03-Jan-2023

ବୌଦ୍ଧ(ଦୁର୍ଯ୍ଯୋଧନ ବିଶି) - ବୌଦ୍ଧ ଜିଲ୍ଲା ଗଠନର ୨୯ତମ ସ୍ୱନକ୍ଷତ୍ର ଦିବସ ଜାନୁଆରୀ ୨ ତାରିଖରେ ଅନୁଷ୍ଠିତ ହୋଇଛି । ଏହି ଅବସରରେ ଜିଲ୍ଲାରେ ଉତ୍ସାହ ଉଦ୍ଦୀପନା ସହ ସରକାରୀ ଓ ବେସରକାରୀ ସ୍ତରରେ ପ୍ରତିଷ୍ଠା ଦିବସ ପାଳିତ ହୋଇଛି । ପ୍ରଶାସନ ତରଫରୁ ସରକାରୀ କାର୍ଯ୍ୟାଳୟ ଗୁଡିକୁ ଆଲୋକମାଳାରେ ସୁସଜ୍ଜିତ କରାଯିବାସହ ବିଭିନ୍ନ ସ୍ଥାନରେ ସାଜସଜ୍ଜା ସହ ତୋରଣରେ ସ୍ୱାଗତ କରାଯାଇଥିଲା । ରାଜବାଟୀ ନିକଟରେ ଭୂମିସ୍ପର୍ଶ ମୁଦ୍ରାରେ ଥିବା ବୁଦ୍ଧମୂର୍ତ୍ତି ଠାରେ ପୂଜାର୍ଚ୍ଚନା ସହ ପୁଷ୍ପମାଲ୍ୟ ଅର୍ପଣ କରାଯାଇଥିଲା  । ଜିଲ୍ଲା ପ୍ରତିଷ୍ଠା ଉତ୍ସବରୁ ବୌଦ୍ଧ ମହୋତ୍ସବ ପର୍ଯ୍ୟନ୍ତ ବିଭିନ୍ନ ସ୍ଥାନରେ କ୍ରୀଡା ମହୋତ୍ସବ ଆୟୋଜନ କରାଯାଇଛି । ବ୍ଲକସ୍ତରରେ ଓ ଏନଏସି ସ୍ତରରେ ବିଭିନ୍ନ ଖେଳ ପ୍ରତିଯୋଗିତା ଆରମ୍ଭ

କରାଯାଇଛି । ଉଦଘାଟନୀ ଉତ୍ସବରେ  ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ, ପଞ୍ଚାୟତିରାଜ ଓ ପାନୀୟଜଳ ଏବଂ ସୂଚନା ଓ ଲୋକସଂପର୍କ ବିଭାଗ ମନ୍ତ୍ରୀ ପ୍ରଦିପ କୁମାର ଅମାତ  ବୁରୋଗୁରା  ଓକ୍ରା ସାହିନାଳ ଉପରେ ସେତୁ ନିର୍ମାଣ ଭିତ୍ତିପ୍ରସ୍ତର ସ୍ଥାପନ, ଶଗଡା ଠାରୁ ବବଡା ପର୍ଯ୍ୟନ୍ତ ଗ୍ରାମ୍ୟସଡକ ଭିତ୍ଥିପ୍ରସ୍ତର ସ୍ଥାପନ, ବିଜାପଦର ଗ୍ରାମ୍ୟ ରାସ୍ତା ଠାରୁ ପୋଡୋଗୋରା ମରାମତି, ସଂରକ୍ଷଣ ଓ ନବୀକରଣ, ବଦଲାସାହି ଗ୍ରାମ୍ୟରାସ୍ତାର ଉନ୍ନତିକରଣର ଭୂମିପୂଜା,  ବିଜାପଦର ଗ୍ରାମରେ ୬ଗୋଟି ଗୋଷ୍ଠୀ ଜୈବିକ ଉର୍ଣ୍ଣନ ଶୁଭ ଉଦଘାଟନ, ଶଙ୍ଖଚୁଡ ମୁକ୍ତ ବ୍ୟାୟାମଶାଳାର ଉଦଘାଟନ, ବୁଟୁପାଲି ଠାରେ ସହରାଞ୍ଚଳ ସ୍ୱାସ୍ଥ୍ୟ ଓ କୁଶଳ କେନ୍ଦ୍ର ଶୁଭ ଉଦଘାଟନ, ବୌଦ୍ଧ ବ୍ଲକ କାର୍ଯ୍ୟାଳୟ ଠାରେ ମିଶନଶକ୍ତି କାଫେର ଶୁଭ ଉଦଘାଟନ, ରାମେଶ୍ୱର ଉଦ୍ୟାନରେ ମିଲେଟ କାଫେର ଶୁଭ ଉଦଘାଟନ କରିଛନ୍ତି । ସନ୍ଧ୍ୟାରେ ସ୍ଥାନୀୟ କଚେରୀ ପଡିଆସ୍ଥିତ ଗୌତମବୁଦ୍ଧ ମଣ୍ଡପରେ ଅନୁଷ୍ଠିତ ଜିଲ୍ଲାପ୍ରତିଷ୍ଠା ଉତ୍ସବ କାର୍ଯ୍ୟକ୍ରମରେ ଶ୍ରୀ ଅମାତ ମୁଖ୍ୟଅତିଥି ଭାବେ ଯୋଗଦେଇ  ଆସନ୍ତା୧୨ ତାରିଖରେ ଅନୁଷ୍ଠିତ ହେବାକୁ ଥିବା ଜିଲ୍ଲା ମହୋତ୍ସବର ଶୁଭ ଉଦଘାଟନ  ଘୋଷଣା କରିଥିଲେ । ଶ୍ରୀ ଅମାତ ଜିଲ୍ଲାର ବିକାଶ ସଂପର୍କରେ ବକ୍ତବ୍ୟ ରଖିବାସହ ଆଗାମୀ କ୍ରୀଡା କାର୍ଯ୍ୟକ୍ରମ ସଂପର୍କରେ ସୂଚନା ଦେବାସହ ମହୋତ୍ସବ ପାଇଁ ଶୁଭକାମନା ଜଣାଇଥିଲେ । ଏହି କାର୍ଯ୍ୟକ୍ରମରେ ବୌଦ୍ଧ ଜିଲ୍ଲାପାଳ ସତ୍ୟରଂଜନ ସାହୁ ନିଜ ବକ୍ତବ୍ୟରେ ଆଗାମୀ ବୌଦ୍ଧ ମହୋତ୍ସବ ପାଇଁ ଜିଲ୍ଲାବାସୀଙ୍କ ସହଯୋଗ କାମନା କରିବାସହ ହକି ବିଶ୍ୱକପ୍‌ ଟ୍ରଫିର ସ୍ୱାଗତ କାର୍ଯ୍ୟକ୍ରମ ସଂପର୍କରେ ସୂଚନା ପ୍ରଦାନ କରିଥିଲେ । ସମ୍ମାନୀତ ଅତିଥି ଭାବେ ଆରକ୍ଷୀ ଅଧୀକ୍ଷକ ପ୍ରହଲାଦ ସହାଇ ମିନା,

ବୌଦ୍ଧ ଏନଏସି ଅଧ୍ୟକ୍ଷ ମୃତ୍ୟୁଞ୍ଜୟ ମିଶ୍ର ଏବଂ ଯୋଗୀ ବିଭୁଦତ୍ତ ପ୍ରଧାନ ଯୋଗ ଦେଇଥିଲେ । ଅତିରିକ୍ତ ଜିଲ୍ଲାପାଳ ବବିତା ରାଣୀ ଦଳବେହେରା, ଜିଲ୍ଲାପରିଷଦ କାର୍ଯ୍ୟନିର୍ବାହୀ ଅଧିକାରୀ ଅଶ୍ୱିନୀ କୁମାର ମେହେର, ଉପ-ଜିଲ୍ଲାପାଳ ରବୀନ୍ଦ୍ର କୁମାର କହଁର, ତହସିଲଦାର ଦେବୀ ପ୍ରସାଦ ଦାସ, ସୂଚନା ଓ ଲୋକସଂପର୍କ ଅଧିକାରୀ ରୀତାକାନ୍ତି ବଳିଆରସିଂହ କାର୍କ୍ୟକ୍ରମକୁ ସଫଳ କରାଇବାରେ ସକ୍ରିୟ ଭୁମିକା ଗ୍ରହଣ କରିଥିଲେ । ପ୍ରତିଷ୍ଠା ଉତ୍ସବ ମଞ୍ଚରେ ରୁଦ୍ର ପୂଜା ଅନୁଷ୍ଠିତ ହେବାସହ ଆର୍ଟ ଅଫ୍‌ ଲିଭିଂ ତରଫରୁ ଆଧ୍ୟାତ୍ମିକ ଭଜନ ସମାରୋହ ଅନୁଷ୍ଠିତ ହୋଇଥିଲା ।   ଗେହ୍ଲା ମା କଳାନିକେତନ ଓ ପ୍ରଣାମ ଅନୁଷ୍ଠାନ ଦ୍ୱାରା ସ୍ଥାନୀୟ କଳାକାରଙ୍କୁ ନେଇ ସାଂସ୍କୃତିକ  କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।ଏହି କାର୍ଯ୍ୟକ୍ରମ କୁ ରାଜ୍ୟ କଳା  ଓ ସଂସ୍କୃତି ସଙ୍ଘ ର ଉପସଭାପତି ଅବନୀ କୁମାର ମିଶ୍ର  ସଂଯୋଜନା କରିଥିଲେ ଏବଂ ଜ଼ିଲ୍ଲା ସୂଚନା ଓ ଲୋକ ସମ୍ପର୍କ ତଥା  ସଂସ୍କୃତି ଅଧିକାରୀ ରିତାକାନ୍ତି ବଳିୟାର  ସିଂହ  କାର୍ଯ୍ୟକ୍ରମକୁ ପରିଚାଳନା କରିଥିଲେ l