11-Dec-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ) ବଲାଙ୍ଗୀର ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ବାହାରକୁ ଓ ରାଜ୍ୟ ବାହାରକୁ ଚଳିତବର୍ଷ ପୂର୍ବପରି ଦାଦନଶ୍ରମିକ ଚାଲାଣ ଅବ୍ୟାହତ ରହିଛି । ଶ୍ରମିକ ଲାଇସେନ୍ସ ବା ମୁଭମେଣ୍ଟ ଅର୍ଡରରେ ଚାଲାଣ କରାଯାଉଥିବା ଶ୍ରମିକଙ୍କଠାରୁ ଢେର୍ ଅଧିକ ପ୍ରାୟ ପ୍ରତ୍ୟେହ ହଜାର ହଜାର ସଂଖ୍ୟକ ବେଆଇନ ଦାଦନଶ୍ରମିକ ସପରିବାର ପିଲାଛୁଆ ସମେତ ଚାଲାଣ ହେଉଛନ୍ତି । କଣ୍ଟାବାଞ୍ଜିର ଲଜ୍ ରୁ ପୁଲିସ୍ ଆନ୍ଧ୍ରର ୭ ଜଣ ସେଠ୍ ଙ୍କ ଠାରୁ ଲକ୍ଷ ଲକ୍ଷ ଟଙ୍କା ହଡପ କରି ଜଣେ ଏସଡିପିଓ ଧରାପଡି ନିଲମ୍ବିତ ହେବା ସହ ତୁରେକେଲାର ଜଣେ ଏଏସଆଇ ଜଣେ ସର୍ଦ୍ଦାରଠାରୁ ୧୨ ହଜାର ଟଙ୍କା ଲାଞ୍ଚ ନେଇ ବଦଳି ହେବା ଘଟଣା ପରେ ମଧ୍ୟ ଦାଦନଅଧ୍ୟୁଷିତ ପ୍ରାୟ ସବୁ ଥାନା ପୁଲିସ୍ ଦାଦନସେଠ୍ ଓ ସର୍ଦ୍ଦାରମାନଙ୍କ ସହ ହାତମିଳାଇ ଲକ୍ଷ ଲକ୍ଷ ଟଙ୍କା ହାତଚିକ୍କଣ କରି ଚାଲିଛନ୍ତି । କେବଳ ଏତିକି ନୁହେଁ , ବେଲପଡା ଓ ଖପ୍ରାଖୋଲ ପୁଲିସ୍  ସର୍ଦ୍ଦାରମାନଙ୍କଠାରୁ ଅଗ୍ରୀମ ନେଇ ଖସି

ଯାଉଥିବା ଶ୍ରମିକମାନଙ୍କୁ ଗିରଫ ଧମକ ଦେଇ ଟଙ୍କା ଫେରାଇଦେବାକୁ ଚାପ ପକାଉଥିବା ସଂକ୍ରାନ୍ତୀୟ କେତେକ ଘଟଣା ଚର୍ଚ୍ଚା ଓ ଅଭିଯୋଗ ପ୍ରକାଶ ପାଇଛି । ଗତ ସପ୍ତାହରେ ଟିକ୍ରାପଡା ଅଞ୍ଚଳର ବେଡା ନାମକ ଜଣେ ଢାବାବାଲା ସର୍ଦ୍ଦାରଠାରୁ ଖପ୍ରାଖୋଲ ନିକଟସ୍ଥ ଭେଲୁଆଁଖୋଲର ଜଣେ ନାମମାତ୍ର ଢାବାବାଲା ଓ ତାଙ୍କ ସ୍ତ୍ରୀଙ୍କର ମଧ୍ୟସ୍ଥତାରେ ୮ ଜଣ ଶ୍ରମିକ ୮୨ ହଜାର ଟଙ୍କା ହଡପ କରିନେଇଥିବା ଓ ଖପ୍ରାଖୋଲ ଥାନାରେ ପୁଲିସ୍ ସେମାନଙ୍କୁ ଥାନାକୁ ଡକାଇ ସର୍ଦ୍ଦାରର ଟଙ୍କା ୧୦ ତାରିଖ ସୁଦ୍ଧା ଫେରାଇ ନଦେଲେ କେସ୍ କରି ଗିରଫ କରିବାକୁ ଚାପ ପକାଇଥିବା ଅଭିଯୋଗ ହୋଇଛି । ଦ୍ୱିତୀୟତଃ ଟଙ୍କପାଣିର ଜଣେ ସର୍ଦ୍ଦାର ଗତକାଲି ଏହି ୮ ଜଣ ଶ୍ରମିକଙ୍କୁ ନେଇ ବାହାରକୁ ଚାଲାଣ କରିଥିବା ଜଣାପଡିଛି । ଏହାଛଡା ଜିଲ୍ଲାରେ ଆହୁରି ଅନେକ ଏଭଳି ଘଟଣାରେ ପୁଲିସ୍ ର ସିଧାସଳଖ ହାତ ଥିବା ଅଭିଯୋଗର ଚର୍ଚ୍ଚା ହେଉଛି ।