24-Nov-2022

ବିନିକା(ହିମାଂଶୁ ଶେଖର ପୁଟେଲ) ବିନିକା ଅଞ୍ଚଳବାସୀଙ୍କ ଦୀର୍ଘ ବର୍ଷର ଦାବୀ ପୂରଣ ହୋଇଚ୍ଛି । ମାନ୍ୟବର ମୁଖ୍ୟମନ୍ତ୍ରୀ ଏବଂ ୫ଟି ସଚିବଙ୍କ ଉଦ୍ୟମ କ୍ରମେ ଏହା ସଫଳ ହୋଇଥିବାରୁ ଅଞ୍ଚଳବାସୀଙ୍କ ଠାରେ ଖୁସିର ଲହରୀ ଖେଳିଯାଇଛି ।ସୂଚନା ଯୋଗ୍ୟଯେ ବିନିକା ବ୍ଲକର ପୂର୍ବତନ ଅଧ୍ୟକ୍ଷ ତଥା ବରିଷ୍ଠ ଆଇନଜୀବୀ ପଞ୍ଚାନନ ଦନ୍ତା ଗତ ୧୯/୯/୨୦୨୨ ରେ ସ୍ଥାନୀୟ ବିନିକା ତହସିଲଦାରଙ୍କ ଜରିଆରେ ୫ଟି ସଚିବ ଭି. କାର୍ତ୍ତିକେୟନ ପାଣ୍ଡିଆନଙ୍କ ନିକଟକୁ ବିନିକାରେ ପୂର୍ତ୍ତ ବିଭାଗ ଉପଖଣ୍ଡ କାର୍ଯ୍ୟକ୍ଷମ ନେଇ ବ୍ୟକ୍ତିଗତ ଭାବେ ଦାବିପତ୍ର ପ୍ରଦାନ କରିଥିଲେ ।ଆଜି ତାହା ସଫଳ ହୋଇଛି। ଏଥିପାଇଁ ୪୬.୨୯ଲକ୍ଷ ଟଙ୍କା ମଞ୍ଜୁର ହୋଇ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି। ଏନେଇ ଓଡ଼ିଶା ସରକାରଙ୍କ ପୂର୍ତ୍ତ ବିଭାଗ ପତ୍ର ସଂଖ୍ୟା ୪୬୮୨ ତାରିଖ ୧୬/୧୧/୨୦୨୨ ଯୋଗେ ସୁବର୍ଣ୍ଣପୁର ପୂର୍ତ୍ତ ବିଭାଗ ଅଧିକ୍ଷଣ

ଯନ୍ତ୍ରୀଙ୍କ ନିକଟକୁ ଆସିବା ପରେ ଏହି ସୂଚନା ଜଣାପଡ଼ିଛି । ଯାହା ଫଳରେ ଆଜି ବିନିକା ସ୍ପୋର୍ଟସ କ୍ଲବ ଠାରେ ଅନୁଷ୍ଠିତ ଏକ ସଭାରେ ପୂର୍ବତନ ବ୍ଲକ ଅଧ୍ୟକ୍ଷ ତଥା ବରିଷ୍ଠ ଆଇନଜୀବୀ ପଞ୍ଚାନନ ଦନ୍ତା ଉପସ୍ଥିତ ଅଞ୍ଚଳର ସଚେତନ ନାଗରିକଙ୍କୁ ସୂଚନା ପ୍ରଦାନ କରିଥିଲେ ।ଦୀର୍ଘ ବର୍ଷର ଦାବୀ ପୂରଣ ହୋଇଥିବାରୁ ଅଞ୍ଚଳବାସୀଙ୍କ ତରଫରୁ ଶ୍ରୀ ଦନ୍ତା ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ୫ଟି ସଚିବ ଭି.କାର୍ତ୍ତିକେୟନ ପାଣ୍ଡିଆନଙ୍କୁ ଧନ୍ୟବାଦ ଜଣାଇଛନ୍ତି । ଏଠାରେ ପୂର୍ତ୍ତ ବିଭାଗ ଉପଖଣ୍ଡ କାର୍ଯ୍ୟକ୍ଷମ ଦ୍ଵାରା ବିନିକା ସହର ସମେତ ବ୍ଲକର ୧୬ଗୋଟି ପଞ୍ଚାୟତ ରାମପୁର, ଡୁଙ୍ଗୁରିପାଲି ବ୍ଲକ ଅଞ୍ଚଳରେ ପୂର୍ତ୍ତ ବିଭାଗ ତରଫରୁ ହେବାକୁ ଯାଉଥିବା ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ଅଗ୍ରଗତି ଘଟିବା ସାଂଗକୁ ଜନସାଧାରଣ ଉପକୃତ ହେବେ ବୋଲି ଆଶା କରାଯାଉଛି ।