11-Oct-2022

ବଲାଙ୍ଗିର (ପ୍ରେରଣା ଖବର) ବଲାଙ୍ଗୀର ସହରରେ ଦିନକୁ ଦିନ ନିଶା କାରବାର ବୃଦ୍ଧି ପାଇବାରେ ଲାଗିଛି । ଅବକାରୀ ବିଭାଗର ନିସ୍କ୍ରିୟତା ଯୋଗୁଁ ସହର ମଝିରେ ଦେଶୀ ଓ ବିଦେଶୀ ମଦର ଅବାଧ କାରବାର ବଢ଼ିବାରେ ଲାଗିଛି । ଏହି କ୍ରମରେ ଆଜି ବଲାଙ୍ଗୀର ଟିକ୍ରାପଡା ରାଣୀ ବନ୍ଧ ଆଡିରେ ବେଆଇନ ଭାବେ ଚାଲୁଥିବା  ଏକ ବିଦେଶୀ ଅଫ୍ ସୋପ୍ କୁ ସିଲ୍ କରିଛି ବଲାଙ୍ଗୀର ମୁନିସିପାଲିଟି । ବଲାଙ୍ଗୀର ମୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ସମି ରେଡ୍ଡି  ଜୟଶ୍ରୀଙ୍କ ନିର୍ଦ୍ଦେରେ ଏକ ଟିମ୍ ଆଜି ରାଣୀ ବନ୍ଧ ଆଡିରେ ଥିବା ବିଦେଶୀ ମଦ ଦୋକାନ ଉପରେ ଚଢ଼ଉ କରିଥିଲେ । ଅଫ୍ ସପ୍ ରେ କେବଳ ମଦ ବିକ୍ରି ହୋଇ ପାରିବ ମଦ ପିଆଯାଇପାରିବ ନାହିଁ କିନ୍ତୁ ଏଠାରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ଏଠାରେ ପ୍ରତିଦିନ ମଦୁଆ ମାନଙ୍କ ଆଡ୍ଡା ଜମିଥାଏ । ପାଖରେ ମଦ୍ୟପ ମାନଙ୍କ ପାଇଁ  ଏକ ଚାଖନା ଦୋକାନ ମଧ୍ୟ ରହିଛି ।  ପୂର୍ବରୁ ବିଭିନ୍ନ ଗଣମାଧ୍ୟମରେ ଏହି ଖବର ବାରମ୍ବାର ପ୍ରକାଶିତ ହୋଇ ସାରଛି ।   ସୂଚନାଯୋଗ୍ୟ ଯେ, ଏଠାରେ ବହୁ ଦିନରୁ ଏକ ବିଦେଶୀ ମଦ ଦୋକାନ ରହିଛି । ଏଥିଯୋଗୁଁ ରାଣୀ ବନ୍ଧ ଆଡିରେ  ମଦୁଆ ଓ ଅସାମାଜିକ ବ୍ୟକ୍ତିଙ୍କ ଦୌରାତ୍ମ୍ୟ ବୃଦ୍ଧି ପାଇବାରେ ଲାଗିଛି । ସବୁଠାରୁ ବଡକଥା ହେଲା ମଦୁଆ ମାନେ ମଦ ପିଇ ମଦ ବୋତଲକୁ ପାଖ ରାଣୀ ବନ୍ଧକୁ ଫିଙ୍ଗି ଦେଉଥିବା ଯୋଗୁଁ ରାଣୀ ବନ୍ଧର ପାଣି ମଧ୍ୟ ପ୍ରଦୂଷିତ ହେଉଥିବା ଦେଖିବାକୁ ମିଳିଛି । ଆଜି ମୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ନିଜ ବିଭାଗର ଏକ ପ୍ରୋଜେକ୍ଟ କାମ ତଦାରଖ କରିବା ପାଇଁ ଆସିଥିବା ବେଳେ ଅତର୍କିତ ଭାବେ ଏହି ଚଢ଼ଉ କରିଥିଲେ । ମଦୁଆ ମାନଙ୍କୁ ଦମନ କରିବା ଦିଗରେ ପୌର ଅଧିକାରୀଙ୍କ  ତତ୍ପରତା ଜନବସତିପୂର୍ଣ୍ଣ ଟିକ୍ରାପଡାଅଂଚଳରେ  ମଦ କାରବାରକୁ କିଛିକାଂଶରେ କମା ଯାଇପାରିବ ବୋଲି ମତପ୍ରକାଶ ପାଇଛି । ବଲାଙ୍ଗୀର ମୁନିସିପାଲିଟିର ଏହି ପଦକ୍ଷେପକୁୁ ସହରବାସୀ ସ୍ୱାଗତ  କରିଛନ୍ତି ।