11-Dec-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ) ବଲାଙ୍ଗୀର ଜିଲ୍ଲାରେ ଆଦିବାସୀ ସ୍କୁଲ୍ ଗୁଡିକରେ ଶିକ୍ଷାବ୍ୟବସ୍ଥା ବିପର୍ଯ୍ୟସ୍ତ ହୋଇ ପଡିଥିବା ଲକ୍ଷ୍ୟକରାଯାଇଛି । ଜିଲ୍ଲା ଆଦିବାସୀ କଲ୍ୟାଣ ଅଧିକାରୀଙ୍କ ଅପାରଗତା ଓ ଉତ୍କୋଚଖୋର୍ ମନୋବୃତ୍ତି ଯୋଗୁଁ ଏପରି ପରିସ୍ଥିତି ଉପୁଜିଥିବା ଅଭିଯୋଗ ପ୍ରକାଶ ପାଇଛି । ବିଶ୍ବସ୍ତସୂତ୍ରରୁ ପ୍ରକାଶ ଯେ , ଝାଙ୍କରପାଲି ସେବାଶ୍ରମସ୍କୁଲ୍ ରେ ଦୀର୍ଘଦିନ ଧରି ଅବସ୍ଥାପିତା ଜନୈକା ପ୍ରଧାନସେବିକା ଆବାସିକ ପିଲାଙ୍କ ଖାଦ୍ୟପେୟରୁ ଆରମ୍ଭ କରି ଯାବତୀୟ ଖର୍ଚ୍ଚରୁ କାଟି ଅର୍ଥ ବାଟମାରଣା କରିଆସୁଛନ୍ତି । ଡିଡବ୍ଲୁଓଙ୍କୁ ଖୁସ୍ ରଖୁଥିବାରୁ ପୂର୍ବରୁ ଗୁଡଭେଲା ବ୍ଲକ୍ ର ଗୁଡୁଙ୍ଗାମାଲ ଆଶ୍ରମସ୍କୁଲରେ ଏକଦା ବିବଦମାନା ମିତା ଭୋଇ ନାମ୍ନୀ ଏହି ଶିକ୍ଷୟିତ୍ରୀ ଜଣକ ଏଠାରେ ନିର୍ବିଘ୍ନରେ ରହିଛନ୍ତି । ଏପରିକି ନିୟମ ବିରୁଦ୍ଧ ଭାବେ ବିଭାଗୀୟ ସ୍କୁଲ୍ ଗୁଡିକୁ ଫର୍ଣ୍ଣିଚର ଯୋଗାଉଥିବା ଏକ କଟକିଆ ଠିକାଦାର ଓ ତାଙ୍କ ପୁରୁଷ ବଢେଇକରୂମଚାରୀମାନେ ଛାତ୍ରୀନିବାସ ପରିସରରେ ରହୁଥିବା ଦେଖାଯାଇଛି ।

ଦ୍ୱିତୀୟତଃ ତୁରେକେଲା ଆଶ୍ରମସ୍କୁଲରେ ଜିଲ୍ଲାରେ ପ୍ରଧାନସେବକ ଅଭାବ ଆଳରେ ଜାଣିଶୁଣି ଜଣେ ସିସିଏରୁ ପଦୋନ୍ନତି ପାଇ ଶିକ୍ଷକ ହୋଇଥିବା ଗୋପାଳ ଧରୁଆ ନାମକ ଜଣେ ସହକାରୀ ଶିକ୍ଷକଙ୍କୁ ପ୍ରଧାନସେବକ ଭାବରେ ଅବସ୍ଥାପିତ କରିରଖାଯାଇଛି । ଏଥିପାଇଁ ଦୁଇଜଣ ଯୋଗ୍ୟତାସମ୍ପନ୍ନ ପ୍ରଧାନ ସେବକ ଆଗ୍ରହୀ ଥିଲେ ହେଁ , ଏହି ଭାରପ୍ରାପ୍ତ ପ୍ରଧାନସେବକ ରଖିବାରେ ଡିଡବ୍ଲୁଓ ଏବଂ ଜିଲ୍ଲା ଅଫିସ୍ ର କେତେକଙ୍କ ଆଗ୍ରହ ତଥା ହାତ ଚିକ୍କଣ ହେଉଥିବା ଯୋଗୁଁ ଏହି ନିଯୁକ୍ତି ଦିଆଯାଇଥିବା କୁହାଯାଉଛି । ଏପରିକି ସ୍ଥାନୀୟ ସ୍କୁଲ୍ କମିଟିର ସଭାପତି ମଦପିଇ  ସ୍କୁଲ୍ ଓ ଛାତ୍ରୀନିବାସରେ ବିଚରଣ କରି ତାଙ୍କୁ ସୁରକ୍ଷା ପ୍ରଦାନ କରୁଥିବା ଲକ୍ଷ୍ୟକରାଯାଇଛି । ଗତ ୧୦ ତାରିଖ ଦିନ ସ୍କୁଲ୍ ରେ ଅଭିଭାବକଙ୍କ ବୈଠକବେଳେ ଏହି ମଦ୍ୟପ କମିଟିନେତା ସ୍କୁଲ୍ ଓ ହଷ୍ଟେଲରେ ଦାଦାଗିରୀ କରୁଥିବା ଗଣମାଧ୍ୟମ ପ୍ରତିନିଧିମାନେ ଦେଖିଥିଲେ । ଏହାଛଡା ସେ ଉକ୍ତ ଭାରପ୍ରାପ୍ତ ପ୍ରଧାନସେବକଙ୍କ ଠାରୁ ମଦ ପିଇବାକୁ ଟଙ୍କା ନେଉଥିବା ଅଞ୍ଚଳରେ ଚର୍ଚ୍ଚା ହେଉଛି । ପ୍ରଧାନସେବକ ମଧ୍ୟ ସ୍କୁଲପିଲାମାନଙ୍କ ମେସ୍ ଓ ଅନ୍ୟାନ୍ୟ ଖର୍ଚ୍ଚରୁ ବେଶ୍  ନିରଙ୍ହାକୁଶ ଭାବେ ହାତଚିକ୍କଣ କରି ସେଥିରୁ କମିଟି କର୍ମକର୍ତ୍ତା ଏବଂ ଉପରିସ୍ଥ ଅଧିକାରୀଙ୍କୁ ତୁଷ୍ଟ କରି ରଖିଥିବା ଅଭିଯୋଗ ହେଉଛି ।

ଜିଲ୍ଲାର ଅନ୍ୟାନ୍ୟ ଆଶ୍ରମସ୍କୁଲ , ସେବାଶ୍ରମସ୍କୁଲ୍ ଓ 'ଅନ୍ବେଷା ' ଯୋଜନାରେ ବ୍ୟାପକ ଦୁର୍ନୀତି ହେଉଥିବା ଜଣାପଡ଼ିଛି । ଏ ସମ୍ପର୍କରେ ଖୁବ୍ ଶୀଘ୍ର ଏକ ବିସ୍ତୃତ ଅନୁସନ୍ଧାନମୂଳକ ରିପୋର୍ଟ ପ୍ରକାଶ ପାଇବ । ଯଦିଓ ଜିଲ୍ଲା ଆଦିବାସୀ କଲ୍ୟାଣ ଅଧିକାରୀ ଅଲେଖ ବିଶ୍ବାଳ ଓ ସମ୍ପୃକ୍ତ ଅଭିଯୁକ୍ତ କମିଟି କର୍ମକର୍ତ୍ତା ଏବଂ ଶିକ୍ଷକ / ଶିକ୍ଷୟିତ୍ରୀମାନଙ୍କ ପକ୍ଷରୁ ଉପରୋକ୍ତ ଅଭିଯୋଗକୁ ଅସ୍ବୀକାର କରାଯାଇଛି ।