25-Nov-2022

ଡୁଙ୍ଗୁରିପାଲ(ଅରବିନ୍ଦ ମିଶ୍ର)ଏହି ବ୍ଲକର ଚେରୁପାଲି ବାଳିକା ଉଚ୍ଚ ବିଦ୍ୟାଳୟର ଜଣେ ଛାତ୍ରୀ ଆତ୍ମହତ୍ୟା କରିଥିବା ନେଇ ଅଭିଯୋଗ ପରେ ମୃତା ଛାତ୍ରୀର ଶବ ରଖି ବରଗଡ-ବୋରିଗୁମ୍ମା ୨୬ ନମ୍ବର ଜାତୀୟ ରାଜପଥ ଚେରୁପାଲି ସ୍କୁଲ ସମ୍ମୁଖରେ ରାସ୍ତା ଅବରୋଧ କରାଯାଇଛି । ମୃତା ଛାତ୍ରୀର ବାପା ବଲାଙ୍ଗିର ଜିଲ୍ଲା ମୂଳ ବାସିନ୍ଦା ଢୋଲମାନ୍ଦଲ, ଗଭରା ଗ୍ରାମରୁ ଆସି  ପହଣ୍ଡି ଗ୍ରାମରେ ରହୁଥିଲେ ।  ଝୀଅର ବାପା ଚନ୍ଦ୍ର ଛୁରା ଓ ମାଆ  ନନ୍ଦିନୀ ଛୁରା ଅଭିଯୋଗ କରିଛନ୍ତି ଯେ, ତାଙ୍କ ଝିଅ ଗତକାଲି ବିଦ୍ୟାଳୟକୁ  ପଢି ଆସିଥିଲେ । ବିଦ୍ୟାଳୟରେ ତାଙ୍କୁ ଜାତିକୁ ଆକ୍ଷେପ କରି କୁଆଡେ ମାନସିକ ନିର୍ଯ୍ୟାତନା ଦିଆଯାଇଥିଲ । । ମାନସିକ ନିର୍ଯ୍ୟାତନା ସହ୍ୟ କରିନପାରି ଛାତ୍ରୀଟି ନିଜ ଘରେ ବେକରେ ଦଉଡି ଦେଇ ଆତ୍ମହତ୍ୟା ଉଦ୍ୟମ କରିଥିଲା । ପରିବାର ଲୋକେ ତାଙ୍କୁ ଉଦ୍ଧାର କରି ବୁର୍ଲା ଡାକ୍ତରଖାନାକୁ ନେଇଥିଲେ ।ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ଆଜି ମୃତ୍ୟୁ ହୋଇଥିଲା ।

 ମୃତ ଦେହ ଗାଁରେ ପହଞ୍ଚିବା ପରେ ଝିଅର ବାପା ଚନ୍ଦ୍ର ଚୁରା, ମାଆ ନନ୍ଦିନି ଛୁରାଙ୍କ ସମେତ ଭୀମ ଆର୍ମୀର ରାଜ୍ୟ ସଂସ୍କାରକ ସୁବାଷ ଚନ୍ଦ୍ର ସୁନା, ରାଜ୍ୟ ପ୍ରଭାରୀ ରମାକାନ୍ତ ରାବଣ, ପଶ୍ଚିମ ଓଡିଶା ପ୍ରଭାରୀ ନରେନ୍ଦ୍ର ରାବଣ, ପଶ୍ଚିମ ଓଡିଶା ସଭାନେତ୍ରୀ ମଞ୍ଜୁ କୁମ୍ଭାର,ଡୁଙ୍ଗୁରିପାଲି ବ୍ଲକ ପ୍ରଭାରି ସହଦେବ ମହାନନ୍ଦ ପ୍ରମୁଖ ଚେରୁପାଲି ବିଦ୍ୟାଳୟ ସମ୍ମୁଖ ଜାତୀୟ ରାଜପଥରେ ଶବ ରଖି ନ୍ୟାୟ ଦାବୀ କରିଛନ୍ତି । ମୃତ ଛାତ୍ରୀଙ୍କୁ ନ୍ୟାୟ ପ୍ରଦାନ କରାନଗଲେ ଆନ୍ଦୋଳନ ବ୍ୟାପକ କରାଯିବ ବୋଲି ଭୀମସେନା ପକ୍ଷରୁ ଧମକ ଦିଆଯାଇଛି । ବିଦ୍ୟାଳୟର ଶିକ୍ଷକମାନଙ୍କୁ ଘଟଣା ସ୍ଥଳକୁ ଡକାଯାଇ ସେଠାରେ ସମାଧାନ କରିବାକୁ ଭୀମ ଆର୍ମୀ ନିଜ ଜିଦରେ ଅଟଳ ରହିଛି ।  ରାସ୍ତା ଅବରୋଧ ଯୋଗୁ ଉଭୟ ପାଶ୍ୱର୍ରେ ବହୁ ସଂଖ୍ୟାରେ ଗାଡି ମଟର ଅଟକରି ରହିଛି । ଡୁଙ୍ଗୁରିପାଲି  ଥାନାଧିକାରୀ ସତ୍ୟନାରାୟଣ ପଧାନ , ରାମପୁର ତହସିଲଦାର ପୁୁରୁଷୋତ୍ତମ ମିର୍ଦ୍ଧା, ଡୁଙ୍ଗୁରିପାଲି ବିଡିଓ ତ୍ରିପୁର ମହାନନ୍ଦ ପହଞ୍ଚି ମୃତକ ପରିବାର, ଭୀମ ଆର୍ମୀ କର୍ମକର୍ତ୍ତାମାନଙ୍କ ସହିତ ଆଲୋଚନା ଜାରି ରଖିଛନ୍ତି । ବର୍ତ୍ତମାନ ସୁଦ୍ଧା କୌଣସି ସମାଧାନ ବାହାରି ନାହିଁ । ରାସ୍ତା ଅବରୋଧ ଜାରି ରହିଛି ।