19-Sep-2022

ବିନିକା:(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ଏବଂ ବିନିକା ବନବିଭାଗର ମିଳିତ ଚଢାଉରେ ଶନିବାର ରାତିରେ ଗୋଟିଏ ପିକପ୍ ଭେନ ଯୋଗେ ଚୋରା ଚାଲାଣ ହେଉଥିବା ୨୩ଖଣ୍ଡ ସାଲ ଗଣ୍ଡି ଏବଂ ଚାଲାଣରେ ବ୍ଯବହ୍ରୁତ ଗାଡି ବନବିଭାଗ ଜବତ୍ କରିଛି। ଏଥିସହିତ ଚାଲାଣରେ ସାମିଲ ଥିବା ୨ଅଭିଯୁକ୍ତଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତ ମାନ ହେଲେ ବରଗଡ ଜିଲ୍ଲା ଭେଡେନ ଥାନାର ଝରାପାଲି ଗ୍ରାମର ରାଜିବ ମହାନନ୍ଦ (୨୧) ଏବଂ ଅନ୍ଯ ଜଣେ  ବିନିକା ଥାନା ମଣିଗାଁର ରାଜକୁମାର ବିଭାର (୩୫) ବୋଲି ଜଣାପଡିଛି। ସୂଚନା ମୁତାବକ ଶନିବାର ରାତି ପ୍ରାୟ ୯ଘଣ୍ଟା ସମୟରେ ଉଲୁଣ୍ଡା ରେଞ୍ଜ ଅଞ୍ଚଳ ପଟରୁ ଏକ ପିକପ୍ ଭେନ(ଓଡି୧୭ ଜି ୭୭୭୨)ଯୋଗେ ବରଗଡ଼ ଅଞ୍ଚଳକୁ ସାଲ ଗଣ୍ଡି ଚୋରା ଚାଲାଣ ହେଉଥିବା ବନବିଭାଗ କୌଣସି ସୁତ୍ରରୁ ଖବର ପାଇଥିଲେ। ଖବର ପାଇବା ପରେ ଏସିଏଫ ପ୍ରଫୁଲ୍ଲ କୁମାର ଧରୁଆଙ୍କ ନିର୍ଦ୍ଦେଶ କ୍ରମେ ଉଭୟ ଉଲୁଣ୍ଡା ଏବଂ ବିନିକା ରେଞ୍ଜର ବନବିଭାଗ କର୍ମଚାରୀ ବିନିକା ବ୍ରିଜରେ ଛକି ରହିଥିଲେ। ତେବେ ବିନିକା ବ୍ରିଜ ନିକଟରେ ଗାଡିକୁ ରୋକିବା ରେ ସଫଳ ହୋଇଥିଲେ ବନବିଭାଗ କର୍ମଚାରୀ। ତେବେ ଘଟଣା ସ୍ଥଳରୁ ଗାଡିରୁ  ୨୩ ଖଣ୍ଡ ସାଲ ଗଣ୍ଡି ଜବତ୍ କରାଯାଇଥିଲା ଯାହାର ଆନୁମାନିକ ମୁଲ୍ଯ ୬୫ ହଜାର ଟଙ୍କା ବୋଲି ଜଣାପଡିଛି। ଏଥି ସହିତ ବ୍ଯବହ୍ରୁତ ଗାଡିକୁ ଜବତ

କରିବା ସହିତ ୨ଅଭିଯୁକ୍ତଙ୍କୁ ମଧ୍ଯ ଧରିବାରେ ସଫଳ ହୋଇଥିଲେ ବନବିଭାଗ । ତେବେ ବନବିଭାଗ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିବା ଏସିଏଫ ପ୍ରଫୁଲ୍ଲ କୁମାର ଧରୁଆ ସୂଚନା ଦେଇଛନ୍ତି। ଏହି ଚଢାଉରେ ବିନିକା ବନବିଭାଗ ଅଧିକାରୀ ଡମ୍ବରୁଧର ପଧାନ,ବନପାଳ ଜନାର୍ଦ୍ଦନ ସ୍ବାଇଁ,ବନରକ୍ଷି ରାମଶଙ୍କର ମେହେର, ଉଲୁଣ୍ଡା ଖରାପୁରା ବନପାଳ ସମେତ ସିଣ୍ଢୋଲ,ବିନିକା,ଖରାପୁରାର ସମସ୍ତ ସ୍କୁଆର୍ଡ କର୍ମଚାରୀ  ସାମିଲ ଥିଲେ।