18-Jan-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ) ଦାଦନଶ୍ରମିକ ଚାଲାଣ ରୋକିବା ଲକ୍ଷ୍ୟରେ ଆରମ୍ଭହୋଇଥିବା  ନିଶ୍ଚିତ ଗ୍ରାମୀଣ କର୍ମଯୋଗାଣ ଯୋଜନା ମନରେଗା ଏବେ ଦିଗହରା । ଗତ ୨୦୦୬ରୁ ଆରମ୍ଭ ଏହି ଦୀର୍ଘମିଆଦୀ କେନ୍ଦ୍ରୀୟ ଯୋଜନାର ଲକ୍ଷ୍ୟ ବ୍ୟାହତ ହେବା ମୂଳରେ ଉପରୁ ତଳ ପର୍ଯ୍ୟନ୍ତ ସରକାରୀ ବନାମ ପ୍ରଶାସନିକ ପରିଚାଳନାଗତ ବିଭ୍ରାଟ ଓ ବିଫଳତା ସ୍ବରୂପ  ଗରିବ ଦିନମଜୁରିଆଙ୍କ ମଜୁରୀ ବର୍ଷ ବର୍ଷ ଧରି  ଦିଆ ନଯାଇ ହେରଫେର କରାଯାଇଛି । ଏହି ଅଭିଯୋଗର ତଦନ୍ତ

ମଧ୍ୟ କରାଯାଉନାହିଁ । ଏଣୁ  ଗତ ୧୬ ତାରିଖଦିନ ଖପ୍ରାଖୋଲବ୍ଲକ୍ ରେ ଶତାଧିକ ଶ୍ରମିକ ବ୍ଲକ୍ ଅଫିସ୍ ଭିତରେ ପଶି ଭଙ୍ଗାରୁଜା କରି ତୁମୁଳକାଣ୍ଡ ଭିଆଇଛନ୍ତି । ବିଳମ୍ବିତ ରାତିପର୍ଯ୍ୟନ୍ତ ନିଆଁ ଜାଳି ଉତ୍ତ୍ଯକ୍ତ ମହିଳା ଓ ପୁରୁଷ ଶ୍ରମିକମାନେ ରାସ୍ତା ଅବରୋଧ କରିଥିଲେ । ଶେଷରେ ପୁଲିସ୍ ସହାୟତାରେ ବିଡିଓ , ତହସିଲଦାର ପ୍ରମୁଖ ଘଟଣାସ୍ଥଳରେ ପହଞ୍ଚି ବୁଝାସୁଝା କରି ସମାଧାନର ପ୍ରତିଶ୍ରୁତି ଦେବାପରେ ଆନ୍ଦୋଳନ ପ୍ରତ୍ୟାହାର କରିଥିଲେ ।

ଘଟଣାରୁ ପ୍ରକାଶ ଯେ , ଗତବର୍ଷ ମହରାପଦର ପଞ୍ଚାୟତର ସର୍ଗିପାଲି ଗ୍ରାମର ଶ୍ରମିକମାନେ ମନରେଗା ଯୋଜନାରେ ମାଟିକାମ କରି ମଜୁରୀ ପାଇ ନଥିଲେ । ଅଭିଯୋଗ ଅନୁଯାୟୀ , ଉକ୍ତ ଗ୍ରାମର ଉପରଡ୍ୟାମ୍ ରୁ ବାନ୍ଧନବାହାଲି ପର୍ଯ୍ୟନ୍ତ ୭୨ ଜଣ ଗ୍ରାମବାସୀ ଦିନମଜୁରିଆ ଶ୍ରମିକ ଏହି ପ୍ରକଳ୍ପରେ ମାଟିକାମ କରି ମଜୁରୀ ପାଇ ନ ଥିଲେ । ତେବେ ଏଥିରେ ୧୨୦ ଜଣ ଶ୍ରମିକ କାମ କରିଥିବା ଦର୍ଶାଯାଇ ନକଲି ଶ୍ରମିକଙ୍କ ନାଁ'ରେ ଟଙ୍କା ଉଠାଇ ନିଆଯାଇଥିବା ଓ ଅଳ୍ପ ଟଙ୍କା ସେମାନଙ୍କ ପାସ୍ ବୁକ୍ ରେ ପକାଯାଇ ହେରଫେର କରାଯାଇଥିବା ଏହି ଶ୍ରମିକମାନେ ପରେ ଜାଣିବାକୁ ପାଇ ଅଭିଯୋଗ କରିଥିଲେ ।  ଆହୁରି ମଧ୍ୟ ଜଣାପଡିଛି ଯେ ସରକାରୀଜମିରେ ଏହି ମନରେଗା ପ୍ରକଳ୍ପଟି ମଧ୍ୟ କରାଯାଇଛି । ଏଥିରେ ତୀବ୍ର ପ୍ରତିକ୍ରିୟା ପ୍ରକାଶ କରି ଗତ ଡିସେମ୍ବର ୧୬ ତାରିଖରେ ସେମାନେ ବିଡିଓ ଏବଂ ଗତ ୧୨ ତାରିଖରେ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିବା ପ୍ରକାଶ । ଏଥିରେ ଏଥିପାଇଁ ସେମାନେ ସରପଞ୍ଚ , ପିଇଓ ଓ ଜିଆରଏସ୍ ପ୍ରମୁଖଙ୍କୁ ଦାୟୀ କରି ସେମାନଙ୍କ ବିରୋଧରେ ଅଭିଯୋଗ କରିଥିଲେ । ତେବେ ଏହାର ସମାଧାନ ନିମନ୍ତେ ପ୍ରତିଶ୍ରୁତି ଦିଆଯାଇଥିଲେ ହେଁ , କୌଣସି ପଦକ୍ଷେପ ନିଆ ନଯିବାରୁ ଶେଷରେ ପ୍ରଶାସନିକ ଅବହେଳାର ପ୍ରତିବାଦରେ ଶ୍ରମିକମାନେ ଏଭଳି କାଣ୍ଡ ସୃଷ୍ଟି କରିଥିବା ପ୍ରକାଶ । 

ଶତାଧିକ ଶ୍ରମିକ ବିଡିଓଙ୍କ ଅନୁପସ୍ଥିତିରେ ତାଙ୍କ ଅଫିସ୍ କୁ ଧସେଇ ପଶି ଝର୍କା , ଟେବୁଲ୍ ଚୌକି , ଟିଭି , ନେମ୍ ପ୍ଲେଟ୍ ଆଦି ଭଙ୍ଗାରୁଜା କରି ତାଣ୍ଡବଲୀଳା ସୃଷ୍ଟି କରିଥିବା ଦେଖାଯାଇଛି । 

ଅନୁସନ୍ଧାନରୁ ଅଞ୍ଚଳର କେତେକ ବିରୋଧୀ ଓ ଉଗ୍ରବାଦୀ ପ୍ରବୃତ୍ତିର କୁଜିନେତା ଶ୍ରମିକଙ୍କ ଏହି ପୁଞ୍ଜିଭୂତ ଅସନ୍ତୋଷକୁ ଉ ସ୍ କା ଇ ଥିବା ଜଣାଯାଇଛି । ତେବେ ଏହି ମାଓପ୍ରବଣ ଅଞ୍ଚଳରେ ଏଭଳି କାଣ୍ଡକାରଖାନା ଆଦୌ ସ୍ପୃହଣୀୟ ନୁହେଁ ।  ପ୍ରଶାସନର ଏତାଦୃଶ ଉଦାସୀନତା ବା ଅବହେଳା ବାରୁଦଗଦାରେ ଅଗ୍ନିସଂଯୋଗ କରିବାକୁ ଫୁଙ୍କ ମାରିଲା ଭଳି କଥା ବୋଲି କୁହାଯାଉଛି । ବିଡିଓ ଓ କର୍ମଚାରୀମାନେ ଅଳ୍ପକେ ବର୍ତ୍ତି ଯାଇଥିବା ପ୍ରକାଶ । ଆଗାମୀ ୧୯ ତାରିଖରେ ଏହାର ସମାଧାନ କରାଯିବ ବୋଲି ଅଧିକାରୀମାନେ ପ୍ରତିଶ୍ରୁତି ଦେଇଛନ୍ତି । ତେବେ ଜିଲ୍ଲାର ବିଭିନ୍ନ ବ୍ଲକ୍ ଓ ବିଭାଗରେ ଏହି ମନରେଗା ଯୋଜନାରେ ନକଲି ଶ୍ରମିକ ଓ ମିଥ୍ୟା ଶ୍ରମିକଙ୍କୁ ଦର୍ଶାଇ ଦାୟିତ୍ୱରେ ଥିବା ତଳିଆଠୁଁ ଉପରିସ୍ଥ ଅଧିକାରୀମାନେ ଲକ୍ଷ ଲକ୍ଷ ଟଙ୍କାର ହେରଫେର କରୁଥିବାର ଅଭିଯୋଗ ଉଠିଆସୁଛି । ପ୍ରକୃତରେ ଜିଲ୍ଲାରେ ଲକ୍ଷାଧିକ ଦାଦନଶ୍ରମିକ ବାହାରକୁ ପଳାଇଲେଣି ଓ ସରକାର ସେମାନଙ୍କୁ ପଠାଇବାକୁ ଶ୍ରମବିଭାଗ ଜରିଆରେ ଲାଇସେନ୍ସ ଦେଉଛନ୍ତି । ଏହି ବାହାନାରେ ଅଧିକ ସଂଖ୍ୟକ ବେଆଇନ ଚାଲାଣ ବୃଦ୍ଧି ପାଇଛି । ସେହିପରି ମନରେଗା ଯୋଜନାରେ କରାଯାଉଥିବା ଚାରିପ୍ରକାର କାମ , ଦାଦନପ୍ରବଣ ୫ ଟି ବ୍ଲକରେ ଅଧିକ ମଜୁରୀ ପ୍ରଦାନ , ଉପରୁ ଟାର୍ଗେଟ୍ ର ଚାପ ସହ  ପ୍ରକଳ୍ପ ନିମନ୍ତେ ସ୍ଥାନାଭାବ ଇତ୍ୟାଦି ବାସ୍ତବତା ପ୍ରତି ସରକାର ସଚେତନ ନୁହଁନ୍ତି । ତେଣୁ ଶ୍ରମିକମାନେ କାମ ମାଗିବା ପରିବର୍ତ୍ତେ ଏହା ବସ୍ତୁତଃ ମିଛମନରେଗାରେ ପରିଣତ ହେବାକୁ ବାଧ୍ୟ ହୋଇଛି । ଏହାର ସମାଧାନ ହେବ କିପରି  ?