ ଶତାଧିକ ବ୍ୟକ୍ତି ତହସିଲଦାର ବିବୁଦ୍ଧ ଗଡ଼ନାୟକ ଙ୍କୁ ସାକ୍ଷାତ କରି ଜବରଦଖଲ ଉଚ୍ଛେଦ ପାଇଁ ଦାବି କରିଛନ୍ତି। ତହସିଲଦାର ଘଟଣାର ତଦନ୍ତ କରି ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଥିବା ଜଣାଯାଇଛି।‌ ଦାବି ପତ୍ର ପ୍ରଦାନ ବେଳେ ଗ୍ରାମର  ବାବୁ ପ୍ରଧାନ, ସୁମନ୍ତ ମହାକୁର, ନୀଳମଣି ଦନ୍ତା,ଜନ୍ମ ଭୁଇ, ନାରାୟଣ କଲତା,ମାନୁ ମହାକୁର,ଚେରେଙ୍ଗା ମହାକୁର ପ୍ରମୁଖ ଉପସ୍ଥିତ ଥିଲେ।