12-Dec-2022

ବଲାଙ୍ଗିର (ପ୍ରେରଣା ଖବର) ବଲାଙ୍ଗିର ଭୀମଭୋଇ ମେଡିକାଲ କଲେଜ ହସପିଟାଲରେ ଅଘଟଣ । ହଠାତ ଖସିପଡିଲା ଛାତର ସିମେଣ୍ଟ ଅତଡା ସହିତ ସିଲିଂ । ଅଳ୍ପକେ ବର୍ତ୍ତିଲେ ରୋଗୀ । ହସପିଟାଲର ସର୍ଜରୀ ବିଭାଗର ମହିଳା ୱାର୍ଡର ୧୦୫ ନମ୍ୱର ବେଡ ନିକଟରେ ହଠାତ ଛାତର ସିମେଣ୍ଟ ଅତଡା ଖସି ଯାଇଥିଲା । ଫଳରେ ସିଲିଂ ମଧ୍ୟ ତଲେ ପଡିଯାଇଥିଲା ।  ସୌଭାଗ୍ୟକୁ ତିନୋଟି ରୋଗୀଙ୍କ ବେଡର

ମଧ୍ୟ ଭାଗରେ ଖସିପଡିଥିଲା ସିମେଣ୍ଟ ଅତଡା । ଯାହା ଫଳରେ ଅଳ୍ପକେ ବର୍ତ୍ତିଯାଇଛି ରୋଗୀଙ୍କ ଜୀବନ । ଜଣେ ରୋଗୀଙ୍କ ଛୋଟ ଝିଅ ମଧ୍ୟ ବେଡରେ ଥିଲା । ଆଉ ଟିକିଏ ହୋଇଥିଲେ ସିମେଣ୍ଟ ଅତଡା ଝିଅର ମୁଣ୍ଡ ଉପରେ ପଡିଯାଇଥାଆନ୍ତା । ସିମେଣ୍ଟ ଅତଡା ଖସି ପଡିବା ପରେ ସର୍ଜରୀ ୱାର୍ଡର ରୋଗୀ ମାନେ ଭୟଭୀତ ଅବସ୍ଥାରେ ଅଛନ୍ତି । ସଂଗେ ସଂଗେ ହସପିଟାଲ କତୃପକ୍ଷ ସିମେଣ୍ଟ ଅତଡା ପଡିଥିବା କଠୋରୀରେ ତାଲା ପକାଇ ଦେଇଥିଲେ । ଏହା ସହିତ ସେହି ୱାର୍ଡରେ ଥିବା ରୋଗୀଙ୍କୁ ଅନ୍ୟ ୱାର୍ଡକୁ ସ୍ଥାନାନ୍ତର କରାଯାଇଛି । ଦୀର୍ଘ ଦିନର ପୁରୁଣା କୋଠାକୁ, ମେଡିକାଲ କଲେଜ ହସପିଟାଲ ଭାବରେ ବ୍ୟବହାର କରାଯାଉଛି । କେବଳ ସାମାନ୍ୟ ମରାମତି କରି ସିଲିଂ ଲଗାଯାଇଛି । ଛାତ ଗୁଡିକ ଦୁର୍ବଳ ହୋଇଯାଇଥିବାରୁ ତାହା ଖସି ପଡୁଛି । ଏହା ଉପରେ ଉଚିତ ପଦକ୍ଷେପ ନେବା ପାଇଁ ସାଧାରଣ ଲୋକେ ଦାବୀ କରୁଛନ୍ତି । ସେପଟେ କୌଣସି ମତାମତ ନଦେଇ ହସପିଟାଲ ମ୍ୟାନେଜର ପିୟୁଷ ନାନଙ୍ଗଲିଆ, ଓଲଟା ଓଲଟା ଖବର ସଂଗ୍ରହ  ପାଇଁ ଯାଇଥିବା ଗଣମାଧ୍ୟମ ପ୍ରତିନିଧିଙ୍କୁ ନାଲି ଆଖି ଦେଖାଇଥିଲେ ।