09-Nov-2022

ବଲାଙ୍ଗୀର (ପୁର୍ଣ୍ଣ ଶଶୀ ଶେଖର ରାଓ) ବଲାଙ୍ଗିର ଜିଲ୍ଲା ସଇଁତଲା ବ୍ଲକ ଟିକ୍ରାପଡ଼ା ପଞ୍ଚାୟତର ଦେଓଗାଁ ନିକଟରେ ରହିଛି ଐତିହ୍ୟ ସମ୍ପନ୍ନ, ସର୍ବ ପୁରାତନ ସପ୍ତର୍ସି ପୀଠ ଖପ୍ରାଡୁଙ୍ଗୁରି । ଏହି ପବିତ୍ର ଖପ୍ରାଡୁଙ୍ଗୁରି ର ଚତୁର୍ପାର୍ଶ୍ଵରେ  ସବୁଜ ବନାନୀ ରେ ଭରପୁର, ହଜାର ପ୍ରଜାତିର ଔଷଧୀୟ ଗୁଳ୍ମ ଭରି ରହିଛି,ଅନେକ ପ୍ରଜାତିର ଜୀବଜନ୍ତୁ, ସରିଶ୍ରୁପ ଅଛନ୍ତି । ଏହି ପୀଠରେ ଏକ ଗୁମ୍ଫାରେ ପୁରାତନ ଦିନରୁ ପ୍ରଭୁ ଜଗନ୍ନାଥ ମହାପ୍ରଭୁ ପୂଜା ପାଇ ଆସୁଥିବା ବେଳେ  ଶିବ ମନ୍ଦିର, ଲକ୍ଷ୍ମୀ ମନ୍ଦିର, ରାଧାକୃଷ୍ଣ ମନ୍ଦିର ଓ ଅନ୍ୟାନ୍ୟ ମନ୍ଦିର ରେ ଦେବାଦେବୀ ପୂଜା ପାଉଛନ୍ତି । ଏହି ଡଙ୍ଗର ରେ ଅନେକ ଗୁମ୍ଫା ରହିଛି । ପ୍ରତ୍ୟେକ ବର୍ଷ ଆଷାଢ଼ ମାସରେ ରଥଯାତ୍ରା ମହା ସମାରୋହରେ ପାଳିତ ହୋଇ ଆସୁଛି, ରଥଯାତ୍ରା ଦେଖିବାକୁ ଅଞ୍ଚଳ ର ହଜାର ହଜାର ଶ୍ରଦ୍ଧାଳୁ ଙ୍କ ସମାଗମ ହୋଇଥାଏ ।  ବାର ମାସ ରେ ତେର ପର୍ବ ତଥା ନୀତି କାନ୍ତି ଅନୁସାରେ ପ୍ରଭୁଙ୍କ ପୂଜା ଅନୁଷ୍ଠିତ ହୋଇଥାଏ । ପ୍ରତ୍ୟକ ଦିନ ଅଞ୍ଚଳ ତଥା ରାଜ୍ୟ ବାହାରୁ ଦର୍ଶକ ମାନେ ବୁଲିବାକୁ, ମନୋରମ ପରିବେଶ ତଥା ପ୍ରଭୁ ଜଗନ୍ନାଥଙ୍କ ଦର୍ଶନ କରିବା ପାଇଁ ଚାଲି ଆସନ୍ତି । ପୀଠ କୁ ପରିଚାଳନା କରିବା ପାଇଁ ବହୁ ବର୍ଷ ହେବ ଜଣେ ମଠାଧିସ ନିଜସ୍ୱ ଉଦ୍ୟମ ତଥା ଅଞ୍ଚଳ କିଛି ବଦାନ୍ୟ ବ୍ୟକ୍ତିଙ୍କ ସାହାଯ୍ୟ ସହଯୋଗ ରେ କରି ଆସୁଛନ୍ତି । ସପ୍ତର୍ଷି ମଠ ତଥା ଖପ୍ରାଡୁଙ୍ଗୁରି ର ସାମୁହିକ ବିକାଶ ଓ ପର୍ଯ୍ୟଟନ ମାନ୍ୟତା ପାଇବା ପାଇଁ ଅଞ୍ଚଳ ବାସୀ ଦୀର୍ଘ ବର୍ଷ ହେଲା ଦାବୀ କରି ଆସୁଛନ୍ତି କିନ୍ତୁ ରାଜନେତା ଓ ବିଭାଗୀୟ ଅଧିକାରୀ ଙ୍କ ସୁଦୃଷ୍ଟି ପଡୁ ନଥିବାରୁ ଅବହେଳିତ ଅବସ୍ଥାରେ ପଡ଼ି ରହିଛି ସପ୍ତର୍ଷି ମଠ । ପାଣ୍ଡୁଲିପି କହେ ପୁରାଣ ଯୁଗରେ ଏହି ପବିତ୍ର ପୀଠରେ ସାତ ଜଣ ମୁନି ଋଷି ଗୁମ୍ଫା ମଧ୍ୟରେ ବର୍ଷ ବର୍ଷ ଧରି ଜପ, ଧ୍ୟାନ, ସାଧନା କରିଥିବା ପ୍ରମାଣ ରହିଛି । ସାଧନା କରିବା ପାଇଁ ଏହା ସର୍ବୋକୃଷ୍ଠ ସ୍ଥଳୀ । କିଛି ମାସ ପୂର୍ବେ ମାନ୍ୟବର ରାଜ୍ୟସଭା ସାଂସଦ ଶ୍ରୀଯୁକ୍ତ ନିରଞ୍ଜନ ବିଶି ପ୍ରଥମ କରି ଖପ୍ରାଡୁଙ୍ଗୁରି କୁ ପରିଦର୍ଶନ ରେ ଯାଇଥିଲେ । ଏହି ସ୍ଥାନକୁ ଆଜିଯାଏଁ କେହି ବିଧାୟକ, ମନ୍ତ୍ରୀ, ଜିଲ୍ଲା ପ୍ରଶାସନ,ସାଂସଦ ଆସିନଥିଲେ । ପରିଦର୍ଶନ ସମୟରେ ସବୁ ଅଞ୍ଚଳ ବୁଲିଦେଖିଲେ ଓ ପରିଦର୍ଶନ ସମୟରେ ସପ୍ତର୍ଷି ମଠ ର ସାମୁହିକ ବିକାଶ ପାଇଁ ନିଜସ୍ୱ ସାଂସଦ ପାଣ୍ଠି ରୁ ଅନୁଦାନ ଦେବାକୁ ଘୋଷଣା କରିଥିଲେ । ସାଂସଦ ମହୋଦୟ ଆନ୍ତରିକତା ଦେଖେଇ ଆଜି ଜିଲ୍ଲାପାଳ ବଲାଙ୍ଗୀର ଙ୍କ ସହିତ ଆଲୋଚନା କରି ରାଜ୍ୟ ସରକାରଙ୍କ ପର୍ଯ୍ୟଟନ ଓ ସଂସ୍କୃତିବିଭାଗ ମନ୍ତ୍ରୀ ଙ୍କୁ ଚିଠି ଲେଖି ସପ୍ତର୍ଷି ମଠ ର ସାମୁହିକ ବିକାଶ ସହିତ ପର୍ଯ୍ୟଟନ ସ୍ଥଳୀ ମାନ୍ୟତା ପ୍ରଦାନ ପାଇଁ ଅନୁରୋଧ କରିଛନ୍ତି । ଏହି ଖପ୍ରାଡୁଙ୍ଗୁରି କୁ ପର୍ଯ୍ୟଟନ ସ୍ଥଳୀ ମାନ୍ୟତା ପାଇଲେ ଓ ସାମୁହିକ ବିକାଶ କଲେ ପର୍ଯ୍ୟଟକ ମାନଙ୍କ ଶୁଅ ଛୁଟିବ, ରାଜସ୍ୱ ବଢ଼ିବ, ଗରିବ ଜନସାଧାରଣ ଦୋକାନ ବଜାର କରି ଗୁଜୁରାଣ ମେଣ୍ଟେଇବେ । ସର୍ବୋପରି ଖପ୍ରାଡୁଙ୍ଗୁରି ର ସୁରକ୍ଷା ହୋଇପାରିବ । ସାଂସଦ ଙ୍କ ଏହି ମହତ୍ ପଦକ୍ଷେପକୁ ଅଞ୍ଚଳବାସୀ ବେଶ୍ ପ୍ରଶଂସା କରିଛନ୍ତି ।