17-Feb-2023

ଲୋଇସିଂହା, (ପ୍ରେରଣା ଖବର) : ଲୋଇସିଂହା ବ୍ଲକ ବାଦୀବାହାଲ ପଂଚାୟତ ଅନ୍ତର୍ଗତ ଅଗଲାପାଲି, ଭାଲୁପାଲି ଓ କଦଲିପାଲି ଗ୍ରାମରେ ଅନେକ ଯୋଗ୍ୟ ହିତାଧିକାରୀ ରାସନ ସାମଗ୍ରୀ ପାଇବାରୁ ବଞ୍ଚିତ ରହିଥିବା ଅଭିଯୋଗ ଆସିଛି l ଗ୍ରାମର ୱାର୍ଡ ସଭ୍ୟଙ୍କ ଠାରୁ ସାଦା କାଗଜରେ ଦସ୍ତଖତ ନିଆଯାଇ ସ୍ଥାନୀୟ ଯୋଗାଣ ନିରୀକ୍ଷକଙ୍କ କାର୍ଯ୍ୟାଳୟରେ ଅଭିଯୋଗ ପୂର୍ବକ ରାସନ ସାମଗ୍ରୀ ପାଉଥିବା ହିତାଧିକାରୀଙ୍କୁ ବାଦ ଦିଆଯାଇଥିବା ଅଭିଯୋଗ ହୋଇଛି l ଅଗଲାପାଲି ଗ୍ରାମର ଟୁଲ ବାଗ, ସଂଯୁକ୍ତା ପଣ୍ଡା ପ୍ରମୁଖ ଦୀର୍ଘଦିନରୁ ପଞ୍ଚାୟତରୁ ରାସନ ସାମଗ୍ରୀ ପାଉଥିବା ବେଳେ ଚଳିତ ମାସଠାରୁ ହିତାଧିକାରୀ ତାଲିକାରୁ ସେମାନଙ୍କୁ ବାଦ ଦିଆଯାଇଛି l ରାଜନୈତିକ ଆକ୍ରୋଶ ରଖି ଏଭଳି କରାଯାଇଥିବା ନେଇ ଗ୍ରାମର ଦିବ୍ୟରଞ୍ଜନ ପଣ୍ଡା ଅଭିଯୋଗ କରିଛନ୍ତି l ଏ ସମ୍ପର୍କରେ ଯୋଗାଣ ଅଧିକାରୀ ସୌମ୍ୟରଞ୍ଜନ ମହାନନ୍ଦଙ୍କୁ ପଚାରିବାରୁ ଉପଯୁକ୍ତ ତଦନ୍ତ କରାଯାଇ ଯୋଗ୍ୟ ହିତାଧିକାରୀଙ୍କୁ ପୁଣି ତାଲିକାରେ ସାମିଲ କରାଯିବ ବୋଲି ପ୍ରକାଶ କରିଥିଲେ l