20-Sep-2022

ବଲାଙ୍ଗୀର,(ପ୍ରେରଣା ଖବର)-କେନ୍ଦ୍ର ଓ ରାଜ୍ୟସରକାର ବିଭିନ୍ନ ଯୋଜନାରେ ହିତାଧିକାରୀଙ୍କୁ ବ୍ୟାଙ୍କ ଆକାଉଣ୍ଟ ଜରିଆରେ ସହାୟତାରାଶି ଦେଉଛନ୍ତି । କିନ୍ତୁ ବିଭିନ୍ନ ସମୟରେ ବ୍ୟାଙ୍କ କର୍ମଚାରୀମାନେ ହିତାଧିକାରୀଙ୍କୁ ସେହି ସହାୟତାରାଶିି ଦେବାରେ ହଇରାଣ କରୁଛନ୍ତି । ଫଳରେ ହିତାଧିକାରୀ ଲାଭାନ୍ୱିତ ହେଉନାହାଁନ୍ତି ଓ ସରକାର ଉଦ୍ଦେଶ୍ୟ ସାଧିତ ହେଉନାହାଁନ୍ତି । ଏଭଳି ଏକ ଘଟଣା ନଜରକୁ ଆସିଛି ଦେଓଗାଁ ବ୍ଲକର ମହଲେି ଉତ୍କଳଗ୍ରାମୀଣ ବ୍ୟାଙ୍କରେ । ଏଠାରେ ଖାତା ଖୋଲିଥିବା ହିତାଧିକାରୀମାନେ ବ୍ୟାଙ୍କ ମ୍ୟାନେଜରଙ୍କ ମନମାନୀ କାରଣରୁ ହଇରାଣ ହରକତ ହେଉଥିବା ଅଭିଯୋଗ ହୋଇଛି । ଗ୍ରାହକମାନଙ୍କ ନାମରେ ଋଣଥିବା ଆଳ କରି ଚାଷସମୟରେ ରାଜ୍ୟସରକାର ଦେଇଥିବା କାଳିଆ ସହାୟତା ଟଙ୍କା ଓ ମନରେଗାରେ କାମକରି ପାଇଥିବା ମଜୁରୀ ଟଙ୍କା ମଧ୍ୟ ଶ୍ରମିକ ଓ ଚାଷୀଙ୍କୁ ଦେଉନାହାଁନ୍ତି । ଫଳରେ କାଳିଆ ସହାୟତା ପାଇଥିବା ଚାଷିମାନେ ଚାଷସମୟରେ ଅସୁବିଧା ଭୋଗ କରି ଠିକରେ ଚାଷକାର୍ଯ୍ୟ କରି ପାରୁନାହାଁନ୍ତି ବୋଲି ଅଭିଯୋଗ କରିଛନ୍ତି । ଉପରଝର ପଞ୍ଚାୟତର କୁହିମୁଣ୍ଡା ଗ୍ରାମର ଚାଷି ଓ ଶ୍ରମିକମାନେ ଏଭଳି ଅଭିଯୋଗ କରିଛଁନ୍ତି । କୁହିମୁଣ୍ଡା ଗ୍ରାମର ଶମ୍ଭୁ ସାହୁ ନାମଜ ଜଣେ ଚାଷି ତଥା ଶ୍ରମିକ ଅଭିଯୋଗ କରିଛନ୍ତି ଯେ, ତାଙ୍କ ଆକାଉଣ୍ଟରେ ସରକାରଙ୍କ କାଳିଆ ସହାୟତା ଟଙ୍କା ଜମା ହୋଇଛି । କିନ୍ତୁ ମହଲେଇ ବ୍ୟାଙ୍କ ମ୍ୟାନେଜର ତାଙ୍କ ଆକାଉଣ୍ଟକୁ ହୋଲ୍ଡ କରିରଖି ଦେଇଛନ୍ତି । ଚାଷ ଚାଲିଥିବା ସମୟରେ ଧାନଫ୍ସଲରେ ସାର ଦେବାକୁ ଅର୍ଥର ଆବଶ୍ୟକ ରହୁଥିବା ବେଳେ ବ୍ୟାଙ୍କରେ ଥିବା ଜମାଟଙ୍କା ଉଠାଇ ହେଉନାହିଁ । ଯାହାକି ଚାଷ କାର୍ଯ୍ୟରେ ବାଧା ସୃଷ୍ଟି କରୁଛି । ଏଭଳି କୁହିମୁଣ୍ଡାର ଆହୁରି ଅନେକ ଶ୍ରମିକଙ୍କ ବ୍ୟାଙ୍କ ଆକାଉଣ୍ଟକୁ ବ୍ୟାଙ୍କମ୍ୟାନେଜର ହୋଲ୍ଡ କରିରଖିଥିବା ଅଭିଯୋଗ ହୋଇଛି । ଏହି କୁହିମୁଣ୍ଡା ଗ୍ରାମର ସମସ୍ତେ ଚାଷି ଓ ଶ୍ରମିକ ରହିଛନ୍ତି । ପୂର୍ବରୁ ସେମାନେ ବ୍ୟାଙ୍କରୁ କିଛକିଛି ଋଣ ନେଇଥିଲେ ଓ ମରୁଡି ଯୋଗୁଁ ତାହା ପରିଶୋଧ କରିପାରିନାହାଁନ୍ତି । ବ୍ୟାଙ୍କ ପକ୍ଷରୁ ଧାନ ଅମଳ ସମୟରେ ଋଣ ଅସୁଲି କରାନଯାଇ ଏବେ ଚାଷ ସମୟରେ ଚାଷିଙ୍କୁ ଦାଉ ସାଧୁଛନ୍ତି । ଫଳରେ ଚାଷିମାନେ ଓ ଶ୍ରମିକମାନେ ଅସନ୍ତୋଷ ବ୍ୟକ୍ତ କରୁଛନ୍ତି । ଠକ ସେହିପରି ମନରେଗା କାମର ପାଉଣା ବ୍ୟାଙ୍କ ଆକାଉଣ୍ଟରେ ପଡୁଥିବା ବେଳେ ଗରୀବ ଲୋକଙ୍କ ନାମରେ ଋଣଥିବା ଆଳ କରି ସେହି ମଜୁରୀ ଟଙ୍କା ମଧ୍ୟ ଉଠାଇବାକୁ ଦିଆଯାଉନାହିଁ । ଶେଷରେ ଶ୍ରମିକମାନେ ପଞ୍ଚାୟତର ମନରେଗା କାମ ନକରି ବରଂ ଦାଦନ ଖଟିଯିବେ ବୋଲି ବାହାରୁଛନ୍ତି । ସରକାରମାନେ ଶ୍ରମିକଙ୍କୁ ନିଜ ଭିଟାମାଟିରେ କାମ କରି ବଞ୍ଚିବାକୁ ସୁଯୋଗ ଦେଉଥିବା ବେଳେ ଉତ୍କଳଗ୍ରାମୀଣ ବ୍ୟାଙ୍କ ଶ୍ରମିକଙ୍କ ଉପରେ ଜୁଲୁମ କରି ଏହି ସମୟରେ ମଜୁରୀ ଅର୍ଥରୁ ଋଣ ପରିଶୋଧ ପାଇଁ ଜବରଦସ୍ତ କରୁଥିବାରୁ ପ୍ରକାରାନ୍ତରେ ମନରେଗା ଯୋଜନାକୁ ହତୋତ୍ସାହିତ କରାଯାଉଥିବା ଅଭିଯୋଗ ହେଉଛି । ତେବେ ଏହି ଅଭିଯୋଗ ନେଇ ମହଲେଇ ଉତ୍କଳ ଗ୍ରାମୀଣବ୍ୟାଙ୍କର ମ୍ୟାନେଜର ସତ୍ୟଜିତ ଚୁଆଳସିଂଙ୍କୁ ପଚରାଯିବାରୁ ବ୍ୟାଙ୍କରେ ଋଣଥିବା ଗ୍ରାହକଙ୍କ ଆକାଉଣ୍ଟକୁ ଆମେ ହୋଲ୍ଡ କରିଛୁ । ଋଣ ଆଦାୟ ହେଉନଥିବାରୁ ଉପରୁ ଆମ ଉପରେ ଚାପ ପଡୁଛି । ତେଣୁ କୌଣସି ପ୍ରକାରେ ଆମେ ଋଣ ଅସୁଲି ପାଇଁ ଉଦ୍ୟମ କରାଯାଉଛି ବୋଲି କହିଛନ୍ତି । ମୋଟ ଉପରେ ଉତ୍କଳଗ୍ରାମୀଣ ବ୍ୟାଙ୍କ ଜବରଦସ୍ତ ଚାଷ ସମୟରେ ମଧ୍ୟ ଜୁଲୁମ କରି ଋଣ ଅସୁଲି କରୁଥିବା ସ୍ପଷ୍ଟ ହେଉଛି । ଜିଲ୍ଲାପାଳ ତୁରନ୍ତ ଏଦିଗରେ ପଦକ୍ଷେପ ନେବାକୁ ଜନସାଧାଣରେ ଦାବି ହେଉଛି ।