28-Sep-2022

ସମ୍ବଲପୁର,(ସଂଜୀବ ପାଣିଗ୍ରାହୀ): କରୋନା ଯୋଗୁଁ ଦୀର୍ଘ ଦୁଇ ବର୍ଷର ବ୍ୟବଧାନ ପରେ ଚଳିତ ବର୍ଷ ସମ୍ବଲପୁର ଦଳେଇପଡାର ରାବଣ ପୋଡି ଉତ୍ସବ ମହାଆଡମ୍ବର ତଥା ଧୁମଧାମରେ ପାଳିତ ହେବ I ବିଜୟା ଦଶମୀ ଦିନ ଅଧର୍ମ ଉପରେ ଧର୍ମର ବିଜୟ, ଅସତ୍ୟ ଉପରେ ସତ୍ୟର ବିଜୟ ସ୍ୱରୂପ ପାପ, ଅହଂକାର, ଅସତ୍ୟର ପ୍ରତିକ ଦୁଷ୍ଟଶକ୍ତି ଦଶାନନ ଦହନ ବା ରାବଣ ପୋଡି ଉତ୍ସବ ଅନୁଷ୍ଠିତ ହେବ I ରିଂ ରୋଡ଼ ମହାନଦୀ ଘାଟରେ ଅନୁଷ୍ଠିତ ହେବାକୁ ଥିବା ଏହି ରାବଣ ପୋଡି ଉତ୍ସବ ସମ୍ପର୍କରେ ଆଜି ସ୍ଥାନୀୟ ହୋଟେଲ ଡ଼ଲଫିନ୍ ଠାରେ ଏନେଇ ଦଳେଇପଡା ରାବଣପୋଡି ଉତ୍ସବ କମିଟି ପକ୍ଷରୁ ଏକ ସାମ୍ବାଦିକ ସମ୍ବିଳନୀରେ ସୂଚନା ଦିଆଯାଇଥିଲା I ଆଗାମୀ ୬ ତାରିଖ ପବିତ୍ର ବିଜୟା ଦଶମୀ ସନ୍ଧ୍ୟା ୬ ଘଣ୍ଟା ୩୦ ମି. ସମୟରେ ଅନୁଷ୍ଠିତ ହେବାକୁ ଥିବା ଏହି ଉତ୍ସବ ସମ୍ପର୍କରେ କମିଟିର ସଭାପତି ସିଦ୍ଧାର୍ଥ ସାହା ଏବଂ ସମ୍ପାଦକ ଅନୁପ ତରିଆ ସୂଚନା ଦେଇଥିଲେ I ଚଳିତ ବର୍ଷ ରାବଣ ମୂର୍ତ୍ତି ପ୍ରାୟ ୫୦ ଫୁଟ ଉଚ୍ଚତାର ହେବ I ଏହା ସହିତ ବିଶେଷ ଆତସବଜି କାର୍ଯ୍ୟକ୍ରମ ରହିଛି I ରାବଣ ଦହନ ପୂର୍ବରୁ ଅପରାହ୍ନ ୪ ଟା ରେ ଏକ ଶୋଭାଯାତ୍ରା ବାହାରିବ I ଏହି ଶୋଭାଯାତ୍ରା ଦଳେଇପଡା ଦୁର୍ଗାମଣ୍ଡପ ରୁ ବାହାରି କୁଞ୍ଜେଲପଡା, ନନ୍ଦପଡା, ଝାଡୁଆପଡ଼ା ଦେଇ ରାବଣ ପୋଡି ସ୍ଥଳ ରିଂ ରୋଡ଼ ମହାନଦୀ ଘାଟ ପର୍ଯ୍ୟନ୍ତ ଯିବ I ଏହି ଶୋଭାଯାତ୍ରାରେ ରାମ, ଲକ୍ଷଣଙ୍କ ସହିତ ୩୦ ଜଣ ବାଳହନୁମାନ ବେଶଧାରୀ ଯୁବକ ରହିବେ I ରାଜ୍ୟର କଟକ, ଗଞ୍ଜାମ ଓ ସୁନ୍ଦରଗଡ଼ରୁ ସାଂସ୍କୃତିକ ଦଳ ଅଂଶ ଗ୍ରହଣ କରିବେ I ଜୈବ ବିବିଧତା କୁ ଦୃଷ୍ଟିରେ ରଖି ପରିବେଶକୁ ସୁହାଇଲା ପରି ସାମଗ୍ରୀରେ ନିର୍ମିତ ରାବଣ ଙ୍କ ପ୍ରତିମୂର୍ତ୍ତି ସ୍ଥାନୀୟ ଦଳେଇପଡାର ୮ ଜଣ କଳାକାର ଚୈତନ୍ୟ ଏବଂ ଗ୍ରୁପଙ୍କ ପକ୍ଷରୁ ତିଆରି ଚାଲିଛି I ଏହି ଉତ୍ସବ ପାଇଁ ୮ ରୁ ୧୦ ଲକ୍ଷ ଟଙ୍କା ବଜେଟ ରହିଛି ବୋଲି ଶ୍ରୀ ସାହା ପ୍ରକାଶ କରିଥିଲେ I ଏହି ସାମ୍ବାଦିକ ସମିଳନୀରେ ଦଳେଇପଡା ଦୁର୍ଗା ପୂଜା କମିଟି ସଭାପତି ପରମେଶ୍ୱର ରଣା, ରାବଣ ପୋଡି କମିଟିର ଉପ ସଭାପତି ଶିଶିର ପାଣ୍ଡେ, କୋଷାଧକ୍ଷ ରାହୁଲ ଠାକୁର, ସଦସ୍ୟ ଅଭିଷେକ କେଜ୍ରିୱାଲ ମଂଚାସୀନ ଥିଲେ I ଶାନ୍ତି, ଶୃଙ୍ଖଳାର ସହିତ ଲୋକ ମାନେ ଆସି ଏହି ଦଶାନନ ଦହନ ବା ରାବଣ ପୋଡି ଉତ୍ସବକୁ ଉପଭୋଗ କରିବାକୁ କମିଟି ପକ୍ଷରୁ ଅନୁରୋଧ କରାଯାଇଛି I